Аттестаттау – мемлекеттік қызметшінің әлеуетін айқындайды

Мемлекеттік қызмет саласындағы жүзеге асырылатын өзгерістер жайы Орталық коммуникациялар қызметінде Мемлекеттік қызмет істері және сыбайлас жемқорлыққа қарсы іс-қимыл агенттігінің департамент директоры Әли Көмекбаев пен Сыртқы істер министрлігінің жауапты хатшысы Анарбек Қарашевтың қатысуымен өткен брифингте кеңінен айтылды.  Департамент директоры 2012 жылы жауапты хатшы мен мемлекеттік орган басшысының арасындағы өкілеттіктер нақты ажыратылғандығын тілге тиек ете келіп, бұл ретте жауап­ты хатшының міндетіне аппа­раттың кәсіби жұмысы және оны ұйымдастыру кіріп отыр­ғандығын атады. Бүгін­гі таңда жауапты хатшы мемлекет­тік органның жұмысын ұйым­дас­тырушы функциялар – бухгалтерия, кадр саясаты, заңгерлік қызмет және өзге де міндеттерді атқарады. Ендігі қадам әкімшілік қызметтің автономдығын қамтамасыз ету үшін, ең алдымен, жауапты хатшының мәртебесін арттыру. Министрлер саяси тұлға ретінде ведомствоның сол және өзге де салаларындағы страте­гиялық мақсаттарын айқын­даумен айналысады және жоға­ры заң шығарушы органмен заңшығармашылық саласында өзара ықпалдасатын болады. Ал жауапты хатшының міндетіне әкімшілік басқару және саяси қызметкер қабылдаған шешім­дер­ді жүзеге асыру жатады. Бұл ретте саяси тұлғаның ауы­суы жауапты хатшының ауысуы­на алып келмейді. Осылайша, мемлекеттік функ­циялардың сабақтастығы мен тұрақ­тылы­ғына қол жеткізіл­мек. Мұн­дай жағдай кәсіби аппа­раттың қалыптасуына өзін­дік себін тигізеді. Мемле­кеттік аппараттың кәсібилігін қамта­масыз ету үшін 2016 жылы барлық әкімшілік қыз­меткер­лерді кешенді аттестаттаудан өткізу көзделіп отыр. Бұл жерде қызметкердің заңдарды білуі ғана емес, сонымен қатар, олардың өз қызметтік міндет­терін атқаруға қажетті жеке және лауа­зымдық сапалары да жан-жақты сараланады. Ол үшін тестілеу, әңгімелесу және аттеста­циялық тапсырмалар арқылы анық­тау қарас­тырылып отыр. Оның нәти­жесі қызметшіні дамыту­дың жоспарына негіз болып қалануы тиіс. Департамент директоры, сондай-ақ, аттестаттаудың мақ­саты мемлекеттік қызметші­ні жұмыстан аластату емес,  олардың әлеуеттерін анықтау боларына назар аудартты. Оның айтуынша, аттестациялық комиссия мемлекеттік қызмет­шінің қабілетіне қарай лауазы­мын жоғарылату туралы ұсы­ныс енгізуі де мүмкін. Мұның барлығы қазіргі таңда Мемлекеттік қызмет істері және сыбайлас жемқорлыққа қарсы іс-қимыл агенттігі тарапынан әзірленіп жатқан нормативтік-құқықтық базада бекітіледі. Сондықтан да, «Мемлекеттік қызмет туралы» және оған ілеспе түзетулерімен жаңа заң жобасы әзірленіп жатқаны айтылды. Сыртқы істер министрлігінің жауапты хатшысы Анарбек Қарашев дипломатиялық қыз­меттің мән-жайына тоқталды. Ол 2002 жылы қабылданған «Дипломатиялық қызмет туралы» Заңға тиісті өзгерістер енгізілгендігін атай келіп, қазір дипломаттар осы заңдық құжат бойынша жұмыстарын атқарып жатқандығына назар аудартты. Отандық дипломаттар Қазақстанның әлемнің дамыған 30 елінің қатарына енуі бағытында жұмыс істеп жатқандарын жеткізген ол 2017-2018 жылдары Қазақстан Республикасы БҰҰ Қауіпсіздік Кеңесінің тұрақты емес мүшесі болуға ұмтылып отырғанын ортаға салды. Қазіргі кезде Қазақстанның 64 мемлекетте өз өкілдігі бар. Министрлік қатары «Болашақ» бағдарламасы бойынша әлемнің ең озық деген 200 жоғары оқу орындарын бітіріп келген білікті кадрлармен толығуда екен. Жалпы, жауапты хатшының сөзінен белгілі болғандай, Сыртқы істер министрлігінде бүгінде 1233 адам жұмыс істесе, соның 846-сы шетелдердегі өкілдіктерде өз міндеттерін атқаруда. Және де орталық аппаратта 387 адам еңбек етуде. Қолданыстағы заң бойынша дипломатиялық қызметкер сол және өзге шет мемлекетте үш жыл қызмет атқаруы тиіс болса, елші немесе министрдің ұсынысымен оның қызметі тағы бір жылға созылуы мүмкін. Асқар ТҰРАПБАЙҰЛЫ, «Егемен Қазақстан».