ЕурАзЭҚ стратегиялық зерттеулер институтының директоры, Ресей жаратылыстану ғылым академиясының академигі, экономика ғылымдарының докторы Анатолий Спицынның дәрісін Манаш Қозыбаев атындағы Солтүстік Қазақстан мемлекеттік университетінің студенттері мен профессорлық-оқытушылар құрамы үлкен ынтамен тыңдады.
Елбасы Н.Назарбаевтың ішкі-сыртқы саясаты жайлы үзбей жазып келе жатқан ғалым бұл жолы өз тыңдаушыларына «Дүниежүзілік экономикалық жаһанданудағы Еуразиялық интеграция, Қазақстан Республикасы Президентінің стратегиялық жаңа бастамалары» деген тақырып аясында мол мағлұматтар ұсынып, жан-жақты әңгімелеп берді. Академик өз лекциясына саясаттағы, экономикадағы өзекті мәселелерді арқау ете отырып, халықаралық қоғамдастықтағы Қазақстанның орны мен рөлін, беделін ерекше бөліп айтты.
Экономикалық саясатын жаһандану үрдісіне, уақыт ағымына сәйкестендіре жүргізген мемлекет кез келген қиындықты еңсере алады. Қазақстан – сондай елдердің бірі. Оның үздіксіз дамуды көздейтін стратегиялық батыл бастамалары мен тың ізденістері өзгелер тарапынан үнемі қолдау тауып келеді, – дей келіп, ғалым интеграциялық проблемаларды шешудегі Еуразиялық экономикалық одақтың мән-маңызын атап өтті.
Саналы ғұмырын ғылымға арнаған Анатолий Спицын 150-ге жуық монографияның авторы. Оның өз әріптестерімен бірігіп жазған «Нұрсұлтан Назарбаев – көреген стратег, саясаткер, көшбасшы» деген еңбегі Мәскеуде басылып шыққан.
Өмір ЕСҚАЛИ,
«Егемен Қазақстан»
Солтүстік Қазақстан облысы