АСТАНА. 4 наурыз. ВТБ Бірыңғай лигасында ойнайтын «Астана» баскетбол командасы өз алаңында Самараның «Красные Крыльясын» 95:88 есебімен жеңді. Бұл туралы egemen.kz хабарлады.
Ойында алғаш болып ұпай еншілеген «Астана» бірінші кезеңді өз пайдасына аяқтады.
Дегенмен, қонақтар басқа кезеңдерден гөрі дәл осы ширекте айтарлықтай қарсылық көрсетті. Тіпті кезеңнің орта тұсынан ауа бергенде самаралықтар 8 ұпай басымдығымен алға шықты. Әйтсе де, олар үзіліске дейін бұл басымдықты ұстап тұра алмады.
Ойынның қалған үш кезеңінде «Красные Крылья» командасының ойыншылары тек есеп айырмасын қысқартумен ғана уақыт өткізді. Тартыстың үшінші кезеңінде «Астана» 74:56 есебімен алға шығып, ұпай басымдығын 18-ге дейін арттырды. Алайда, төртінші кезеңде қонақтардың ойынына қан жүгіріп, екі команда арасындағы есеп 4 ұпайға дейін қысқарды. «Астананы» жаттықтыратын литвалық маман Рамунас Бутаутас дереу командасының ойын өрнегіне өзгеріс енгізді. Нәтижесінде, елордалықтар кездесу соңына дейін жеңіс есебін сақтап қала алды. Соған қарамастан тартыс соңындағы баспасөз мәслихатында Бутаутас мырза шәкірттерінің ойынына көңілі толмағанын айтты.
Кездесу барысында ең көп ұпай жинаған ойыншы «Красные Крылья» сапындағы Виктор Заряжко. Ол 40 минуттың ішінде еншісіне 25 ұпай жазған екен. Ал «Астана» командасынан Джерри Джонсон үздік атанды. Джерри өз командасының пайдасына 20 ұпай олжалады.
Осы жеңісінен кейін «Астана» ВТБ лигасының турнир кестесінде 9-орынға жайғасты. Сайыстың плей-офф кезеңіне үздік сегіз команда шығатыны белгілі. Астаналықтар лига аясындағы келесі ойынды 8 наурыз күні өз алаңында «Нижний Новгородқа» қарсы өткізеді. Бұл команда бүгінде турнир кестесінде 4-сатыда келеді. Сондай-ақ, бұл «Астананың» қатарынан үшінші жеңісі екенін де айта кетейік. Осыған дейін Эстонияның "Калев" командасы мен Саратовтың "Автодорынан" басым түскен болатын.
Еламан Қоңыр.
Дерек: egemen.kz
Сурет: bcastana.kz.
