Петропавлда 134 жас маман тұрақты жұмысқа тартылды

ПЕТРОПАВЛ. 4 наурыз. Петропавлда жоғары және арнаулы оқу орындарын тәмамдаған 134 жас маман «Жұмыспен қамту жол картасы-2020» бағдарламасы шеңберінде тұрақты жұмысқа орналасты. Бұл туралы қалалық жұмыспен қамту орталығы хабарлады. Орталықтың директоры Айжан Ілиясованың мәлімдеуінше, жастар тәжірибесі аясында 95 адамды жұмысқа тарту жоспарланса, нәтижесінде 134 адам орналастырылған. Бұл мақсат үшін республикалық қазынадан 16 миллион 931 мың теңге бөлінген. Мемлекеттік бағдарлама бойынша жұмыс тапқан Әлия Имамбаева М.Қозыбаев атындағы Солтүстік Қазақстан мемлекеттік университетін эколог мамандығы бойынша тәмамдаған. Әлия оқуын аяқтағаннан кейін біраз уақыт жұмыссыз жүріп қалған. Тек жұмыспен қамту орталығына келгеннен кейін  қалалық экология департаментінде 6 ай тәжірибеден өтіп, кәсіби жағынан ысылған. Нәтижесінде, сол мекемеге жұмысқа қабылданып, алғашқы еңбекақысына да ие болыпты. «Мекемелер мен кәсіпорындар көбіне жұмыс өтілінің, тәжірибенің болғанын қалайды. Біз осындай тығырықтан шығу мақсатымен жұмыссыз жүрген 29 жасқа дейінгілер жайлы жан-жақты мәліметтер жинақтадық. Қазір мемлекеттік бағдарлама бойынша көмек көрсетудің, жұмысқа орналастырудың кешенді іс-шаралары түзіліп, ықтималды жолдар қарастырылуда», дейді Айжан Боранбайқызы. Өмір Есқали. Дерек: Петропавл қалалық жұмыспен қамту орталығы. Сурет: petropavl.sko.kz.