Мәжілісте 18 қараша күні «Қазақстан Республикасының қылмыстық, қылмыстық-процестік және қылмыстық-атқару заңнамасын одан әрі жаңғырту» тақырыбында парламенттік тыңдау өтеді, деп хабарлады осы палатаның баспасөз қызметі.
Бұл іс-шараның басты мақсаты – қылмыстық әділет саласындағы кодекстерді қолдану жағдайына талдау жасау, осы заңнамалық актілердегі коллизиялар мен олқылықтарды анықтау және «100 нақты қадам» Ұлт жоспарының «Заң үстемдігін қамтамасыз ету» институттық реформа талаптарының аясында одан әрі дамуы жолдарын белгілеу.
Парламент өкілдерімен қатар, тыңдауға Конституциялық кеңес, Бас прокуратура, ҰҚК, Мемлекеттік қызмет істері және сыбайлас жемқорлыққа қарсы іс қимыл агенттігі, Ішкі істер, Әділет, Қаржы министрліктерінің өкілдері қатысады деп жоспарлануда.
Сонымен бірге, саяси партиялар мүшелері, Республикалық адвокаттар алқасы, Жеке сот орындаушылардың республикалық палатасы, мемлекеттік емес ұйымдар, ғылыми қауымдастық пен халықаралық сарапшылар шақырылған.
Парламенттік тыңдау қорытындысы бойынша тиісті ұсынымдар қабылданады.