Кеше Павлодар қаласында «Қазақстан-Сібір-2011» халықаралық көрмесі салтанатты түрде ашылды. Екі ел арасындағы экономикалық байланысты жаңа деңгейге көтеру мақсатын көздеген аталмыш шараға облыс әкімі Бақытжан Сағынтаев, ҚР Премьер-Министрінің орынбасары - ҚР Индустрия және жаңа технологиялар министрі Әсет Исекешев, ҚР Парламенті Мәжілісінің депутаты Мейрам Пішембаев, Ресей Федерациясының ҚР-дағы елшілігінің бас кеңесшісі Сергей Анненков және басқа мәртебелі меймандар қатысты. Екі күнге жалғасатын көрмеге көршілес екі мемлекеттің шекаралас аймақтарының үздік тауар өндірушілері атсалысуда. Айта кетерлігі, бұл көрме Қазақстан Тәуелсіздігінің 20 жылдығына орай ұйымдастырылды.
Қазақстан мен Ресейдің арасында сауда-саттық, мәдени байланыстар ертеден қалыптасқаны мәлім. Бұған қос мемлекеттің кезінде бір шекпеннің астында болғаны да тарихи себеп. Десе де, бағзы дәуірден «ауылы аралас, қойы қоралас» келе жатқан көршілердің нарықтық жағдайға байланысты нысанаға алған жаңа міндеттері бар. Ол – еларалық қарым-қатынасты заман талабына сай жаңа биіктікке шығару.
– Қазақстан мен Ресей – стратегиялық әріптестер болып табылады. Екі ел арасында сауда-саттық байланыс жақсы дамып келеді. Мемлекет басшыларының да көздейтіні – осы байланысты одан әрі дамыту. Жуырда осы мәселелерді қос елдің Президенттері Астрахань қаласында өткен шекаралас аймақтардың ынтымақтастығы форумында кеңінен талқылады. Бүгінде Кедендік одақтың іске қосылуы өз нәтижесін көрсетіп, сауда-саттығымызды одан әрі өрістетуге жағдай жасауда, – деді ашылу салтанатында сөз алған Индустрия және жаңа технологиялар министрі Ә.Исекешев.
Облыс әкімі Бақытжан Сағынтаев «Қазақстан-Сібір-2011» халықаралық көрмесіне Ресейдің көршілес аймақтарынан 63 кәсіпорын қатысып отырғанын айтып өтті.
– Бұл көрме осымен алтыншы мәрте ұйымдастырылып отыр. Мемлекетіміз шағын және орта бизнеске қолдау көрсетуге баса мән беруде. Осы көрмеде кәсіпкерлеріміз жаңа әріптестер табады, келісім-шарттарға қол жеткізеді деп сенемін. Бұл көрме сондай-ақ келесі жылы өтетін ауқымды шараға әзірлік кезеңі болып та саналады. 2012 жылы Қазақстан мен Ресейдің шекаралас аймақтарының кезекті форумы Павлодар жерінде өткізіледі, – деді ол.
Ресей Федерациясының біздің елдегі елшілігінің бас кеңесшісі Сергей Анненков көршілес мемлекеттердің өзара қарым-қатынасы жаңа сатыға көтерілетініне, бұл жолда бүгін өткізіліп жатқан көрменің оң ықпалы боларына сенім білдірді. Жалпы, Ресейдің көптеген аймақтары Қазақстанмен шектеседі. Барлығы 27 шекаралық өңір болса, соның 12-сі біздің жермен көршілес келеді. Соның бесеуі Алтай федералдық округіне кіреді. Қонақжай қазақ қашаннан көршісін сыйлайтын берекелі ел. Бас кеңесшінің айтуынша, Ресей әлемдік қаржы дағдарысын Қазақстанмен бірге еңсеріп шығуға мүдделі. Кедендік одақ құрылғалы бері Ресейдің қазақ елімен экономикалық байланысы 25 пайызға артқан. Мәртебелі мейман халықаралық көрме өткізіп, ресейлік бизнес өкілдерін жылы құшақпен қарсы алып отырған Павлодар жеріне ризашылық білдірді. Көрмеге қатысушыларға сәттілік тіледі.
Салтанатты рәсімнен кейін жиналған қауым Астана мұз сарайында орналасқан «Қазақстан-Сібір-2011» көрмесіне қатысушылардың өнімдерін көріп, ұсынатын қызметтерімен танысты. Мұнда Ресейдің Омбы, Томск, Новосібір, Кемеров облыстары, Алтай өлкесінің бизнес өкілдерімен бірге, еліміздің Астана, Алматы қалалары мен Шығыс Қазақстан, Солтүстік Қазақстан, Қарағанды, Ақмола облыстарынан өндірушілер келген. Әрбір компания өздерінің өндіретін заманауи өнімдерін, құрылғыларын, техникаларын, көрсететін қызметтерін егжей-тегжейлі таныстыруда.
Алтай өлкесі ежелден – денсаулыққа шипалы өсімдіктердің отаны болып есептеледі. Бийск қаласының «Бальзам» жабық акционерлік қоғамы дәрілік шөптерден, бал мен майдан әзірленетін табиғи өнімдерін ала келіпті. Сату бөлімінің бастығы Н.Мищенко халықаралық көрмеге қатысу арқылы тұтынушыларын көбейтуді мақсат еткенін айтады. Ресейлік компания біраз уақыттан бері Павлодар жұртына өзінің фито-шай, сироп тәрізді сапалы өнімдерін өткізе бастаған. Бұл ретте жергілікті өкілдік фирмамен әрістестік орнатып алған. «Барлығы да табиғи өнім. Өзіміздің ғылыми-өндірістік кешеніміз бар. Шипалы шөптердің бәрін өзіміз өндіреміз», дейді ол. Сібірдің «Белокуриха» секілді әйгілі шипажай қызметтерін ұсына келген фирмалар да бір төбе. Көршілес елдің өндірушілері, сонымен қатар, құрылыс материалдары, жиһаздар жасау, электр жабдықтарын өндіру тәрізді түрлі салалар бойынша өз жетістіктерін паш етті. Омбылық «Март и Ко» кәсіпорны тек қана металдан құрастырылатын жиһаз түрлерімен таныстырды. Бағасы жағынан арзан болса да, сапасы жоғары. Сібір желім компаниясы ағаш, қағаз материалдарды жапсыратын бұйымдардың сан түрімен қамтамасыз ете алады. Томск қаласының «Магнит М» ашық акционерлік қоғамы болса, энергиямен қамту құрылғыларын жасауда айтарлықтай жетістікке жеткен іргелі кәсіпорын. Бір қызығы, ресейлік қай компанияның қызметімен таныссаңыз да, оның ғылыми-зерттеу жұмыстарымен қоса айналысатынын аңғарасыз. Яғни, көршілес елдің өндірушілері бәсекеге қабілетті болу үшін ең алдымен өнім сапасын ұдайы жетілдіріп отыру керек екенін баяғыда-ақ түсініп алған. Соны басты мақсат етіп қойған.
Бақытжан Сағынтаев бастаған ресми топ өзімізде көрмеге арнайы жеткізілген құрастырылатын жеңіл автокөліктер мен ауыл шаруашылығы техникаларын да көрді. Отандық және ресейлік техникаларды шаруалар «Агромашхолдинг» лизингісі арқылы сатып алуда. Кемеров қаласы «Агро» ААҚ бас директоры А.Альтерготт өздері шығаратын «Кузбасс» тұқым себу кешенінің 32 данасын қостанайлық бір ғана шаруашылықтың иеленгенін айтады.
Халықаралық көрмеде аймағымыздың іргелі өндіріс ошақтары да өз жұмыстарымен таныстырды.
– Көрмеге қатысудағы басты мақсатымыз – Тәуелсіздік алғалы 20 жыл ішінде қол жеткен табыстарымызды паш ету. Біздің зауыт әлемнің 10 озық технологиялы кәсіпорны қатарына кіреді. Өткен жылы Лондон биржасына тіркеліп, қазірде сапалы алюминий металы сол жерден өткізіледі, – дейді «Қазақстан электролиз зауыты» АҚ вице-президенті Жұмабек Қамзин.
Айтпақшы, көрме аясында «Астана» мұз сарайы төңірегінде қазақтың киіз үйлері тігілді. «Ғасырлар үні», «Дәстүрлі мекен», «Дала өркениеті», «Саятшылық», «Бабалар мұрасы», «Айтыс» деген атауларды иеленген ұзын саны 6 киіз үйде қазақтың ұлттық өнері түрлері мен тұрмыстық бұйымдары, салт-дәстүрі келушілерге насихатталды.
Көрмені аралағаннан кейін мәртебелі қонақтар «Достық» үйінде «Аймақтық даму: тұрақты дамудың жаңа тетіктері» атты кеңеске қатысты. Дәл осында шекаралас аймақтардың өзара экономикалық байланысын дамытудың бағыттары сөз болды.
ҚР Премьер-Министрінің орынбасары Әсет Исекешев Үкімет тарапынан атқарылып жатқан игілікті бастамаларға тоқталды. Биылғы шілдеден бастап Кедендік одаққа мүше елдер арасында шекаралық бақылаулар алынды. Бұл екі ел арасындағы сауда-саттықты одан әрі өрістетуге қолайлы. Жалпы, Ресей – инвестиция құю бойынша біздің негізгі әріптесіміз. Қазақстан шетелдік инвестицияларды көптеп тартуға мейлінше ынталы. Сол себепті, заңнамалық тұрғыдан да барлық тетіктер қарастырылып отыр. Ресеймен ынтымақтастық туралы айтқанда, Сібір өңірі ерекше орынға ие. Соңғы кезде бұл өлкеден сатып алынатын құрал-жабдықтар, мұнай-газ саласының тауарлары көлемі жағынан ұлғайды. Көрсеткіштерді өсіруге екі тарап та мүдделі деп ойлаймын, деді Әсет Өрентайұлы.
Ә.Исекешев ресейліктерді үдемелі индустриялық-инновациялық даму бағдарламасына қатысуға шақырды. Бұл ретте мемлекет тарапынан көптеген қолдау көрсетіледі. Қазақстандық-ресейлік бірлескен кәсіпорындар да өрістерін кеңейтуге мүмкіндікті пайдалана алады. Инновациялық жаңалықтарды енгізуде әлеуетті ресейліктердің көмегімен арттыруға баса мән беріліп отыр. Осы жолы Омбы, Томск облыстарынан көрмеге келген кәсіпорындар өздерінің біршама ғылыми табыстарға жеткенін көрсетуде, – деді ҚР Индустрия және технологиялар министрі.
Облыс әкімінің айтып өткеніндей, индустриялық аймақ саналатын Павлодар облысында да іргелі жобаларды іске асыруға кең жағдай жасалып отыр. Көмір мен электр энергиясының басым бөлігі бізде өндіріледі. Соңғы кезде еркін экономикалық аймақ құру бағытында істер қолға алынды. Қазірде облыста құны 1 триллион 200 млрд. теңге болатын 166 жоба іске асуда.
Бақытжан Әбдірұлы шекаралық аймақтармен қарым-қатынасты дамытуда шешілуге тиіс мәселелерді атады. Соның бірі – өзен көлігімен жүк тасымалының төмендегені. Оған өзен арнасының балдыр-батпаққа бөгуі басты себеп болып отыр. Тағы бір мәселе – Павлодар қаласында халықаралық деңгейдегі әуежай бола тұра, көршілес аймақтарға қатынайтын ұшақ маршруттарының жоқтығы. Қазірде Алтай өлкесі, Омбы, Томск, Новосібір облыстарына тек автобустар ғана жүреді, екі арадағы жолаушылар саны аз емес.
Әсет Исекешев өз жауабында екі мәселенің министрлік деңгейінде қаралатынын жеткізді. Премьер-Министрдің орынбасары, сондай-ақ, ҚР Парламенті Мәжілісінің депутаты Мейрам Пішембаевтың «бір топ депутаттар өңдеу саласы кәсіпорындары үшін үш жылға салықтардан босату жөніндегі» бастамасын да қолдауға әзір екенін білдірді.
Ә.Исекешев ресейліктермен бірлесіп ғылыми технопарк құру да табылған идея екенін айтты. Томск жерінде жұмыс істейтін тамаша ғылыми орталықтың тәжірибесін бізге де енгізген пайдалы. «Бұл келесі жылы Павлодар жерінде өтетін шекаралас аймақтардың ынтымақтастық форумына лайықты сый болар еді», деді ол.
Өз сөздерінде Ресей Федерациясының ҚР-дағы сауда өкілі А.Яковлев пен Алтай өлкесі губернаторының орынбасары А.Лукьянов өзара ынтымақтастықты дамытуға неғұрлым ынталы болатынын айтып өтті. 2010 жылы біршама нәтижеге қол жетті. Оған Кедендік одақ оң әсер етті. Шекаралас аймақтардың қарын-қарынасын дамыту арқылы еларалық байланысты жаңа деңгейге көтеруге ұмтыламыз, деді қонақтар.
Кеше түстен кейін «Қазақстан-Сібір-2011» халықаралық көрмесі аясында өзара әріптестікті дамыту жөнінде түрлі тақырыптар бойынша диалогтық отырыстар жалғасын тапты. Бүгін, бағдарламаға сәйкес, шекаралас аймақтардың өкілдері облыстық бірқатар кәсіпорындарының жұмысымен танысып, кейін халықаралық көрменің жеңімпаздары анықталады.
Нұрбол ЖАЙЫҚБАЕВ.