Эмма Шейдлер, волонтер: Универсиада экономикалық тұрғыдан да тиімді

[caption id="attachment_93764" align="aligncenter" width="560"] Version 2[/caption] «Менің есімім Эмма Шейдлер», – деді 18 жастағы неміс қызы. Ол өткен жылы мектепті аяқтап, «Іс-шара менеджменті» мамандығын оқу үшін Шотландияның Эдинбург қаласына көшіп барыпты. Эмма – Алматыда өтетін қысқы Универсиадаға келетін еріктілердің бірі. Ол Қазақстанға келуге, Универсиада секілді халықаралық жарыстарға ат салысуға құштар екенін айтады.  – Ағылшындар спортты өмірінің бір бөлшегі ретінде қарайды ғой. Жалпы ол елдегі Универсиаданың деңгейі қандай? – Бір қызығы, кәсіби спортпен айналыспайтындардың, қара­пайым халықтың көп бөлігі Универсиада туралы есті­меген екен. Олимпиада мен «Дос­тас­тық ойындарынан» кейінгі дүбірлі дода туралы Ұлыбри­тания­дағы ақпараттың аздығы мені таңғалдырды. Доста­рыма Қазақстанға қысқы Уни­вер­сиа­даға ерікті болып бараты­ным­­ды айтқанымда, олар қандай жарыс екенінен бейхабар-тұғын. Әрқайсысына жеке-жеке түсін­діруге тура келді. Меніңше, Бри­тан үкіметі студент спорт­шы­­ларды жеткілікті қолдамай­тын секілді. Себебі, студенттер ара­­сын­дағы әлем чемпионаты мен Ун­и­версиада Тұманды Альбион­да аса танымал емес. – «Достастық ойындары» Ұлыбританияда жиі өткізіледі. Халықтың оған деген көз­қарасы қалай? – Қазір мен тұрып жатқан Шот­ландия «Достастық ойын­дарын» өткізген-ді. Сондықтан елдің бәрі аталған байрақты бәсекеден хабардар әрі сол арқылы спортқа деген қызығушылығы оянады. Шотландия үшін «Достастық ойындарын» өткізу үлкен абырой болды. – Шотландияда волонтерлар қатары көп пе? Жалпы, халық кез келген шараға ерікті болуға қалай қарайды? – Көптеген әуесқой жаттық­тырушылар ақша төленбегеніне қарамастан ерікті болуға құмар. Олар спортты жан-тәнімен сүйе­ді. Әсіресе, жас балалар ері­к­ті болу арқылы клубтарға жазы­лып, спортпен айналыса бастайды. Соның нәтижесінде, болашақ спортшылар әзірленеді. Лондон Олимпиадасынан кейін Ұлыбританияда спорттық додаларда ерікті болуға ынта­лы­лар саны өсті. Себебі, олар байрақты бәсекенің атмо­сфе­ра­сын жақсы сезінді. Келер жылы Лондонда жеңіл атлетикадан әлем чемпионаты өтеді. Лондон Олимпиадасына волонтер бол­ған­дардың көбі сондай додаға қайта қатысуға талпынып отыр. – Медиа саласының спорт­қа, сондай-ақ, дене шынық­тыруға әсері қандай? – Меніңше, бұқаралық ақпарат құралдарының спортпен айналысуға үгіттеуде үлесі зор. Менің достарымның көбі – Ұлы­британияда туып, осында өскендер. Олардың бәрі біраз уақыт футбол ойнаған. Футбол туралы ақпараттың БАҚ-та көп болуы осыған жақсы әсер етті деп айта аламын. – Алматыға келуге не әсер етті? – Универсиада секілді бай­рақ­ты бәсекеге қатысу – өте үлкен тәжірибе. Көптеген елден келген адамдармен араласып, ой бөлісу өте қызық. Сондай-ақ, Универсиадаға волонтер болу менің сабағым үшін де пайдалы әрі іс-шаралар индустриясында тәжірибе жинауға көмектеседі. – Қазақстан туралы бұрын білетін бе едіңіз? – Өкінішке қарай, Қазақстан туралы білетінім аз. Алайда ерікті болуға қабылданған соң, ел туралы ақпарат іздей баста­дым. Қазақстанды өте суық деп естідім. Бұл мен үшін жаңа белес болайын деп тұр. Әзір­ге қазақ мәдениеті туралы аз біле­мін, әйтсе де, Қазақстанға бар­ған­да жан-жақты танысамын деп ойлаймын. Универсиада секілді халық­ара­лық жарыстар өткізуші елге бүкіл назарды аудартып, көп­теген туристердің келуіне ықпал етеді. Бұл сол елге эко­но­мика­лық тұрғыдан өте тиім­ді. Әрі халықтың да бірігуін, ынты­мақ­тас­тығын арттырып, елімен мақтануына себеп болады. – Әңгімеңізге рахмет. Әңгімелескен Абай Асанкелдіұлы