Әділет министрлігінің Зияткерлік меншік құқығы комитеті, «Ұлттық зияткерлік меншік институты» РМҚК, Білім және ғылым, Индустрия және жаңа технологиялар министрліктерімен бірлесіп, өнертапқыштық саласындағы жетістіктердің 8 республикалық «Шапағат-2011» байқауының жеңімпаздарын анықтады.
Еуразиялық патенттік ұйымының президенті А.Григорьевтің қатысуымен үздік өнертабыстарды марапаттау рәсімінен кейінгі өткен баспасөз мәслихатында түрлі номинациялар бойынша жеңімпаздардың есімдері баршаға мәлім болды.
Осымен 8-ші рет өткізіліп отырған республикалық «Шапағат» конкурсына қатысқан жобалар еліміздің зияткерлік саладағы әлеуетін көрсеткендей. «Бәйгеге әркімнің ақ бар таласы» дегендей, конкурсқа қатысқан жобалардың ішінде өндіріс пен ғылымның әр бағытын дамытуға сүбелі үлес қосатындай жұмыстардың қарасы да мол көрінді. Мысалы, Кристалды кремнийді балқытуға арналған тотықсыздандырғыш «КАРБОНИЗАТ РЕКСИЛ», «Құмы көп мұнайды өндіру тәсілі және оны жүзеге асыруға арналған құрылғы, «Адамның кіндік/кағанақ қанынан және сүйек миынан гемопоэтикалық діңгекті жасушаларды бөліп алу мен өсіру тәсілі» тәрізді атауының өзі күрделі жұмыстар баршылық. Алайда, «Жүйріктен жүйрік озар жарысқанда» дегендей, солардың ішінен 3 өнертабыс «Жылдың өнертабысы» деген жоғары марапатты иеленді. В.Харченко ойлап тапқан аяққа арналған ортопедиялық аппаратқа, жыл басында «Егемен» жазған А.Салғариннің «Автомобильдің жылдам жүрісінің қауіпсіздігін арттыру тәсілі» және В. Двуреченскийдің «Топырақты жыртпай өңдеуге арналған түрені» өнертабыс бәйгесінен қара үзіп келді.
Осылайша үздік зияткерлік ғылыми ізденістердің ішінен ең лайықты дегендері анықталып, өнертабыс иелеріне құрмет көрсетілді.
Анар ТӨЛЕУХАНҚЫЗЫ.