Қазақстанда медициналық мекемелерді аккредиттеу науқаны басталды. Шара Денсаулық сақтау және әлеуметтік даму министрінің бұйрығына сәйкес жүзеге асырылады.
Биылғы жылы бұл ерікті шараға қатысуға 180 медициналық мекеме ниет білдірді. Шараға бастапқы көмек көрсететін қалалық, аудандық, ауылдық амбулаторлық-стационарлық мекемелер бар. Еліміздің бүкіл өңірлері бойынша медициналық мекемелердің қызмет сапасын анықтауға 34 сарапшы тобы атсалысады. Олардың ішінде Денсаулық сақтау және әлеуметтік даму министрлігінің өкілдері, Денсаулық сақтауды дамыту республикалық орталығының мамандары, арнайы дайындықтан өткен медициналық мамандар бар. Сонымен қатар, аккредиттеуге бақылаушы ретінде еліміздің Ұлттық денсаулық сақтау палатасының, қоғамдық ұйымдардың, саяси партиялардың өкілдері тартылған.
Аккрредиттеу барысында мекеменің жұмысы кешенді бағалаудан өтеді. Соның ішінде оның материалдық-техникалық базасы, қауіпсіздігі, көрсетіп отырған қызметінің сапасы ескеріледі. Аккрредиттеу қорытындысы ұжымға өздерінің кемшін тұстарын ескеріп, оларды өз бетінше түзеуге мүмкіндік береді. Аккредиттеу мерзімі үш жылға жарамды. Бағалау қорытындысы бойынша мекемелерге үш санат бойынша аккредиттеу сертификаты беріледі. Аккредиттеуден сәтті өткен мекемелерге мемлекеттік тапсырыс орналастыру кезінде басымдық беріледі. Науқастар емделетін мекемені таңдау барысында оның аккредиттеуден өткен-өтпегенін ескеру арқылы қызмет сапасын бағалай алады.
Қазақстанның ұлттық аккредиттеу стандарттары халықаралық стандарттарға сай жасалған. Естеріңізге сала кетейік, былтырғы аккредиттеу науқанына 241 медициналық мекеме қатысып, олардың 142-сі- екінші, 84-і – бірінші, алтауы жоғары аккредиттеу санатын алып, 9 мекеме аккредиттеуден өте алмай қалды.
Гауһар БИСАРИНА,
ДСӘДМ баспасөз қызметінің
бас маманы