Тисе терекке, тимесе бұтаққа

Жергілікті БАҚ өкілдерінің кейбір іс-әрекеттері осы мәтелді еріксіз еске түсіреді Мәжіліс депутаттарының сауа­лына қарсы кейбір жергілікті орыс тілді басылымдар мен муници­пал­ды телерадио арнасы (МТРК) өре түрегеліп, тыныш жатқан халықты алатайдай бүлдіруге бейім тұрды. Алайда, олар шындықтың өңін бұрмалап, қанша құбылтса да сол­түстікқазақстандықтардан қолдау таппай, маңдайлары тасқа тиген­дей болды. Бір ғажабы, ұлттық мәселелер төңірегінде әңгімелер қозғала қалса, облыстық әкімдік тікелей қаржыландыратын МТРК-нің (ди­ректоры Евгений Сазанов), әсі­ре­се, белсенді болып кететін әдеті бар. Бұл жолы да арна жанынан ашылған ОДК сайтында интернет-сауалдама жүргізіліп, әлдекім­дер­дің атынан арзанқол, жілігі таты­майтын пікірлер ұйымдасты­рыл­ды. Қызылжар атауының қайта­ры­луы­на қарсылық ретінде көше­лерге сары түсті лента тағып шы­ғуға, қол жинауға үндеп, жолда­рын нұсқап отырды. Мұндай қитұрқы жолсыз­дық­тар облыс әкімі Серік Біләловтің тарапынан қатты сынға ұшырады. Солтүстік Қазақстан облыстық Қа­зақстан халқы Ассамблеясының хатшылық меңгерушісі Сергей Бородин мұндай әрекетті ұлт араз­дығын қоздырушылық деп баға­ла­ды. Жуырда осы арна таратқан тағы бір ақпаратқа байланысты әділет департаментінің бастығы Степан Зайтлер брифинг өткізіп, оның шындықпен үйлеспейтінін әшкереледі. 24 қыркүйекте департаментте БАҚ және құқық қорғау орган­да­ры өкілдерінің қатысуымен “Қос азаматтық фактілерін болдырмау” деген тақырыпта дөңгелек үстел өткен. Онда бөлім бастығы Қор­лан Жұмабаева хабарлама жасап, соңғы жылдары Солтүстік Қазақ­стан облысында екі елдің азамат­ты­ғына қатысты заң бұзушы­лық­тың 81 фактісі тіркелгенін жет­кізген. Сол-ақ екен, МТРК-нің тілшісі әділет департаменті қос азаматтықты заңдастыруды қолдап отыр, министрлік алдына мәселе қойғалы жатыр деген жалған ақпа­рат таратқан. Интернет агенттік­тері оған сілтеме жасап, “Қазақ­станның солтүстік өңірі тұрғын­дарына қос азаматтық беру жө­нінде ұсыныс әзірленуде” деген мазмұнда мақалалар жариялап, жағдайды ушықтырып жіберген. С. Зайтлердің айтуынша, бұрмалау фактілері анықталғаннан кейін кінә­лілерге тиісті шара қол­данылмақ. Аты облыстық, заты қалалық телеарнаның шығармашылық ізденісі де қарын аштырады. Кә­сіп­орынға жергілікті бюджеттен қомақты қаржы құйылып жатса да, авторлық бағдарламалар кем­шін. Көкейкесті проблемалар, елдік мәселелер көтеріле бермейді. Көбіне жаңалықтарды берумен, қайталаумен ғана шектеліп жүр. 2008 жылы ішкі саясат басқармасы тарапынан жүргізілген тексерістің қорытындысы бойынша Е.Са­за­нов­тың орынсыз шығындардың салдарынан кәсіпорынды бан­крот­тық жағдайға жеткізгені дәлел­де­ніп, қызметінен алынған болатын. Алайда, бір жылдан кейін бұрынғы орынтағына қайта жайғасты. Істеп отырған тірлігі жоғарыдай. Одан “Петропавловск кz” га­зе­тінің тілшісі Екатерина Назарен­ко да қалысар емес. Мәлімдемеге саяси арандатушылық деген кү­дік­пен қарайды. Өзінің ойларын жұртшылыққа таңуға, үркердей топ­тан қоғамдық пікір тудыруға әуес. Ж.Сүлейменовті депутат­тық өкілеттігінен айыру мәсе­ле­сі көтеріліп жатыр деп алаөкпе болып жүргендерге дем беріп қояды. Не керек, түймедейді түйедей етіп көрсету, тырнақ ас­тынан кір іздеу, “тисе терек­ке, тимесе бұтаққаның” керін келтіру кей орыстілді басы­лым­дардың үйреншікті құбылысына айналып бара жатқаны алаң­датпай қоймайды. Тіпті халық қалаулыларының үндеуіне орай Конституциялық Кеңеске сұрау салу керек деп құлашты алысқа сермейтінін қайтерсің. Қанша білгішсінсе де тарихтан хабар­сыздықтары байқалып қалады. Керісінше, өздеріне қолайлы сәттерді қалт жібермеуге құш­тар. Мәселен, сенатор Т.Си­мамбаевтың ұшқары пікірлерін түгел келтіріп, жерден жеті қоян тапқандай шаттанады. Мақаламыздың соңында ұлтаралық келісімге нұқсан кел­тіретін осындай әрекеттерден сақтанбаса, кей адамдардың ада­сушылыққа ұрынып қала­тынын баса айтқымыз келеді. Өмір ЕСҚАЛИ. Солтүстік Қазақстан облысы.