Кеше Қазақстан Президентінің Алматыдағы резиденциясында Мемлекеттік хатшы – Сыртқы істер министрі Қанат Саудабаев қазақ әдебиетінің бір топ қаламгерлерін және республикадағы белгілі ақпарат құралдары жетекшілерін қабылдап, алқалы кездесу өткізді. Кездесуге келгендер арасында көрнекті ғалым, сыншы, академик Серік Қирабаев, Мемлекеттік сыйлықтың лауреаттары Шерияздан Елеукенов, Дулат Исабеков, Оразбек Сәрсенбаев, Нұрлан Оразалин, жазушылар Марал Сқақбаев, Бексұлтан Нұржекеев, мәдениеттанушы Мұрат Әуезов, т.б. қаламгерлер, сонымен қатар, “Қазақстан” телерадиокорпорациясының президенті Жанай Омаров, “Қазақ газеттері” ЖШС төрағасы Жұмабек Кенжалин, белгілі басылымдар бас редакторлары Жұмабай Шаштайұлы, Бақыт Сарбалаев, Ұлықбек Есдәулетов, Нұртөре Жүсіп, Шәмшидин Пәттеев, Қали Сәрсенбаев, Жанарбек Әшімжан болды.
Кездесу барысында Мемлекеттік хатшы еліміздің ЕҚЫҰ-ға төрағалығы мен екі жарым айдан кейін Астанада өтетін Ұйым Саммиті жайында баяндай келе, Мемлекет басшысының рухани саланы дамытуға тұрақты түрде қамқорлық пен қолдау көрсетіп келе жатқанын атап өтті.
– 8 айдан бері Қазақстан әлемдегі ең беделді де белді ұйымның бірі – ЕҚЫҰ-ға төраға болып отыр, – деді Қанат Саудабаев. – Сондай-ақ, 11 жылға созылған үзілістен кейін Ұйымға мүше елдер Мемлекет басшыларының саммиті Ақордада өтпекші. Саммитке әлемнің 67 елінен Ұйымға қатысушы мемлекеттер басшыларының және әріптес мемлекеттер жетекшілерінің келуі – ел тарихында болмаған айтулы оқиға. Оның үстіне жиын тәуелсіздігіміздің 20 жылдығы қарсаңында өткелі тұр. Бұл – Қазақстанның тәуелсіздік жылдарында қол жеткізген орасан зор табыстары мен жетістіктерін халықаралық қауымдастықтың бағалауы. Әрі үлкен халықаралық табыс, үлкен жеңіс, ортақ қуаныш. Міне, осы үлкен жеңісті, ортақ қуанышты еліміздің рухани, мәдени саласындағы тұлғалар ретінде басы-қасында болып, халыққа жеткізетін, ойларыңызбен бөлісетін сіздер. Сондықтан Елбасы сіздерге осы сәлемін жолдап, халықаралық жиынға үлкен үлес қосады деп үміт артып отыр.
Өз кезегінде сөз алған әдебиет қайраткерлері рухани саланы тұрақты түрде қолдап, қамқорлыққа алып келе жатқаны үшін Мемлекет басшысына ризашылық сезімдерін білдіре келе, Қазақстан тарихында ерекше оқиға болып саналатын салиқалы жиын туралы өз ойларын ортаға салды. Белгілі әдебиетанушы-ғалым Серік Қирабаев қаламгерлердің желтоқсан айында өтетін үлкен халықаралық жиын өткізуге атсалысуға, біздің осы саладағы қол жеткен жетістіктеріміз бен табыстарымызды насихаттауға, екінші жағынан сырт елдермен қарым-қатынастарымыз жөнінде пікір білдіруге шақырылғанын алға тартты. “Міне, соған барлығымыз да бірауыздан тілек қостық. Бұл еліміздің, Президентіміздің үлкен абыройы және халқымыздың әлемге танылатын, көрінетін мезгілі туғандай”, деді академик.
Бұл басқосуды рухани кеңістіктің алтын арқауы ретінде атап өткен Жазушылар одағының төрағасы Нұрлан Оразалин жыл басынан бері ЕҚЫҰ-ның Іс басындағы төрағасы міндетін атқарып келе жатқан Қанат Бекмырзаұлымен өткен әңгіме қаламгерлер үшін де, билік үшін де, халық үшін де келелі кеңес екенін жеткізді. “Олай дейтін себебіміз, қазақ халқының мыңдаған жылға созылатын ұлы тарихына көз жүгіртсек, қазақ халқының мемлекет ретінде қалыптасқан хандық, әртүрлі ордалардың құрамында, ұлыстардың жеке-жеке билігінде болған кезеңдерін білеміз. Бірақ, тұтасып, шын мағынасындағы әлем таныған үлкен іргелі мемлекет болуы – ХХ ғасырдың соңғы он жылдығында жүзеге асқан үлкен оқиға, ұлт үшін үлкен құбылыс. Сол жиырма жылға жетпейтін уақыт ішінде өзінің тәуелсіздігін алып, енді-енді қанаттанып, ел танып үлгерген мемлекеттің әлемдегі үлкен белді халықаралық ұйымды басқаруы – халық үшін, мемлекет үшін үлкен жеңіс. Ал енді оның объективті, субъективті факторларын түгендеп келген кезде тұлға, ел дейтін ұғым болады. Яғни, еліңді басқарған тұлғаңа байланысты сіздің мемлекетіңіз, еліңіз жөнінде баға беріле бастайды”, деді Н.Оразалин.
Әрі қарай Нұрлан Оразалин қалай дегенде де әлем мойындап, бағалаған жауапты кезеңде тұрғанымызды айта келіп, қаламгерлер қауымы елдің осындай үлкен емтиханды абыройлы аяқтауға, желтоқсан айында өтетін Ұйым Саммитінің қарсаңында өз үндерін қосатындығына сенім білдірді.
Ұйғыр әдебиеті кеңесінің төрағасы, жазушы-драматург, “Құрмет Белгісі” орденінің иегері Ахметжан Ашири да бүгінгі кездесудің үлкен мәні бар деп есептейді. Елбасы халық үшін, халқының бақыты үшін қыруар жұмыс атқарып жатқанда, әлемге танылған Көшбасшы жайында өз ойларын жеткізу зиялы қауымның парызы деп біледі. Сондай-ақ, Қазақстанда 132 ұлт өкілдері тұратын болса, ұйғырлар бір тамырлы – тіліміз де, дініміз де бір түркі халықтары екенін, ал Елбасының туысқандық, татулықтан қымбат ұлы қасиет жоқтығын айтқан данышпандық ойларын оқырмандарымызға жеткізуге мүдделі екендігін ерекше ықыласпен атады.
Гүлзейнеп СӘДІРҚЫЗЫ.