Қазақ баспасөзінің тарихы осыдан 106 жыл бұрын, яғни 1919 жылы алғашқы саны оқырман қолына тиген сәттен бастап қалыптасты. Газеттің қалыптасуы мен дамуына Бернияз Күлейұлы, Смағұл Сәдуақасұлы, Жүсіпбек Аймауытұлы, Мұхтар Әуезов, Бейімбет Майлин, Сәкен Сейфуллин секілді ұлт зиялылары зор үлес қосты. Сондай-ақ Тұрар Рысқұлов, Ораз Жандосов, Ғабит Мүсірепов, Шерхан Мұртаза және Әбіш Кекілбайұлы сынды біртуар тұлғалар осы қара шаңырақта еңбек етіп, басылым арқылы елдің мұңын мұңдап, жоғын жоқтады.
Газеттің атауы бірнеше мәрте өзгерді:
- 1921-1932 жылдары – «Еңбекші қазақ»;
- 1932 жылдан бастап – «Социалды Қазақстан»;
- 1937 жылдан бастап – «Социалистік Қазақстан».
Ал ел егемендігінің нышаны болған қазіргі «Егемен Қазақстан» атауы тарих жылнамасына 1993 жылы жазылды. Басылымның 100 жылдық (2019 ж.) және 105 жылдық (2024 ж.) мерейтойлары өз деңгейінде жоғары деңгейде аталып өтті.
Бүгінде «Егеменнің» әрбір саны мен сарғайған парақтарындағы деректер жыл санап емес, күн санап құндылығын арттырып келеді.
