Австрия Республикасының федералдық экс-канцлері Альфред Гузенбауэр: Көп мемлекеттердің басшылары Саммитке Президент Нұрсұлтан Назарбаевқа деген жеке құрметі үшін келеді

Мемлекет басшысы Нұрсұлтан Назарбаев Польшаның экс-пре­зи­денті Александр Квасьневски мен Австрия Республикасының феде­рал­дық экс-канцлері Альфред Гузенбауэрді қабылдады, деп хабарлады Қазақстан Республикасы Президентінің баспасөз қызметі. Әңгімелесу барысында халық­ара­лық күн тәртібіндегі өзекті мә­се­лелер бойынша пікір алма­сылды. Кездесуден кейін журналис­тер­ге арналған брифингте А.Гу­зен­бауэр жаңа елорданың құрылыс қарқынына таңданысын білдірді. – Бұл менің сіздердің елор­да­ла­рыңызға үшінші сапарым. Аста­на ғаламат жедел қарқынмен даму үстінде. Мұнда халықаралық дең­гейдегі архитектуралық тамаша үл­гілер бой көтерген. Мен Тәуел­сіз­дік сарайында болдым, қаланың даму жобасын көрдім. Бұл мені үлкен әсерге бөледі. Әлемде жаңа астанасы тақыр жерден бастап тұр­ғызылған мемлекет көп те емес. Бұл үшін үлкен күш-жігер талап етіледі, – деді ол. А.Гузенбауэр Қазақстанның ЕҚЫҰ-ға төрағалығына да жоғары баға берді. – ЕҚЫҰ-ның Ыстамбұлда саммиті болған уақыттан бергі он бір жыл бойы көптеген елдердің үкіметтері осындай форумды ұйым­дастыруға ұмтылды, бұл тек Қазақстанның ғана қолынан келді. Тіпті, осының өзі – зор жетістік. Екіншіден, саммит осы беделді Ұйымдағы Қазақстанның маңыз­ды­лығын атап көрсетеді. Мен сіз­дердің республикаларыңыз үшін бұл саммитті ұйымдастыру, бәрінен бұрын, Нұрсұлтан Назар­баевтың беделінің арқасында мүмкін болды деп ойлаймын. Көп мемлекеттердің басшылары үлкен кездесуге Президент Нұрсұлтан Назарбаевқа деген жеке құрметі үшін келеді, – деп атап өтті А.Гузенбауэр. Қазақстанның ЕҚЫҰ-ға төр­аға­лығы қызметіндегі басымдық­тары­ның бірі – толеранттылықты дамыту. Альфред Гузенбауэр бұл дұрыс басымдық деп санайды. Өйткені, әртүрлі мәдениеттер, ұлттар мен діндер өкілдерінің ара­сындағы өзара қарым-қатынас проблемасы, әсіресе Еуропада, өте өзекті. – Мен еуропалық елдерге көпұлтты қоғамның бай тәжіри­бесі бар елден үйрену пайдалы болар еді деп есептеймін. Өйткені, болашақта көпұлттылық ерекше бір жағдай емес, жаппай тәртіпке  айналады. Қазақстан көпұлтты мемлекет ретінде, әсіресе ЕҚЫҰ тұрғысынан, осындай барлық мәселенің шешімін табуға сүбелі үлес қоса алар еді, – деді Авс­трия­ның федералдық экс-канцлері. Альфред Гузенбауэр Қазақ­станның экономикалық табыс­тары­на да жоғары баға берді. Ол Нұрсұлтан Назарбаевтың дағда­рысқа қарсы бағдарламасы өзге мемлекеттер үшін үлгі бола алады деп санайды. – Қазақстан өзгелерге қарағанда, дағдарысты тез еңсерген елдердің қатарынан көрінді. Бұл өздігінен бола қойған жоқ. Табысқа жетудің басты алғышарты Президенттің жоспары болды. Ол дағдарысты еңсеруде және өсу жолына оралуда өте тиімді болды, – деп атап өтті А.Гузенбауэр. ---------------------------------- Суретті түсіргендер С.БОНДАРЕНКО, Б.ОТАРБАЕВ.