Көненің көзіндей жәдігерлерге көп ретте мән бере қоймаймыз. Айталық, Қарқаралы қаласында патша заманында жасалған сейфтер бар. Олардың үшеуі қалалық мұражайда тұрса, тағы біреуін жергілікті қазынашылық бөлімі әлі күнге пайдаланып келеді.
Қарқаралы аудандық қазынашылық бөлімінің басшысы Мұрат Тойынбековтің айтуынша, заманында ақ патшаның арнайы жарлығымен, Қарқаралыда атақты Қоянды жәрмеңкесі үшін қазынашылық ғимараты салынған. Бұл сейфтер алғаш сонда тұрған. Оларда, сол уақыттың бағамымен, дүниенің ақшасы сақталған деседі. Бір ғана 1858 жылы сейфтерде 5 миллион рубль жиналыпты. Кереметі сол, арада бір жарым ғасырдай уақыт өтсе де, темір жәшіктер сынын бере қоймаған.
Аудандық қазынашылық бөлімінде қалған сейф әу баста қабырғаға бекітіліпті. Онда қазір құжаттар сақталады. Басқалары мұражайға өткізілген. Олардың біреуі Мәскеуде жасалса, екеуі Санкт-Петербургте болған атақты Карл Сан-Галли зауытында соғылған екен.
Әр сейфтің жеке қорғаныс жүйесі, құпия кілті бар. Мұражай қызметкерлері тарихи темір жәшіктерді көрнекті орынға жайғастырып, келушілер үшін қызықты бір жәдігерге айналдырған.
Қарағанды облысы,
Қарқаралы қаласы
Қайрат ӘБІЛДИНОВ,
«Егемен Қазақстан»