Жапон зілзаласындағы құрбандар саны 10 мың адамнан асқаны мәлім болды. Қазіргі кездегі басты мәселе «Фукусимо-1» АЭС-інің зардабын залалсыздандыру болып отыр. Осы АЭС-тің қожайындары – ТЕРСО фирмасының иелері өз күштері жетпегендіктен, кеше апат зардабын жоюға Франция мамандарынан көмек сұраған.
Бұрын жапондар апатты өз күштерімен залалсыздандырамыз деп мәлімдеген болатын. Осыған орай жапон бизнесінен көмек сұралған еді. Бірақ, апаттың аумағы өз күштерімен игеруге жетпей қалған сыңайлы. Көмек қолын ұсыну АҚШ мамандарынан да өтініліп отыр. Ал ТЕРСО-ның басшысы 66 жастағы М.Шимидзу отставкаға кететін көрінеді. Бүгінгі күнге дейін фирмаға келген шығын 29 млрд. АҚШ долларына жеткені анықталған.
Ал кеше Жапонияда күші 6,5 баллдық тағы бір жер сілкінісі тіркелді.
ҚАНША ҰМТЫЛСА ДА КҮШТЕРІ КЕЛМЕУДЕ
Ливиядағы М.Каддафиге қарсы халықаралық операцияларды басқару құрылымдарын жасақтау 29 наурызда, яғни бүгін аяқталатыны белгілі болды. Осы күні Лондонда министрлер деңгейіндегі халықаралық конференция өтіп, операциялардың саяси директивалары әзірленетін көрінеді, дейді ИТАР-ТАСС.
Бірақ кешегі күні Ливиядағы соғыс әлі аяқталған жоқ болатын. М.Каддафидің туған қаласы Сиртке коалицияның көмегімен шабуыл жасаған оппозициялық күштердің әрекеті жолдан тоқтатылып, өкімет күштерінің тегеурініне шыдамай кері шегінуге мәжбүр болған. Ал оппозиция бұл қаланы алғаны жөнінде алдын-ала мәлімдеме жасап та үлгерген еді.
ЖЫҒЫЛҒАНҒА – ЖҰДЫРЫҚ ДЕГЕН ОСЫ
Кеше Йеменнің оңтүстігінде қару жасайтын зауыттардың бірінде қатты жарылыс болды. Соның зардабынан 34 адам көз жұмып, ондаған адам ауыр жараланған.
Өкімет өкілдерінің айтуына қарағанда, жарылыс қасақана өрт қоюдың салдарынан болған. Осы зауытқа жексенбі күні ғана исламист-жанкештілер шабуыл жасаған екен. Соған қарағанда, оппозиция үшін бұл зауыттың маңызы зор секілді. Сөйтіп, жығылғанға – жұдырық дегендей, төңкерісшілердің шабуылын баса алмай жатқан елге енді зауыт жарылысының зардаптарын жою мәселесі үлкен сыбаға тартып отыр.
ӨЗГЕ ЕЛДІҢ САЯСАТЫНА ӨКТЕМДІК ЖАСАМАҚ
Израиль Аргентинаның Иранмен қатынасымызды жақсартамыз деген мәлімдемесіне қатты шүйлігіп отыр. Өйткені, Буэнос-Айресте 1994 еврей қауымдастығында қатты жарылыс болып 85 адам, ал соның алдында, екі жыл бұрын дәл осы елдегі еврей елшілігінде жарылыс болып 29 адам қаза болған еді.
Израиль мен АҚШ бұл жарылысты Иран ат-тонын ала қашса да сол ел жанкештілерінің қолынан келген іс деп бағалаған. Осыны алға тартқан Израиль Аргентинаның Иранмен сауда байланысын жақсартамыз деген саясатын қатты сынға алып, бұл іс қаза болған жазықсыз жандардың рухын қорлағандық деп жариялады және Аргентина өкіметінен өз қадамдарына жауап беруін талап етуде. Егер бұл іске оңтайлы жауап болмаса, келесі аптаға жоспарланған Аргентина Сыртқы істер министрі Х.Тимерманның Израильге сапары кейінге қалдырылады, делінген мәлімдемеде.
ШҰЖЫҚ СОҒЫСЫ БАСТАЛЫП ЖАТЫР
Еуропаның ортасындағы жақсы дамыған, тыныш елдердің бірі Бельгияда да этносаралық кикілжіңдер қойылмай келеді. Осыған қарағанда, «марксистердің» кикілжің атаулының түп төркіні тек әлеуметтік қамтамасыз етудің әлсіздігінде деген тұжырымының қате екенін көрсетеді.
Бұл ел парламенттік сайлаудың өткеніне тоғыз айдан асса да, әлі күнге өкіметтік коалиция құра алмай келеді. Сөйтіп, 17 ақпанда-ақ биліксіз елдің рекордын жасаған. Ендігі айғай шұжықтың төңірегінен шықты. Француз тілінде сөйлейтін Валлон аймағы «арден шұжығының» атауына географиялық арнайы мәртебе беруді талап еткен. Бұл нидерланд тілінде сөйлейтін Фландри аймағының тұрғындарының ашу-ызасын туғызып отыр. Өйткені, мұндай шұжықты олар да ежелден шығарып келе жатқан.
КОММУНИЗМ МЕН ФАШИЗМ ТЕҢ ДЕЙДІ
Эстонияда «коммунизм мен фашизм тең» деген тақырыпқа эссе жазуға арнайы конкурс жарияланды. Бұл конкурс авторитарлық режімдердің қылмыстарын әшкерелеуді мақсат етеді, дейді ұйымдастырушылар.
Конкурсқа негізінен гимназия оқушылары мен студенттер ғана қатыса алатын болыпты. Жеңімпаз болған екі авторға Брюссельге туристік сапармен барудың шығыны төленбекші. Эстония билігі КСРО құрамына күшпен енгізіліп, одақтас республиканың бірі болған жылдарды ресми түрде оккупация жылдары деп бағалаған. Бұл елде 2003 жылдан бері «Кеңес өкіметінің басқыншылығы жылдарында» деп аталатын, 1940-1991 жылдарға арналған арнайы музей де бар.
ОРЫС ТІЛІН ЖАҚТАУШЫЛАР ОПЫНЫСЫ
Украина парламентіндегі орыс тілінің жанашырлары Александр Ефремов пен Петр Симоненко деген компартиядан сайланған депутаттар «Тілдер туралы» атты заң жобасын тіркеткен болатын. Бұл заң жобасының негізгі мақсаты орыс тіліне де украин тілімен бірдей етіп, ресми мәртебе беруді жақтау болатын.
Осы жобаның дұрыстығы Жоғарғы Радада ұзақ дау тудырып, ақыры қарсыластар Еуроодақтың Венеция комиссиясының төрелігіне жүгінген болатын. Елде де ол біраз шу тудырып, мыңдаған адам оған қарсылық білдіру акциясына қатысқан еді. Жуырда Еуропа комиссиясы заң жобасының Украина конституциясына қайшы екенін дәлелдеп берді. Сөйтіп, өзге ел тіліне артықшылық бергісі келгендер опынып қалды.
Интернет материалдары негізінде әзірленді.