Көктау дейтін ауыл бар Хромтауда

Хромтау ауданының Көктау  кен орнында “Ақтөбе мыс ком­па­ниясы”ЖШС-нің мыс және мыс-мырыш кенін өндірумен айналы­суы осы аттас елді мекеннің қайта түлеуіне ықпал етіп отырғаны рас. Үдемелі индустриялық-иннова­ция­лық бағдарлама аясында жүзеге асырылып жатқан бұл жоба облыс экономикасының бойына қан жүгіртіп қана қоймай, әлеуметтік мәселелердің оң шешілуіне септігін тигізуде. Мұнда қазір 1200 адам жұмыс істейді, олардың 80 пайызы – жергілікті жұмысшылар. Бола­шақ­та жұмысшылар санын екі мың­ға жеткізу көзделуде. Осы кә­сіп­орынға жақын жерде “Көктау-2” ауылы бой көтеруде. Осы елді мекенде салынып жатқан тұрғын үйлерге  “Нұрлы көш” бағдарла­ма­сы бойынша елге келетін қандас­тарымыз қоныстанады. Алыс-жақын шетелдерден кө­шіп келетін оралман бау­ыр­лары­мыздың басым көпшілігі осы серік­тестікте жұмыс істейтін болады. Әзір­ге мұнда елу үйдің құрылысы жүргізілуде. Оның он бесінің шатыры жабылған, құрылысшылар қалғандарын да жақында бітіреміз деп қолдарын ысқылап отыр. Әр үйде төрт пәтер бар. Аудан әкімі Аязбай Османғалиевтің айтуынша, алдымен екі жүз отбасы көшіп келетін көрінеді. Одан кейін тағы да 62 үй салу көзделуде. Жалпы, бұл ауылға алты жүздей отбасы көшіп келеді деп күтілуде. Осында салынып жатқан 600 орындық мектеп құрылысы алдағы жылы аяқталмақ. Болашақта мұнда бала бақша, клуб сияқты әлеуметтік нысандар да салынады. Ауылға газ келіп тұр. Ауылдағы құрылыстарға түгелдей жергілікті материалдар пайдаланылуда. “Көк­тау-2” ауылындағы бұл үйлерді орал­мандар  “Тұрғынүйқұрылыс­жи­­нақ банкінің”  “Өркен” бағ­дар­ламасы несиелерін пайдаланып алады.  Ол үшін оралмандар 3,5 жыл бойы  үй бағасының жарты­сын жинап, 15 жылда 4,5 пайызбен барлық берешегінен құтылады. Сатыбалды СӘУІРБАЙ, Ақтөбе облысы.