Фото: depositphotos.com
Әлеуметтік желілерде бір әйелдің ауыл мектебіне келіп, камера алдында ақша жинауды бастаған қызметкерлермен дауласып жатқан видеосы тараған. Кадрлардан оның мұғалімдерден мерекелік безендіру мен костюмдерге әрқайсысынан 2 мың теңгеден не үшін жиналғанын анықтауға тырысқаны байқалады.
«Бюджеттен бөлінетін ақша қайда? Біреу 2 мың теңге беруге келіспесе, ол балалардың игілігі үшін ештеңе жасағысы келмейтін адам сияқты болып шығады. Маған тек осы ақшаның қайда кеткені қызық», деп таңғалады ол.
Алматы облысы Қарасай аудандық білім басқармасының баспасөз қызметі бұл дерек бойынша тексеру жүргізілгенін, алайда ақша жинау фактісі расталмағанын мәлімдеді.
«Тексеру нәтижесінде педагогтерден немесе өзге қызметкерлерден мәжбүрлі түрде ақша жинау фактілері анықталған жоқ. Оқу кабинеттерін безендіру бастауыш сынып мұғалімдерінің бастамасы болған, ақша жинау жүргізілмеген. Аталған іс-шараны мектеп әкімшілігі ұйымдастырмаған. Қарасай аудандық білім бөлімінің 2025 жылғы 8 желтоқсандағы №807 бұйрығына сәйкес, алдын ала педагогтерден ақша жинауға тыйым салынатыны жөнінде түсіндіру жұмыстары жүргізілген. Бұл жағдай мектептің Әдеп кеңесінде қаралып, қолданыстағы заңнама мен педагогикалық әдеп талаптарына сай тиісті шешімдер қабылданды. Қазіргі таңда жағдай бақылауда, түсіндіру жұмыстары жалғасып жатыр. Ахуал тұрақты», деп хабарлады ведомство.
Еске салайық, бұған дейін елордада ата-анасының қайтыс болғаны жалған ақпарат таратып, ақша жинаған ер адам ұсталған болатын.
Қостанайда мектеп мұғалімі әріптестерінің атына несие рәсімдеген.
