“Жасасын қазақ елі!” іс-шарасы аясында “Қаражорға” биін 10 000 жас биледі

Биыл еліміз Еуропадағы қауіп­сіздік және ынтымақтастық ұйымына төрағалық етуде. Осындай мәртебеге ТМД мем­лекеттерінің ішінде алғаш рет Қазақстан ие болып отыр. Еліміздің абыройы мен беделін бүкіл әлемге асқақтатқалы отыр­ған аса маңызды форум – ЕҚЫҰ Астана Саммиті өтеді. 56 мемлекеттің көшбас­шыларының басын біріктіретін алқалы жиын Отаны­мыздың халықаралық қоғам­дастық алдын­дағы саяси салмағын арттыратыны сөзсіз. Ел тәуелсіздігінің 19 жылдығы мен ЕҚЫҰ Саммиті қарсаңында көптеген мәдени-рухани іс-шаралар қолға алынуда. Осыған орай Оңтүс­тік Қазақстан облысы Мақтарал ауда­нының әкімдігі жақында ЕҚЫҰ Сам­митіне арналған “Жасасын біздің Елбасы, жаса­сын Қазақ елі, жастарын жалын­датқан” атты мерекелік іс-шара ұйымдас­тырып, қазақтың рухын көтеретін ұлттық биіміз “Қаражорғаға” үкілі кәмшат, бүрмелі көйлек киген, беліне сегіз өрім қамшы қыстырған 10 000 жас бір мезгілде биледі. Сол секілді аталған мерекелік іс-шара да сазгер, дәулескер күйші әрі шебер орындаушы Бөрі Исаның жетекшілігімен 500 жас буынның орындауындағы “Бал­бырауын”, “Тепең көк” күйлері де жұрт көңілінен шықты. А.ЕШАНҚҰЛОВА, Мақтарал ауданы әкімінің орынбасары.