Жылы шырайлы жүздесу

Кеше Қазақстан Республикасы Парламенті Мәжілісінің Төрағасы Орал Мұхамеджанов Қытай Халықтық саяси консультативтік кеңесі Бүкілқытайлық комитетінің Төрағасы Цзя Цинлиньмен кездесті, деп хабарлады Мәжілістің баспасөз қызметі. Жүздесуде Қазақстан мен Қытай арасындағы стратегиялық әріптестік, көршілес, достық және өзара тиімді сенімділікке негіз­дел­ген байланыс жыл сайын нығайып келе жатқаны айтылды. Бұлар Қа­зақ­стан Республикасының Прези­денті Нұрсұлтан Назарбаев пен ҚХР Төрағасы Ху Цзиньтаоның қа­рым-қатынастарынан бастау алып отыр. Келесі жылы қос мем­лекет арасында маңызды кездесу­лер болатыны күтілуде. Атап айт­қан­да, Мәжіліс Төрағасы 2011 жы­лы жазда Астанада өткелі тұрған Шанхай ынтымақтастық ұйымы­ның мерейтойлық Саммитіне Қа­зақ­стан тарабы Ху Цзиньтаоның қа­тысуын күтіп отырғанын жет­кізді. Қытай тарабы Азиядағы өзара іс-қимыл және сенім шаралары жөніндегі кеңес (АӨСШК), Әлем­дік және дәстүрлі діндер көшбас­шы­ларының съезі секілді Қазақ­станның сыртқы саясаттағы маңыз­ды бастамаларына қолдау білдіріп келеді. Өз кезегінде Қазақстан Қы­тайдың лаңкестікпен, сепаратизм және экстремизмге қарсы күрестегі ұстанымдарын қолдайды. Айта кету керек, Мәжілісте ҚХР Парламентімен ынтымақ­тастық тобы құрылған жетекшісі де­путат К.Сағадиев болып табыла­тын бұл топ құрамында 24 депутат бар. Мәжіліс Төрағасының Бей­жің­ге парламенттік байланысты да­мыту мақсатында ресми сапары жос­парлануда. Сол сапар шең­берінде Бүкілқытайлық халық өкілдері Жиналысы Тұрақты комитетінің Төрағасы У Бангомен кездесуі қарастырылуда. Кездесуде Қытайдың көп ұлтты және көп дінді ел екені айтылды. Ұлтаралық қарым-қатынаста және мә­дени-гуманитарлық ынтымақ­тастықта тәжірибе алмасудың тиім­ділігі сөз болды. Сауда-эконо­микалық байланыс қарқын алып келеді. Қазақстанның сауда ай­на­лымы саласындағы әріптестері ішінен Қытай төртінші орында тұр. Қазақстанның сыртқы саудасын­дағы ҚХР үлесі 15 пайыздан астам. Сондай-ақ, Қытайдың сауда айналымы саласындағы әріптестері арасында Қазақстан ТМД елдері ішін­де Ресейден кейін екінші орында тұр. Бүгінгі таңда Қытай Қазақстан экономикасына қаржы салып отырған ірі инвестор екені анық. 2009 жылы екі мемлекет жалпы көлемі 13 млрд. долларды құрайтын кредиттік келісімдерге қол қойды. Цзя Цинлинь мырза Бүкілқы­тайлық халық өкілдері Жиналысы Тұрақты комитетінің Төрағасы У Бангоның ыстық сәлемін жеткізді және өз еліне шақырды.  Мәжіліс Төрағасы шақыруға ризашылығын білдіріп, еліміздің атына айтқан жылы пікірі үшін алғысын жеткізді. Кездесуге Қазақстан Республи­ка­сының ҚХР-дағы  Төтенше және өкілетті елшісі Икрам Адырбеков пен бір топ Мәжіліс депутаттары қатысты. Кездесуден кейін Цзя Цинлинь мырза Мәжілістің құрметті қонақтар кітабына тілегін жазып, қолтаң­басын қалдырды.