Астанадан қуанышты хабар жетті. Елордамыздың биыл дүниеге келген 25 мыңыншы сәбиі Көкшетаудағы әріптесіміз, телерадио журналистикасының ардагері Жанмұрат Жанайдаровтың немересі болып шықты. «Бауы берік болсынды» біздің бірінші болып айтуымыздың жөні бар еді. Жанмұрат біздің курстасымыз, «Қазгидромет» РМК филиалының инженер-химигі Раямен де Алматыда қатарлас оқығанбыз.
Жәкеңнің пәтеріне кіргенімізде иін тірескен туыстары мен көршілерінің қуанышты құшағына еніп кеткендей болдық. Баршамыз құтты болсын айтып, сүйіншілетіп жатырмыз. Бұл оқиғаны Қазақстан Тәуелсіздігінің 25 жылдығымен байланыстырудың да жөні келіп тұр.
Сәбидің әкесі Медет пен анасы Әсем төртінші ұлды болып, көп балалы отбасы атанып отыр. Оларды Астана қаласы денсаулық сақтау басқармасының өкілдері перинаталды орталыққа арнайы келіп, қала әкімінің атынан құттықтап, сый-сауғасын тапсырды. Біз де мерекелі жылдың қуанышы көбейе бергей деген тілектеміз.
Бақберген АМАЛБЕК,
«Егемен Қазақстан»
Көкшетау
Суретте: тоғыз немерелі болып отырған Жанайдаровтар отбасы