МАҚСАТ – ЕЛБАСЫ ТАПСЫРМАЛАРЫН МҮЛТІКСІЗ ОРЫНДАУ

Үкімет басшысы Кәрім Мәсімов жұмыс сапарымен Солтүстік Қазақстан облысында болды. Кәрім Қажымқанұлы алдымен Тайын­ша ауданына атбасын тіреп, шаруашылықтар мен кәсіпорындарды аралады, еңбек ұжымдарымен кездесті. “Тайынша-Астық” ЖШС-нің сүт кешенінде болып, жұмыс барысымен танысты. Анатолий Рафальский басқаратын шаруашылық негізінен егіншілікпен айналысады. Биыл 37243 гектар алқапқа дәнді дақылдар өсірді. Майлы дақылдар көлемі де ұлғайып, 11704 гектарға жетті. Астық өндірудің озық технологиясын кеңінен қолданудың арқасында гектар берекелілігі 20-24 центнерден төмендеген емес. Агроқұрылым соңғы төрт жылдың ішінде 864 миллион теңгенің техникаларын сатып алды. Мал шаруашылығы да өркендеп келеді. Мұнда 3700-дей мүйізді ірі қара, 600-ге жуық жылқы өсіріледі. Сүт кешені іске қосылғалы өнім сапасының арта түскені байқалады. – Озық технологиямен жұмыс жасап жатқандарыңызды көріп тұрмын. Мұның өзі өнімнің сапасын жақсартумен қатар, бәсекелестік қабілеттігін арттыруға зор мүмкіндік берері сөзсіз. Кеден одағына кіруіміз бәрімізге зор міндеттер жүктейді. Осындай ет, сүт фермаларын жергілікті жер­лерде көбейтсек, азық-түліктен тапшы­лық көрмейтін боламыз. Адамдардың да сұранысы толық қанағаттандырылады, – дей келіп, Кәрім Қажымқанұлы диқан­дардың сауалдарына жауап берді. Алда жаңа егін орағы келе жатыр. Элеваторларда жатқан былтырғы астық өткізілмесе, жағдайдың қиындайтын түрі бар. Осы мәселені шешіп беруіңізді өтіне­міз. Сосын астықты делдалдарсыз – тіке­лей сатып алу жолдарын ойластырмай болмайды десті. Үкімет басшысы Ауыл ша­руашылығы министрі Ақылбек Күріш­баевқа тапсырма беріп, 400 мың тонна астықты батыс өңірлерге орналастыруды жүктеді. Сөзінің соңында облыста бірнеше элеватордың салынатынын, күзгі ризықты кідіріссіз қабылдауға барлық жағдайдың жасалатынын мәлімдеді. Бір сұрақ өңірге Ресейдің газын тарту жайына қатысты қойылды. К.Мәсімов тиісті орындарға тап­сырма берілетінін, мәселенің жан-жақты зерделенетінін жеткізді. Тайыншалықтар атынан сөз алған Анатолий Расальский ауыл тұрғындарына жасап жатқан ұдайы қамқорлығы үшін Елбасына деген ақ тілегін жолдап, зор денсаулық, отбасылық бақыт тіледі. Бұдан кейін Премьер-Министр индус­триялық-инновациялық даму бағдарламасы бойынша іске қосылған ет комбинатына келді. Оның жобалық құны – 5,4 мил­лиард теңге. Мал мен құсты өнеркәсіптік бор­дақылаумен 300-дей адам шұғылда­на­ды. Қайта өңдеу желілері кіретін кешен Еуроодақ стандарттарына негізделіп, ет өнімдерін сатып алудан өңдеуге дейінгі операциялар бір мезгілде атқарылады. Үкімет басшысы Солтүстік Қазақстан облы­сының 2010 жылға арналған индус­трия­лық-инновациялық бағдарламасының орындалу барысын, алдағы міндеттерді сұрастырып білді. Аймақ басшысы Серік Біләлов Елбасы тапсырмасына сәйкес атқарылып жатқан индустрияландыру картасы жайлы айтып берді. Бағдарламаның жалпы құны 27 мил­лиард теңгені құрап, 13 жобаны қамтиды. Оның 4-і – агроөнеркәсіп кешені сала­сына, 6-ы – мәшине жасау және құ­ры­лыс материалдары өндірісіне, 2-і – метал­лургияға, 1-і химия өнеркәсібіне тиесілі. Жобалар құрылысы кезінде – 900, іске қосылғанда 1700 адам тұрақты жұмыспен қамтамасыз етілмек. Бұл жобалардың 9-ын биыл пайдалануға беру көзделсе, бірінші жартыжылдықта 6-ы іске қосылды. Қуаты 40 мың текше метрлік Обухов кен орны­ның сынақ-өнеркәсіптік өндірісі, құрғақ көбік-бетон қоспалар зауыты, “Баско” ЖШС ет өндіру кешенінің екінші кезе­гі, Айсары кен байыту фабрикасы пай­далануға берілді. Еліміз үшін аса маңызды жоба “ЗИКСТО” АҚ-та жүзеге асты. Астық тасымалдайтын жаңа өнім – вагон-хоппердің тұсауы Мемлекет басшысы қа­тысқан телекөпірде кесілді. Зауыт отандық тауарлар өндіруге бейімделу, үлестік сал­мағын арттыру жөніндегі тапсырмаларды абыроймен орындап, вагон құрастырудың төрт түрін игерді. Алда жылына бір мың жабық вагон шығару міндеті тұр. 2015 жыл­ға қарай бір жарым мыңға жетпек. Олардың сапасы Ресей, Украина өнім­дері­нен бір кем емес. Өте маңызды жобаның өмірге жолдама алуына диқандар аса қуанулы. Былтыр солтүстікқазақстан­дық­тар бітік астық өсіргенімен, тасымалдау аса қиынға соқты. Шеттен сатып алу тым қым­бат. Енді, міне, қай жағынан болсын аса қолайлы хоппер-вагондардың Петро­павлда жасала бастауы отандық өнімдерге деген сұранысты арттырары сөзсіз. – Президент елімізді жаңа индустрия­лық-инновациялық мемлекетке айнал­дыру­дың тың жолдарын белгілеп берді. Ен­дігі күш-жігерді осы мақсатқа жұмылды­руымыз қажет. Бағдарламалар Үкіметтің тұрақты бақылауында, – деді К.Мәсімов. “Петропавл құрылыс материалдары зауыты” ЖШС полиэтилен құбырларын және құрылымдық оқшаулау панельдерін шығару бойынша үш желіні іске қосты. Президенттің еліміздің жеделдетілген индустриялық-инновациялық даму жос­парына арналған бейнеконференция аясын­да бұл жобаның тұсауы кесілген болатын. Содан бері кәсіпорынның қуаты артып, өнім түрлері молая түсті. Премьер-Министр осында болғанда полиэтилен құбырлар шығаратын аумағы атшаптырым цехты асықпай аралап көрді. Үй құрылысына арналған сэндвич пане­ль­дер­дің, металл жапқыштардың беріктігі мен төзімділігіне назар аударды. “Былтыр­ғыға қарағанда еңбек өнімділігін 1,3 есе арттырып, қосымша 20 адамға жұмыс тауып бердік. Алты айда 2016 тонна 700-1000 миллиметрлік полиэтилен құбырлар жө­нелттік. Сұраныс мол”, деді кәсіпорын­ның бас директоры Александр Кондратов. Үкімет басшысын “Бизнестің жол картасы-2020” бағдарламасының жергілікті жерлерде орындалу жайы да бейжай қалдырған жоқ. Бұл жөнінде халықты жұмыспен қамту және әлеуметтік бағдарламалар басқармасының бастығы Асқар Сақыпкереев баяндап берді. Былтыр бұл бағыт бойынша 182 жоба іске асырылып, 4,4 миллиард теңге жұмсалған. 11206 адам жұмысқа орналасқан. 5000 адам қайта даярлықтан, кәсіптік білім жетілдіруден өткен. Биыл бұл мақ­сат­тар үшін 5,5 миллиард теңге қарасты­рыл­ған. Тұрғын үй-коммуналдық шаруа­шы­лық жүйесін қайта жаңғырту мен да­мы­туға 2 миллиард теңге бөлініп, 1625 адам жұмыспен қамтылмақ. Республикалық және жергілікті маңызы бар жолдарды жөн­деуге 645 миллион теңге қарасты­рыл­ған. Әлеуметтік жұмыс орындары мен “Жастар тәжірибесін” ұйымдастыру екі мың жұмыс орындарын табуға көмектеседі. Кәрім Қажымқанұлы жолай “Ақбота” бөбекжайына соғып, бүлдіршіндердің бал тілін қызықтады. Білім басқармасының бастығы Темірғали Әбілмәжінов “Балапан” бағдарламасын іске асыру мақсатымен республикалық қазынадан 710 миллион теңге қарастырылғанын, мемлекеттік тапсырыс арқылы 6000-дай орын ашу көзделгенін, осынау игі іске жеке меншік серіктестіктерді тарту жайы қарасты­рылғанын баяндап берді. Бұдан соң К.Мәсімов облыстық кар­дио­логиялық орталыққа атбасын тіреп, “Ұрпақ қоры” бағдарламасының тұсауке­сері­не қатысты. Төрт және одан да көп баласы бар отбасыларды материалдық қолдау турасындағы қанатқақты жоба оның тарапынан қолдау тапты. Қызылжар өңіріндегі проблемалы мәселелердің бірі — кәріз жүйелерінің жайы. Әсіресе, Петропавл қаласының солтүстік беткейіндегі су торабы 40 жылдан бері жөндеу көрмеген. Жағдай осылай жалғаса берсе, экологиялық қауіптің туындары анық. Жобаның бірінші кезегі жүзеге асқанымен, қаржы тапшылығына байланысты әрі қарай жалғасын таппай қалған. Үкімет басшысы жағдаймен жан-жақты танысып шығып, қаржылай көмектесуге уәде берді. К.Мәсімов облыстағы жұмыс сапары­нан кейін БАҚ өкілдерімен брифинг өткізді. “Сапар мақсаты – Елбасы тапсырмаларының жергілікті жерлерде қалай атқарылып жатқанын көру. Олардың ішінен аса маңызды төрт жобаны: “Жол картасы”, индустриялық-инновациялық, денсаулық сақтау және білім беру салаларына қатысты бағдарламаларды бөліп айтар едім. Қызылжар өңірінде жасалып жатқан жұмыстар сан-салалы, көңіл көншітеді. Оған көзім анық жетті. Алда­ғы тұрған міндеттер одан да зор. Нен­дей істі қолға алсақ та түпкі нәтижесін халық сезінетін болсын”, дей келіп, Пре­мьер-Министр жергілікті билік орындарының жұмысына оң баға берді. Үкімет басшысы сол күні Қостанай облысына аттанып кетті. Өмір ЕСҚАЛИ, Суреттерді түсірген  Шүкір ШАХАЙ. Солтүстік Қазақстан облысы.