Атырауда Нұрсұлтан Назарбаевты қолдау форумы өтті

АТЫРАУ. 26 наурыз. Атыраудағы «Нұр Отан» партиясы өңірлік филиалы алдындағы алаңда президенттікке кандидат Нұрсұлтан Назарбаевты қолдаушылар форумы өтті. Оған өңірдегі кәсіпорындар мен мекемелерде жұмыс жасайтын мұнайшылар мен теміржолшылар, этномәдени бірлестіктер мен жастар ұйымдарының мүшелері, мұғалімдер мен дәрігерлер, қаржы саласының қызметкерлерінен құралған екі мыңнан астам қолдаушылар қатысты. Бұл туралы egemen.kz тілшісі хабарлады. Форумда алдымен Қазақстан Респбуликасы Президенттігіне кандидат Нұрсұлтан Назарбаевтың облыстық қоғамдық штабының жетекшісі Бейбіт Мамраев сөз алып, тәуелсіз Қазақстанның бүгінгі жетістіктері Елбасы Нұрсұлтан Назарбаевтың көреген саясатының, ел бірлігі мен халық ынтымағының жемісі екеніне кеңінен тоқталды. Мұнайлы өңірде татулық пен тұрақтылықтың орнығуына үлес қосып жүрген өзге этностардың атынан сөз алған «Видергебург» неміс этномәдени бірлестігінің жетекшісі Александр Думлер: «Біздің елімізде тұрақтылық пен қоғамдық келісім бар. Экономикалық өркендеу жаңа биіктерге жетелеп келеді. Жұмыс орындары ашылып жатыр. Жаңа кәсіпорындар іске қосылуда. Осының бәрі Елбасы Нұрсұлтан Назарбаевтың елді бірлікке ұйыстырған, жаңа істерге жұмылдырған көреген саясатының жемісі. Біз Елбасының саясатын қолдаймыз», деді. Нұрсұлтан Назарбаевтың кандидатурасын қолдаған саяси ұйымның бірі – «Патриоттар» партиясы. Форумда сөз алған аталған саяси ұйымның өңірлік филиалының бірінші хатшысы Ағила Молдағалиеваның пікірінше, Қазақстан тәуелсіздікке ие болған жылдарда басқа мемлекеттер ғасырлар бойы жүріп өткен жолды еңсеріп, қарқынды дамушы, экономикалық қуатты мемлекетке айналды. Шара барысында Х.Досмұхамедов атындағы Атырау мемлекеттік университетінің профессоры Бақтыбек Таубаев: «Біздің бәріміздің бір Отанымыз бар. Ол –Тәуелсіз Қазақстан. Біздің басты байлығымыз – Тәуелсіздік. Себебі, халыққа ең керегі – тұрақтылық пен бейбіт өмір. Ал Елбасының еліміз тәуелсіздік алғалы жүргізіп отырған саясатының басты діңгегі – тұрақтылық. Қазақстан нұрлы болашаққа Нұрсұлтан Назарбаевпен бірге жетуді қалайды», деді. Сонымен бірге, бұл күні Атырау қаласындағы Қ.Смағұлов атындағы алаңда жастар мен студенттердің Нұрсұлтан Назарбаевты қолдауға арналған флешмобы өтті. Облыстық қоғамдық штаб мүшелері Нұрсұлтан Назарбаевтың сайлауалды бағдарламасымен таныстыру үшін «Атырау жылу-электр орталығы» АҚ-ның ұжымымен кездесті. Жолдасбек Шөпеғұл. Дерек: egemen.kz. Cурет: Рахым Қойлыбаев.