Жақында Ақтау қаласында салмағы 6 килограмм 100 грамм қыз бала дүниеге келді. Елімізде 5 кг-нан жоғары салмақпен туған нәресте алып саналады десек, бұл Маңғыстау облыстық перинаталдық орталығында соңғы бес жылда қайталанып тұр екен.
Алып сәбидің анасы – Ақтаудың іргесіндегі Мұнайлы ауданының 37 жастағы тұрғыны. Бұған дейін үш ұл мен екі қыз өсіріп отырған отбасының бұл – алтыншы перзенті. Атап айтар жайт, олардың алдыңғы балалары да түгелдей ауыр салмақпен туған және келіншек барлығын да табиғи жолмен өмірге әкелген.
Маңғыстау облыстық перинаталдық орталық директорының орынбасары Р.Баданованың айтуынша, бұл отбасындағы балалардың үлкені 3 кг 900 гр, екіншісі 4 кг 300 гр салмақта болған. Үшінші сәбидің туғандағы салмағы 4 кг 900 гр болса, төртіншісі 5 кг 900 гр екен. Қазіргі таңда сәбидің анасының да, өзінің де жағдайы жақсы.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы