Медиация дегеніміз не?..

Парламент Мәжілісінің Төрағасы Орал Мұхамеджановтың же­тек­шілігімен өткен палатаның сәрсенбі күнгі жалпы отырысы жа­қын­да Санкт-Петербург қаласында орын алған ТМД елдері Пар­ла­ментаралық Ассамблеясының пленарлық отырысы барысында ең­бектері аталып өткен депутаттарға марапаттар табыс етуден басталды. Депутаттық сауалдар жолда­нып болғаннан кейін бірқатар құқық саласындағы заңдық құ­жаттар қорытынды әзірлеу үшін заңнамалық айналымға алынды. Заңнама және сот-құқықтық ре­фор­ма комитетінің төрағасы Рах­мет Мұқашев 11 заң жобасына қорытынды әзірлеу уақытын бел­гілеуге байланысты қысқаша түсі­нік бере кетті. Осы ретте Ирак Елекеев “Медиация ту­ра­лы” заң жобасына қорытынды әзірлеудің қажеті бар ма, деген сауалын ортаға салды. Депутат бірқатар осы тектес заңдардың жұ­мыс жасамайтындығына қын­жылыс білдірді. Әріптесінің сауалына жауап берген комитет төрағасы медиация институты елімізде бірінші рет енгізіліп жат­қанын тілге тиек етті. Тіпті оның Орталық Азия бойынша тұңғыш рет енгізіліп отырғанын көлденең тартты. Мұндай институт тарап­тарды бәтуаға келуге шақырып, жапа шегушіні сотқа жеткізбей, мәселені өзара ымыраға келу арқылы шешуге ықпал ету тетігі болып табылады. Аталған заң жобасын қол­дау­ға шақырған Айгүл Соловьева онда қоғамның қатысуы қам­тыл­ған­дығына ерекше назар аудар­ды. Тұтынушылар құқын қорғау, кәсіпкерлерді қолдау және өзге де салалар бойынша қоғамның қатысуын қамтыған заңдық құжат­тың жұмыс істемей қалуына қоғам­ның өзі жол бермейді, деп тұжы­рымдады сөзін депутат. Медиация деген сөздің қазақ тіліндегі бала­масы бар ма деген сұраққа әзірге жауап табыла қоймады. Аударма­шылар заң жобасының жақында түскендігін айта отырып, бұл мә­селе көп қиындық туғызбайтынын жеткізді. 2006 жылғы 5 мамырдағы Қа­зақстан Үкіметі мен АҚШ Үкіметі арасындағы Экономикалық даму жөніндегі Қазақстан-Америка бағ­дарламасы бойынша өзара түсі­ністік меморандумына Қосымша келісімді ратификациялауға қатыс­ты заң жобасы туралы депутаттарға Экономикалық даму және сауда вице-министрі Марат Құсайынов түсінік берді. Өткен төрт жылда бөлінген 40 миллион доллар нендей мақсатқа жұмсалғандығын және алдағы уақытта қарастырылған 13 миллион доллардың жаратылуын сұраған Розақұл Халмұрадовтың сұрағына жауабында вице-министр қаржы оқыту және техникалық көмек беретін жобаларға бағытталғандығын ерекше атап кетті. Және де жетілдіру бойынша көптеген ұйымдастыру, қолдау көрсету жұмыстары атқарылғаны белгілі болды. Кенжеғали Сағадиев АҚШ-тың Қазақстанның БСҰ-ға мүшелікке кіру мәселесіне қиын шарттар қойып, қарсы болып келгендігін мысалға келтірді. Депутат аталған мәселе талқылануы кезінде осы сұрақ қойылды ма деп сұрады. Оған жауабында Марат Әбсеметұлы қазір БСҰ-ға кіру мәселесі әлі де талқылану үстінде екендігін жеткізді. Заң жобасы депутаттар тарапынан қолдау тауып, мақұлданды. Асқар ТҰРАПБАЙҰЛЫ.