Шығармашыл жастар фестивалі ашылды

Астанадағы Бейбітшілік және келісім сарайында XIX «Шабыт» халықаралық шығармашыл жастар фестивалінің ашылуы өтті. Шараға Астана қаласы әкімінің орынбасары Ермек Аманшаев қатысты. – «Шабыт» фестивалі елордамызбен, елімізбен бірге дамып, өсіп келеді. Бұл шараға еліміз­дің түкпір-түкпірінен көп­теген жас дарындар жиналады. «Шабыт» ұлы өнер әлеміне жол ашады. Қаламызда ерекше шығармашылық атмосфера орнайды, Мемлекет басшысының зор қолдауының арқасында фес­тиваль аясында өнерпаздарымыз елордамыздың ең үздік сахналарында өнер көрсетеді, – деп атап өтті Е.Аманшаев фестивальдің салтанатты ашылуында. Концерттің шымылдығын «Шабыт-2015-тің» жеңімпазы, Қазақ­стан Республикасы Прези­денті кубогының иегері, «Классикалық музыка, скрипка» Гран-приінің иегері Мақсат Жүсіпов, сондай-ақ «Шабыт-2010-ның» жеңімпазы Айбек Аширматов ашты. Сонымен қатар, қазақстандық эстрада өнер­паздары Гүлнұр Оразымбетова, Әли Оқапов, Қайрат Баекенов және «Формат» тобы өнер көрсетті. Бұл өнерпаздар да өнердегі жолдарын «Шабыт» фестивалінен бастаған болатын. Фестивальдің алдыңғы қатысушыларының жетіс­тіктері биылғы байқауға қатысуға ниет білдірген жастарды жігерлендіреді. Биылғы байқауда қазылар алқасы 644 жас дарынның өнерін сарапқа салуда. «Шабыт» фестивалі алты аталым бойынша өтеді: «Бей­нелеу өнері», «Хореография», «Ха­лық музыкасы», «Үздік әдеби шы­ғарма», «Классикалық музыка» және «Эстрадалық вокал». Үміт­керлердің көбі «Бейнелеу өне­рінде» бағын сынамақ, бұл аталымға  192 өтініш түсіпті. Ал «Хореография» аталымына  –  154, «Халық музыкасы» – 134, «Үздік әдеби шығарма» аталымына –  45, «Классикалық музыка»  аталымына – 77, «Эстрадалық вокал»  42 өтініш қабылданған. Қазылар алқасының құрамына әлемнің 15 мемлекетінен, соның ішінде АҚШ, Италия, Израиль, Маке­дония, Мексика, Армения, Қытай, Түркия, Татарстан, Қыр­ғыз­стан, Украина, Грузия, Моңғо­лия елдерінен беделді сын­шы-өнертанушылар енді. XIX «Шабыт» халықаралық шығармашыл жастар фестивалі 8 қарашаға дейін жалғасады. Осы ретте Астанадағы Қазақ ұлт­тық өнер университетінде «Клас­сикалық музыка» және «Ха­лық музыкасы» аталымдарында тыңдаулар өтеді, «Эстрадалық вокал» аталымындағы конкурсанттар Конгресс-холда өнер көрсетеді, сондай-ақ, «Хореография» аталымы бойынша би ұжымдары «Жастар» театрында, «Бейнелеу өнері» аталымы бойынша жұ­мыстар көрмесі «Жастар» сарайында көрсетіледі. Ал кеше кешкісін «Үздік әдеби шығарма» аталымы бойынша жас ақындардың есімі анықталды. Со­нымен, Бас жүлдені астаналық ақын Ербол Алшынбай иеленді. 1-орын маңғыстаулық Асылбек Жаңбырбайға, 2-орын астаналық Айдана Сегізбаеваға, 3-орын се­мейлік Медет Божанға бұйырды. Динара БІТІКОВА, «Егемен Қазақстан»