Талдықорғанда 200-ге жуық жас көшет отырғызылды

ТАЛДЫҚОРҒАН. 4 наурыз. Талдықорған қаласында Қазақ хандығының 550 жылдығы, Жеңістің 70 жылдығы, Қазақстан Халқы ассамблеясының 20 жылдығы мен Конституциясның 20 жылдығы мерейлі даталары аясында 200-ге жуық жас көшет отырғызылды. Оған Алматы облысының әкімі Амандық Баталов қатысты. Бұл туралы zhetysu.gov.kz хабарлады. Облыстық «Жасыл ел» жасақтары, студенттер, оқушылар, бір топ ардагерлер қауымы мен әжелер және қала тұрғындарының атсалысуымен «Жастар» саябағына 50 қарағай, 80 көк шырша, 70 тянь-шань шыршасы отырғызылды. Ағаш отырғызу рәсімінде облыс әкімі Амандық Баталов сөз сөйлеп, көктемнің алғашқы күніндегі осындай игі бастаманы тұрақты түрде өткізіп тұру керектігін айтты. «Бұл жер болашақта Талдықорған қаласының ең көрікті, демалуға ыңғайлы жерлерінің бірі болады. Сонымен қатар, саябақтан бөлек бұл жерлерде 1200 орындық мектеп, мейрамхана, салтанат сарайы да бой көтереді. «Жастар» саябағы жастардың демалатын орны. Осы істің барлығы кейінгі ұрпақ үшін жасалуда», деді Амандық Баталов. Айта кетейік, 2014 жылы облыс көлемінде 10 мыңға жуық қылқан жапырақты ағаш көшеттері отырғызылған. Биылғы жылға да осынша ағаш отырғызу жоспарланған. Нұрбол Әлдібаев. Дерек, сурет: zhetysu.gov.kz.