Парламент Сенатының Төрағасы Қасым-Жомарт Тоқаев Словакия Сыртқы және Еуропа істері министрі Мирослав Лайчакпен кездесті, деп хабарлады Сенаттың баспасөз қызметі.
Төраға Қазақстанның ірі сауда-экономикалық және инвестициялық әріптесі болып табылатын Братиславаның Еуропалық одақтағы төрағалығына жоғары баға берді. Төраға Словакияның Ұлттық кеңесі Қазақстан мен Еуропалық одақ арасындағы Кеңейтілген әріптестік және ынтымақтастық туралы келісімді ратификациялаған алғашқы еуропалық парламенттердің бірі болғанын ризашылықпен атап өтті.
Қ.Тоқаев мейманды Қазақстан Парламентінің қызметімен таныстырып, Президент Нұрсұлтан Назарбаевтың «100 қадам» Ұлт жоспарында нақтыланған Бес институттық реформаны заңнамалық тұрғыда қамтамасыз ету туралы айтты.
Тараптар екіжақты парламентаралық байланыстарды дамытудың келешегін талқылай келіп, оның екіжақты ынтымақтастық аясындағы маңызына тоқталды.
Сенат Төрағасы 2017-2018 жылдардағы БҰҰ Қауіпсіздік Кеңесіне тұрақты емес мүше болу жөніндегі Қазақстанның бастамасына Братиславаның қолдауына сенім артатынын да айтты. «Бейбітшілік пен қауіпсіздікке қолдау білдіру, превентивтік дипломатия, қақтығыстарды реттеу мен бітімгершілік, көші-қон, қоршаған орта – біздің басымдықтар болып табылады. Біз ядролық, энергетикалық, су және азық-түлік қауіпсіздігі мәселелерін шешу жөнінде де жұмыс атқаратын боламыз», – деді Қ. Тоқаев.