Жақында Қазақстан Республикасы Тәуелсіздігінің 25 жылдығы шеңберінде Қазақстанның Мексикадағы елшілігінің қолдауымен Толука қаласындағы (Мехико штаты, Мексика) «Felipe Villanueva» концерт залында Айман Мұсақожаеваның атақты мексикалық дирижер Энрике Батистің (Enrique Bátiz) басшылығында Мехико штатының Симфониялық оркестрімен бірлескен гала-концерті болып өтті.
Әлемдік деңгейдегі қазақстандық скрипкашының концертін тамашалауға Мехико штаты басшылығының, жергілікті парламенттің және зиялы қауымның өкілдері келді. Мексика жұртшылығы А. Мұсақожаеваның орындауында әлемдік классиканың жауһарлары – Иоганнес Брамстың Скрипка үшін ре-мажор концертін, 77-шығармасын, сондай-ақ, Нұрғиса Тілендиевтің «Аққуын» тыңдап, зор рухани ләззат алды.
Мехико штатының тұрғындары қазақстандық өнермен алғаш рет танысқанын және сахна сыртындағы сұхбаттарда болашақта осындай кездесулер болып тұратынына үміттерін білдіргендерін атап өту қажет.
А.Мұсақожаеваның осындай концерті, сондай-ақ, Икстапан де ла Саль қаласында (Мехико штаты) да өтті.
«Егемен-ақпарат»