ҚАРАҒАНДЫЛЫҚТАР ҚАРА ШАҢЫРАҚТЫ ҚАСТЕРЛЕЙДІ
Баспасөзге жазылу науқаны қарқын алған мерзімде “Егемен Қазақстан” республикалық газеті” акционерлік қоғамының президенті Сауытбек Абдрахмановтың өңірлерді бастан аяқ аралап шығуы қалыптасқан үрдіс. Бас басылым басшысының мұның алдында Шығыс Қазақстан облысы, Батыс Қазақстан аймағына, одан кейін Жамбыл облысына жасаған сапары Қарағанды облысында жалғасты.
Алдыңғы күні өндірісті өлке орталығына жолы түскен С.Абдрахманов алдымен Қарағанды мемлекеттік техникалық университетіне барды. Іргетасы қаланған кезден бастап ширек ғасырдан астам уақыт бойы тұңғыш ректоры болған Әбілқас Сағынов сынды ғұлама ғалым басқарған университет бүгінде алысқа танымал оқу ордасына айналғаны белгілі. Президент Н.Ә.Назарбаев кезінде осында білім жетілдіріп, еліміздің өсіп-өркендеуіне елеулі үлес қосып жүрген көрнекті инженерлер, қоғам қайраткерлері қанаттанды.
С.Абдрахманов университет қасбетінің қабырғасына осында халқымыздың аяулы ардақтысы Әлімхан Ермековтің жұмыс істегені жайлы жазылған ескерткіш тақтаға тағзым етті. Қайратты күрескер әрі ірі математик ғалым қуғын-сүргіннен оралған соң студенттерге аталған пәннен сабақ берген еді. Ұстазының өміріндегі қиын кезеңінде қамқорлық көрсетіп, терең білім нәрін талапкер жастарға сіңіруге мүмкіндік жасаған Әбілқас аға Сағыновтың үлкен азаматтығы ұрпаққа ұмытылмас өнеге.
Университет ректоры, ҰҒА академигі, Мемлекеттік сыйлықтың лауреаты Арыстан Ғазалиевтің жол бастауымен газет басшысы қазіргі заманғы көрнекі құрал-жабдықтармен жасақталған дәрісханалар мен оқу бөлмелері, Тұңғыш Президент Н.Ә.Назарбаев атындағы электрондық-технологиялық оқу орталығын аралап көрді.
Басылым жетекшісін академик Ә.Сағынов құрметіне аталған дәрісханаға лық толған оқытушылар мен студенттер жылы шыраймен қарсы алды. Кездесуді ашқан ректор А.Ғазалиевтің “Біз сізді ғалымдық қырыңыздан да жақсы білеміз. Сондықтан университет ғылыми кеңесінің шешімі бойынша оқу орнымыздың құрметті профессоры атағы берілгенін ұжым мүшелері алдында мәлім етемін” деген хабарын жиналғандар қол шапалақтап қабылдады.
Сөз кезегінде Сауытбек Абдрахманов бұл жүздесуге үлкен әсермен келіп отырғанын, әлгінде университет мұражайында Ә.Ермековтің “Ұлы математика курсы” атты оқулық еңбегін алғаш ұшыратқанын, оның атауының өзі терең мәнділігін айтып, тұғырлы тұлғаны қастер тұтушылыққа ризалық білдірді. Әңгіме жалғасында еліміз бас басылымының жазып, көтеріп жүрген мәселелері туралы баяндап берді. “Егемен Қазақстанның” жұртшылық арасында беделі биіктей түсуінің бір жарқын айғағы оқырмандары қатарының жылдан-жылға өсуі болып табылатындығы аталды. Бұдан он жыл бұрынғы 38 мың таралымның қазір 160 мыңға жетуі – соған нақты мысал. Соның ішінде Қарағанды аймағында газетті жазып алушылар саны бұл уақытта 8 есеге дейін өскені атап айтуға тұрарлық. Мысалы, 2000 жылы осы облыста “Егемен Қазақстанды” жазып алдырушылар саны небәрі 1639 адам болған еді...
Кездесуге қатысушылар тарапынан қойылған сан алуан сауалдар әңгіме желісін қыздырды. Ғылым докторлары Ибадулла Арыстанның, Зора Молдағалиевтің, Әділбек Нұрсағаттың және студенттердің түрлі тақырыптар төңірегіндегі сұрақтарына жан-жақты жауап қайтарылды.
Бұдан соң “Егемен Қазақстан” газетінің басшысы облыс әкімі Серік Ахметовтің қабылдауында болды. Әңгіме кезінде әкім Елбасы алға қойған міндеттер мен тапсырмаларды тыңғылықты іске асыру бағытында атқарылып жатқан іс-ізденістерді ортаға салды. Ал олар аз емес. Үдемелі индустриялық-инновациялық даму бағдарламасына енген 18 маңызды жобаның биылдың өзінде 10-ға жуығы орындалғалы отыр. Бірінші кезекте жергілікті өндіріс ауқымын кеңейтуге, көлемін арттыруға баса назар аударылған. Әкім осы кездесудің алдында Татарстандағы әйгілі мәшине жасау кәсіпорындарының жұмысымен арнайы танысып қайтқанын, Ресейдің “Соллерс” компаниясымен бірлесіп Қарағандыда да аталған өндіріс саласын өркендетуге бет бұрылғандығын айтты. Сондай-ақ атақты “БелАЗ” автомобильдерін құрастырудың қолға алынуы осы мақсаттағы қадамдардың бірі. Мұны да былай қойғанда, ауыл шаруашылығында қолданылатын жеңіл ұшақтарды шығару басталғалы тұр. Қоқысты қайта өңдейтін зауыт салынады. Осының бәрі жаңаша дамудың жолын қалайды.
Серік Нығметұлы мәлім еткендей, Қарағанды өңірінде әлеуметтік-тұрмыстық нысандарды салуды жеделдету үшін инвестиция тартуға баса көңіл бөлінеді. Мәселен, балалар бақшалары құрылыстарын жүргізуде сол көмекке арқа сүйеледі. Азаматтар мүддесіне қатысты қандай да мәселенің ұсақ-түйек еместігіне тоқталып, бұл ретте қылмыстық жазасын өтеушілерді еңбекпен қамтамасыз етуге талап күшейтіліп отырғандығын атады.
С.Ахметов пен С.Абдрахмановтың кездесуі кезінде баспасөзге жазылуды ұтымды ұйымдастыру шаралары жөнінде де әңгіме қозғалды. “Жақында өткен республикалық іргелі басылымдар бас редакторларының облыстағы күндеріне қатысушылардың ұсыныс-тілектеріне сәйкес төл газет-журналдар таралымын ұлғайту жолдары ойластырылып жатыр. Соның ішінде аймағымызда “Егемен Қазақстан” оқырмандары санын қазіргі 12 300-ден 13 мыңға жеткізудің мүмкіндігі бар”, – деді кездесу қорытындысында Серік Нығметұлы.
Иә, қазақ баспасөзінің қара шаңырағына қай жерде де ықылас ыстық болса, оған қарағандылықтар да ынтасы бөлек.
– Біздің облыстарға дәстүрлі іссапарларымызды келер жылғы таралымның жайын қамдаумен ғана байланыстыра салуға болмайды. Мұндай жүрістер өңірлердегі жайдаймен танысуға, тың тақырыптар табуға да мүмкіндік береді. Үкіметте үлкен белестерден өткен іскер басшы ретінде белгілі азамат Серік Нығметұлымен бір сағатқа созылған әңгіме кезінде қазыналы өлкеде көп шаруа тындырылып жатқанына көзім жетті, халықтың әл-ауқаты арта түскеніне сендіретін көптеген көрсеткіштер көлденең тартылды. Мұндай көңіл-күй баспасөзге жазылу барысына да оң әсер ететініне сенемін, – деді әкіммен кездесуден кейін облыстық теледидарға берген сұхбатында С.Абдрахманов.
Айқын НЕСІПБАЙ.
Қарағанды.
