Өмір шіркін, қашанда өз дегенін істемей қоймайды екен. Қартаймаймын десең де шашыңа ақ қырау түсіп, бет-аузыңды әжім торлағанын аңғармай да қаласың. Мәңгі жасағым келеді деп қиялдағаныңмен, сұм ажалдан қаша алмайсың. Бұл – адамзат үшін дәлелдеуді қажет етпейтін ақиқат. Ол тек бір құдірет күші – Аллаға ғана мәлім тылсым сыр. Алайда, халқыңа сүйікті, қадірлі әрі адал қызмет істеп, ұлт болашағы үшін өмір сүрген ерекше азаматтың аяқ астынан ажал құшуы кімді де болса өкіндірмей қоймайды. Қазақ руханиятының көрнекті тұлғасы, қазақ шежіресінің тарихын бүтіндеп артына өшпес із қалдырып кеткен халқымыздың абзал азаматы Ақселеу Сейдімбек есімі халық жүрегінде мәңгі қаларына ешкімнің де күмәні бола қоймас.
Өткен жылы қасиетті ораза айының Қадір түні өте салысымен, таңертең күллі қазақ жұртына Ақселеу ағаның қайтқаны жөнінде қаралы хабар тарап, жұрттың еңсесі түсіп қалған еді.
Өткен сенбі күні, тура бір жылдан кейін Астананың №54 мектеп-лицейінде халқымыздың қадірлі азаматы, белгілі ғалым, этнограф-жазушы, әрі журналист Ақселеу Сейдімбек атындағы мемориалдық мұражай ашылып, еске алу болды.
Мұражайдың салтанатты ашылуына қазақ руханиятының алдыңғы шебінде жүрген ел ағалары мен аяулы жанның ұрпақтары, жора-жолдастары, мектеп ұстаздары мен оқушылар қатысты. Ғалымның өмірі жайлы көптеген естеліктер айтылып, жастарға үлкен өнеге боларлық ғалымның ізгі адамгершілігі, халқына деген адал еңбегі мен сүйіспеншілігі жайлы сөз қозғалды.
Мұражайдың ашылу рәсімінде сөз сөйлеген №54 мектеп-лицейінің директоры Ұмсын Нұржігітқызы: “Бүгінде елімізге белгілі ғалым, жазушы, Мемлекеттік сыйлықтың лауреаты Ақселеу Сланұлы Сейдімбектің есімін Астанадағы №54 мектеп-лицейге беру жөніндегі қалалық мәслихаттың шешімі бар. Енді, осыған байланысты арнайы қаулы шыққаннан кейін, біздің мектебімізге Ақселеу ағамыздың аты беріледі”, – деп жиналған көпшілікті бір қуантты. Мұражайдың ашылуы осы ізгі істің тек бастамасы екендігін атап өткен ол ақ жүректі ағаның есімі осы мектепке берілуі керектігін қалалық әкімдікке жеткізетінін айтты.
Мемориалды мұражайға ғалымның жеке заттары, өз қолымен жасалған қобызы, домбырасы және шаңқобызы қойылып, жазушының шығармашылық өмірінен сыр шертетін фотосуреттер мен кітаптар көрмесі ұйымдастырылды. Ақселеу Сейдімбектің қызметтік дүниелерін де осы мұражайдан көруге болады. Қабырғаға ілінген Ақселеу ағаның: “Көктегі күнге, жердегі еліме мейірімім қанбады” деп айтқан бір ауыз сөзі адамның жанын ерекше тебірентеді. Ал мұражайдың кіреберісіне орнатылған Ақселеу ағаның бюст үлгісіндегі ескерткіші де адамның сезіміне әсер етпей қоймайды.
Мирза Фатали Ахундовтың: “Патриот – отанының мерейін үстем ету жолына, өз халқына деген сүйіспеншілігі жолында қолда барын, өмірін аямайтын адам”, – деп айтқанындай, Ақселеу Сейдімбек нағыз елдің патриоты, ұлт мақтанышы әрі жанашыры, халқымыздың ірі тұлғасы болып тарихтың бетінде, ұрпақ жүрегінде мәңгі қала бермек.
Арай ҮЙРЕНІШБЕКҚЫЗЫ. Суреттерді түсірген Орынбай БАЛМҰРАТ.
