Жақында ЭКСПО-2017 халықаралық көрмесінің комиссары Рәпіл Жошыбаев арнайы сапармен Болгария Республикасында болды, деп хабарлады ЭКСПО-2017 халықаралық көрмесінің баспасөз қызметі.
Комиссар Парламенттің Болгария мен Қазақстан Достық тобының төрайымы Даниела Дариткова-Продоновамен және түрлі фракцияның депутаттарымен, Энергетика министрі Теменужка Петковамен, Сыртқы істер вице-министрі Валентин Порязовпен, Туризм вице-министрі Ирена Георгиевамен, сондай-ақ Болгария Сауда-өнеркәсіп палатасының төрағасы Цветан Симеоновпен кездесті.
Депутаттармен кездесуі барысында Р.Жошыбаев Болгария тарапына Қазақстанның бастамаларына көрсеткен қолдауы үшін ризашылық білдіріп, болгарлық депутаттарды ЭКСПО-2017-ге келіп қайтуға шақырды. Болгария мен Қазақстан Достық тобының төрайымы Даниела Дариткова-Продонова көрмеге дайындық барысында парламентаралық қарым-қатынасты дамытуда оң серпін бар екенін атап өтті.
Болгария Энергетика министрімен кездесуі кезінде Р.Жошыбаев Қазақстанның «жасыл» энергетика саласындағы бастамалары туралы егжей-тегжейлі әңгімелеп, көрменің «Болашақтың энергиясы» тақырыбын жан-жақты ашып берді. Өз кезегінде Теменужка Петкова – Болгарияның ЭКСПО-2017 жөніндегі ұлттық үйлестірушісі өз елінің «жасыл» энергетика саласында Еуропалық одақта көшбасшы елдердің бірі болып табылатынын атап көрсетті. Өйткені, бұл ел 2015 жылдың өзінде-ақ жалпы энергия балансында қайталама қуат көздерінің үлесін 20 пайызға жеткізіп үлгерген. Петкова ханым Болгария компанияларының көрмеге энергетика саласы бойынша қатысуға дайын екендігін хабарлады.
Болгария сыртқы саясат ведомствосында болған кездесу кезінде екіжақты қарым-қатынастың ағымдағы жағдайы мен перспективалары талқыланды. Р.Жошыбаев Болгария тарапын Қазақстанның 2017-2018 жылдарға БҰҰ Қауіпсіздік Кеңесінің тұрақты емес мүшелігіне кандидатурасын қолдағаны үшін ризашылығын білдіріп, ЭКСПО-2017-ге қатысуы екіжақты ынтымақтастықты нығайтуға оң ықпал ететінін атап көрсетті. Өз кезегінде вице-министр В.Порязов көрме Қазақстанның БҰҰ-ның орнықты энергетика жөніндегі бастамаларын жүзеге асыруға қосылатын сүбелі үлес болатынына сенім білдірді.
Болгария Туризм министрлігінде туризм, болгариялық туристік операторларды Астанадағы көрме шеңберінде тәжірибе алмасу және ынтымақтастыққа шақыру мүмкіндігі қарастырылып, екі ел астаналары арасында тікелей авиабайланыс орнату ықтималдығы сөз болды.
Болгария Сауда-өнеркәсіп палатасының төрағасы Ц.Симеоновпен кездесу кезінде екі елдің іскер топтары арасында «жасыл» энергетика және туризм салаларындағы ынтымақтастық мәселелері талқыланды. Симеонов мырза Болгарияның бейінді компанияларының ЭКСПО-2017-ге кең көлемде қатысуы үшін қолында бар мүмкіндікті жұмсайтынына сендірді.