Желтоқсанның басында Мәскеудегі Манеж алаңында радикалды жастардың акциясы көп адамды мықтап ойландырған оқиға болды. Ол жайында әңгіме ел ішінде де, сыртта да осы күнге дейін созылып келе жатыр, сірә, жаңа жылда да айтылатын болар.
Манеж алаңындағы оқиғадан жұрт хабардар. Онда футбол жанкүйері Егор Свиридовтің қаза болуына байланысты бес мыңдай адам бой көрсетуге шыққанда, орыстар мен кавказдықтар арасында қақтығыстар болған. Нақтырақ айтқанда, ұлтшылдық көңіл күйдегі жастар «Ресей – орыс үшін!» деген ұран тастап, Кавказдан шыққандарға тиіскен.
Бұл оқиға желтоқсанның 11-і күні сенбіде болса, 15-і күнгі сәрсенбіде жалғасуы тиіс еді. Жалғасты десе де болғандай. Тек Мәскеудің өзінде 1384 адам ұсталып, милиция бөлімшесіне жеткізілген. Олардан қару ретінде пайдалануға болатын заттар тәркіленген.
Сәрсенбі күнгі оқиға тек Мәскеуде ғана емес, елдің екінші астанасы Петербургте, сондай-ақ Ростов, Тольятти сияқты қалаларда да болып, ауқымы айтарлықтай кеңіген. Петербургте – 174, Ростовта – 177, Тольяттиде 30 кавказдық ұсталыпты. Жалпы, кавказдықтардың жолы бола қоймағанға ұқсайды. Ресейдің жетекші газетінің бірі орыс ұлтшылдарын олар көтерген транспаранттарына, ұрандарына қарай айырған шығар, ал кавказдықтарды қалайша ұстады екен деп таңданса, оған жауапты Питер тұрғыны береді: «Менің күйеу балам Әлішер қызымды күтіп тұрғанда ұстап әкетіпті, тек орыс болмағаны үшін!», деп күйінеді. Ал Тольяттиде орыс ұлтшылдарына милиция ауызша ескертумен шектеледі де, сонда келген 30 кавказдық жігіттің бәрін бөлімшеге жөнелтеді.
Алалау болғаны, көбіне кавказдықтарды кінәлау басым болғаны аңғарылады. Әйтпесе Мәскеуден басталып, елдің біраз қалаларында жалғасқан тәртіпсіздіктердің бастамашылары ұлтшыл-патриоттар болғаны даусыз. Ал кавказдықтардың әрекеттерін басынған ұлтшылдардың бұзақылығына жауап деп сипаттауға болар еді. Футбол фанаты Егор Свиридовтің қазасына ұлтшылдық сипат берудің де жөні жоқ екен. Оны прокуратура анықтап отыр. Оның өлімін ұлтшыл-патриоттар басқаларға тиісу үшін, өздерінің қара ниеттерін жүзеге асыру үшін пайдаланған.
Ұлтшылдық-фашистік көңіл күй Ресейде біраздан бері көрініс тапқаны жасырын емес. Фашистік идеяны ашық ұстанып жүрген скинхедтік ұйымдар қазір бұл елде кең тараған. Оларға еркіндік берілетініне таңданасың. Сондай-ақ соңғы кезде ұлтшыл-патриоттық ұйымдар мен қозғалыстардың әрекеттері де экстремистік сипат алып бара жатқаны жұртты таңдандырып қана қоймай, шошындыра бастады. Ресей билігінің белсенді қолдаушысы, чешен көсемі Рамазан Қадыровтың: «Мен қазіргі саясатты түсінбеймін: балаларды ұстаймыз, ал оларды көшеге алып шыққандарға ешкім тиіспейді, – деп күйінуін де түсінуге болады. – Бұл қалай? Мәскеу ішкі істер басқармасының бастығы бетін маскамен жауып алғандармен әңгімелеседі. Олар Чешенстанда болса, оларға қарсы танкіден, гаубицадан оқ атар едік. Ал біз олармен әңгімелесеміз...».
Ұлтаралық, ұлысаралық қатынас өте нәзік. Ол назардан бір сәт тыс қалса, салдары да қиын. Неміс фашизмін айтпағанда, күні кеше Югославияның негізгі ұлтымын деп, басқаларға өктемдік білдірген сербтер ақырында бір аймағы – Косоводан да айырылып тынды.
Тарихтың сабағын жұрттың бәрі ескергені жөн.
Мамадияр ЖАҚЫП.