ТҰҒЫРЫ – БИІК МЕРЕЙІ – ҮСТЕМ
«Газет – күнделікті өмір айнасы» деген қанатты сөздің растығын еліміздің бас басылымы «Егемен Қазақстан» газетінен айқын көруге болады. Оның қай айдарын алсаңыз да тағылымы жоғары, тақырыптарының өзектілігі сайрап тұр. Ізденіске толы газет ұжымында күнделікті қандай шаруалар атқарылатынынан, газет қызметкерлерінің шығармашылық жұмыстарының қалайша жүзеге асырылып жатқанынан, әрине, бейхабармыз. Әйтеуір келесі күнгі әп-әдемі, жинақы материалдардан тұратын, қоғамға тұшымды ой тастайтын, адамның қызығушылығын оятатын, мазмұны мен сөздері ерекше үйлесім тауып отырған газетті қолымызға ұстап, мақалалар тұңғиығына үңілуге асығамыз. Ес білгеннен бері, қоғамдағы даму үрдістеріне араласа бастағаннан бері «Егемен Қазақстан» газетін оқып, салмақты тақырыпқа байланысты газет қиындыларын жинастырып, каталог жасауды әдетке айналдырып едім. Кейде соларды ақтара отырып, тұтас бір ғылыми-зерттеулермен айналысуға мүмкіндік беретін ұшан-теңіз құнды материалдар жинақталып қалатынын өзім де аңғармай қаламын. Редакция тілшілерінен бөлек, газетті қызғылықты, тартымды ететін белгілі адамдардың – жазушылар мен ғалымдардың, қоғам қайраткерлерінің толғаныстары, ой сабақтаулары, ашық пікірлері өте маңызды екендігін тілге тиек еткім келеді. Солардың ішінде қоғам және адам, Отан және атамекен, өзара түсінісу мен сыйласу туралы толғаныстар әрдайым бөлекше болып көрінеді де тұрады. Мақалаларды уақыт өткізіп, сол уақыттың сынына салып барып қайталап оқу адамға шынымен де көп ой салады екен. Еліміздің қоғамдық тұрақтылық бағытындағы атқарылып жатқан оңды істер, Елбасының салиқалы саясаты, Қазақ елінің сыртқы байланыстарынан бастап, халықтың мұң-мұқтажы, рухани әлемі, ұлттық сананың елдік санамен қабысып барып мақалалар тізбегімен көрініс тауып жатқандығы – осының бәрі білгім келеді деген адамның әрқайсысына таным көкжиектерін арттыруға зор көмегі болады. «Тұлғалар толғанысы», «Алаштың ардақтысы», «Өнеге өрнектері», «Көкейкесті», «Ашылмаған аралдар», «Есімі елдің есінде» сынды тағы да басқа көптеген айдарлар бойынша шығатын мақалалар оқырмандардың көзайымына айналғалы қашан. Бүгінгі ақпараттар тасқыны заманында оқырмандарды өз артына ерте жүрудің өзі үлкен шеберлік деп білемін. 160 мыңнан астам таралымы бар ел газетінің оқырман аудиториясы да осал емес екендігі айтпаса да түсінікті болар. Бұдан нені аңғаруға болады дегенге келсек, «Егемен Қазақстан» газеті ұстанымы жағынан да, мақалалардың сапасы мен мазмұны жағынан да көш ілгері екендігін айғақтаса керек. Бұл дәлелдеуді қажетсінбейтін пікіріме көпшілік қауым да қосылады деген ойым бар. Газетте жарияланған мақалалар оңайлықпен жазыла қоймайтыны белгілі. Олардың авторлары ғана емес, кейіпкерлері де оқырман алдындағы, жұрт алдындағы жауапкершілікті барынша сезініп, оқыған адамға сәл де болса пайдамыз тисе деген ойда болады. Шығармашылық сеніммен өз-өздерін дәйім алға жетелейтін тілшілерді, артта еріп келе жатқан талапты да жігерлі жастарды көргенде, олардың жазғандарын оқыған кезде кәдімгідей сүйсінетінімізді жасыра алмаймыз. Өркендері өссін сол жастардың! Өткен жылы газеттің тұғырлы тоқсан жылдығы аталып өтілді. Бұл тек қалың оқырманы бар газеттің тойы болған жоқ, күллі қазақ зиялыларының, журналистерінің, жазушыларының тойы болғаны анық. Өйткені, қазақ баспасөзінің қара шаңырағына айналған киелі орынды бар қазақ бағалайды, қалың ел қадірлейді. Заманымен үндес заңғар басылымның қашанда даңқы тасып, тұғыры биік, өресі кең, мерейі үстем болуын тілейміз. Елдік, ерлікпен жасасып келе жатқан ел газетінің еншісі әрқашан елімен бірге мәңгі жасай берсін! Мұратбек ҚАСЕНОВ, М. Х. Дулати атындағы Тараз мемлекеттік университетінің аймақтық экономика ғылыми-зерттеу орталығының директоры, экономика ғылымдарының докторы, профессор. * * * Жеделхат«Егемен Қазақстан» республикалық газеті» АҚ президенті Сауытбек Абдрахмановқа
Биыл Шу ауданына – 80, Шу қаласына – 50 жыл толды. Шу ауданы тұрғындарының бұл қуанышы Астанада өткен ЕҚЫҰ-ның Саммитіне ұласты. Еліңнің бас қаласында жер-жаһанның жайына алаңдаған ұлы жиын өтіп жатқанда неге қуанбасқа, неге қуаттамасқа! Осы мерейлі мерекелер мен салиқалы кеңестердің жай-жапсарын біз әрдайым республикалық «Егемен Қазақстан» газетінің бетінен оқып, біліп отырамыз. Өйткені, ол мәселені жан-жақты, толыққанды жазады. Астана, Алматыдан бастап өңірлерге дейінгі атқарылып жатқан жақсы істерді қамти білетін білімді, білікті авторлары да өте көп. Олардың басалқалы пікірлері мен орынды ойлары оқырманын орға жықпасы анық. Сонымен бірге, 90 жастан асқан ата басылымның Шу өңіріне де назар аударып, игі істерімізді халыққа дер кезінде жеткізетініне де өте ризамыз. Біз, Шу өңірінің тұрғындары, биыл ел газеті – «Егемен Қазақстанға» аудан бойынша 1520 данаға жазылуды ұйғардық. Қазірдің өзінде басылымға 1383 адам жазылды. Ал алдағы аптада уәдені толық орындаймыз деп сендіремін. Қожахан ЖАБАҒИЕВ, Шу ауданының әкімі. Жамбыл облысы. * * * “Егемен Қазақстан” – қазақ баспасөзінде айрықша орны бар басылым. Замананың тамырын дөп басып, халықты барлық қажетті ақпараттармен жан-жақты қамтамасыз етіп отырады. Ал мемлекетте болып жатқан жақсы өзгерістерді, экономикалық дамуды, әлеуметтік саладағы жақсылықтарды “Егемендей” нақты әрі жан-жақты жазатын басылым Қазақстанда жоқ десек те болады. Көлеңкелі жәйттер әр мемлекетте бар. Оны көзге шұқып көрсете беру, жұрттың болашаққа деген көңіл-күйін түсіру елге жаны ашығандық емес. Сондықтан ел жақсылықтарды көп жазатын “Егеменді” жақсы көреді. Былтыр Төле би ауданының оқырмандары 1244 дана газет жаздырып алған. Биылға жазылушылардың қатары одан артып келеді. “Егемен Қазақстан” газетінің ұжымына жақсылық тілейміз. Әуелхан ТҰРҒЫМБЕКОВ, Төле би ауданының әкімі. Оңтүстік Қазақстан облысы. * * * Тәуелсіз Қазақстанның тыныс-тіршілігін ел жұртшылығына жеткізуде ата басылым – «Егемен Қазақстан» газетінің алар орны ерекше. Қоғамдағы оң өзгерістерді күн құрғатпай жазып, бұқараны ақпаратпен сусындатып отырған от ауызды, орақ тілді журналистеріңіз ел мақтанышына айналды. Мемлекетіміздің әлеуметтік-экономикалық жай-күйін жақсартуда, халықтың әл-ауқатын арттыруда, Президентіміз Нұрсұлтан Назарбаевтың салиқалы, сарабдал саясатын ел ішіне насихаттауда халықтың көзі мен тілі һәм жүрегіне айналған газет ұжымы еңбегінің зор екенін барша халық біледі. Академик Е.А.Бөкетов атындағы Қарағанды мемлекеттік университетінің ұжымы газеттің 278 данасына жазылды, жазылу әлі де жалғасуда. Қалың оқырманды Қазақстан Республикасының әлемдегі деңгейі, әлеуметтік-экономикалық және саяси дамуы, білімі мен ғылымы, мәдени, әдеби өмірі жайлы сыр шертетін жасампаздық жаршысына айналған «Егемен Қазақстан» газетін оқуға үндейміз. Халықтың мұң-зарына құлақ түріп, билік пен бұқара арасындағы алтын көпірге айнала білген «Егемен Қазақстанның» ұйымшыл ұжымына шығармашылық табыс тілейміз! Еркін КӨБЕЕВ, Е.А.Бөкетов атындағы ҚарМУ-дің ректоры. Қарағанды.