Маңғыстауда жол бойынан сәбидің өлі денесі табылды

АҚТАУ. 18 қаңтар. Маңғыстауда жол бойынан сәби денесі табылды. Бұл туралы tumba.kz сайтына сілтеме жасаған egemen.kz тілшісі хабарлады. 17 қаңтар күні сағат 17:00 шамасында Бейнеу ауданы Сарға ауылының тұрғындары қой бағып жүріп, Атырау-Ақтау республикалық маңызы бар автокөлік жолы бойынан, аталған ауылдан 900 метр қашықтықтағы қоқыстар шетінде жатқан аузы жабық картон қорапты көздері шалады. Буылып-түйілген қорапты ашып қараса, ішінен сәбидің өлі денесі табылған. Куәгерлердің айтуынша, баланың аузына әйел адамның капрон колготкиі тығылған және маңында әйел адамның киімдері болған. Тұрғындар оқыс оқиға туралы дереу құқық қорғау орындарына хабарлап, полицейлер сәбидің денесін мәйітханаға жөнелтті. Сонымен қатар, нәресте қыз бала денесіне дәрігерлік сараптама жасалып, оның анасы анықталды. Ол 1978 жылы туылған әйел болып шықты. Келіншек баланың өлі туылғандығын айтып берген. Қазіргі таңда тергеушілер істің мән-жайын анықтауда. Гүлайым Шынтемірқызы. Дерек: tumba.kz. Сурет: informing.ru.