Қазақстан Президенті Нұрсұлтан Назарбаевтың Күншығыс еліне ресми сапары Токиодан басталып, Хиросимада жалғасты.
Мұндағы жергілікті тұрғындар саны 1,1 млн-нан сәл ғана асады. Жапонның ірі Хонсю аралының батысында орналасқан бұл қала - Хиросима префектурасының әкімшілік орталығы.
1980 жылдан бастап Хиросима Жапонияның мемлекеттік маңызға ие қалаларының тізіміне енді. 1945 жылы атом бомбасы тасталған әлемдегі ең бірінші қала ретінде белгілі.
Дәл сол жылдың 6 тамызында жергілікті уақыт бойынша таңғы сағат 08:15-те бірінші атом бомбасы тасталады. Жалпы, Хиросимаға тасталған ядролық қарулардың қуатының алапат болғаны соншалық, ол қаланың 90 пайызын жермен-жексен етеді.
Хиросима – 8 жаңа және ескі ауданға бөлінеді. Қазіргі таңда қала экономикасының шамамен 70-80 пайызын екінші және үшінші деңгейлі кәсіпорындар көтеріп тұр. Қалада жапонның «Мазда Мотор» корпорациясының негізгі зауыттарының штаб-пәтері орналасқан. Олардан түскен қаржы қаланың ішкі жалпы өнімінің 30-дан астам пайызын құрайды. Жалпы, Хиросима өңірінің ішкі жалпы өнімі 60 млрд АҚШ долларын құрайды.
Хиросима - Тюгоку-Сикоку өңірінің өндіріс орталығы. Портты қала мәртебесіне ие. 1993 жылы мұнда Халықаралық әуежай салынған. Қазір ол жүктерді тасымалдау үшін пайдаланылады.
Қала мэрі тұрғындардың тікелей сайлауымен 4 жылда бір рет сайланады. 2011 жылдың сәуірінен бастап, бұл лауазымда – Казуми Мацуи.
Ләйла ЕДІЛҚЫЗЫ
"Егемен Қазақстан"
Хиросима