Фото: x.com/iamavim
Непал мен Үндістанда болған табиғи апаттар 60-тан астам адамның өмірін қиған. Непалдың Төтенше жағдайлармен күрес ұлттық басқармасының өкілі Шанти Махаттың айтуынша, 5 қазан күніне қарай елде кемінде 43 адамның қазасы тіркелген.
Шығыстағы Илам ауданында 37 адам қаза тапқан, тағы бесеуі із-түзсіз жоғалған. Reuters дерегіне сүйенсек, Непалда құрбандар саны кемінде 47-ге жеткен, көшкіндер бірнеше ауылды түгелдей шайып кеткен.
Үндістанның Батыс Бенгалия штатындағы Даржилинг аймағында да нөсер жауыннан көшкіндер жүріп, үйлер мен инфрақұрылым зақымданған. Бұл жерде 20-дан астам адам қаза болған.
Естеріңізге сала кетейік, қатты жауын 3 қазанда басталып, екі күн өткен соң ғана құтқарушылар тау бөктеріндегі шалғай елді мекендерге жете алған. Көшкіндер жолдарды жауып, әуе қатынасының уақытша тоқтауына себеп болды. Непал астанасы Катмандуда да өзендер арнасынан асып, қалаға қауіп төндірді.
