СІМ Иранға қарсы санкциялардың алынуына байланысты мәлімдеме жасады

АСТАНА. 17 қаңтар. Қазақстан Республикасы Сыртқы істер министрлігінің Иранның ядролық бағдарламасы бойынша Жан-жақты қамтылған бірлескен іс-қимылдар жоспарының (ЖБІЖ) орындалуының басталуына қатысты мәлімдеме жасады. Бұл туралы министрліктің баспасөз қызметіне сілтеме жасаған egemen.kz тілшісі хабарлады. «Қазақстан Республикасы Иран Ислам Республикасының Жан-жақты қамтылған бірлескен іс-қимылдар жоспарына сәйкес барлық міндеттерін орнындалуын құптайды», – делінген мәлімдемеде. Сонымен қатар: «ЖБІЖ орындалуы және осыған орай БҰҰ-ның Иранға қарсы санкцияларын алып тастауы халықаралық қатынастарда жаңа кезеңнің басталуын белгілеп, қауіпсіз әлемді құру жолындағы аса маңызды сындарлы қадам болып табылады және саяси ерік бар жерде сабырлы келіссөздер мен дипломатиялық консультациялар ең күрделі деген жаһандық, сондай-ақ, өңірлік мәселелерді шешудің бірден бір дұрыс әрі тиімді амалы екенін дәлелдейді», – делінген. Одан бөлек, Қазақстанның ядролық қаруды таратпау тәртібін нығайтуға өз үлесін әрдайым қосып тұруға дайын екені мәлімделген. Еламан Қоңыр. Дерек, сурет: Сыртқы істер министрлігінің баспасөз қызметі.