Үкімет басшысы алдымен күрделі жөндеуден кейін халықаралық талаптарға сәйкестендірілген Петропавл әуежайының әлеуетті мүмкіндіктерімен танысты. Мұнда Үкіметтің қаржылық қолдауы арқасында әуежай терминалы мен ұшу-қону алаңдары қалпына келтіріліп, енді перрондарды жөндеу, әуе рейстерінің санын арттыру, жүк-әуе тасымалдарының сервистік қызметін жақсарту жолдары қарастырылып отыр. Бақытжан Әбдірұлы Қазақстанмен шекаралас Ресейдің Қорған, Омбы, Түмен өңірлерімен экономикалық, сауда-саттық байланыстарды нығайту, сыртқы нарық көздерін талмай іздестіру қажеттігін атап көрсетті. Бұдан кейін Б. Сағынтаевтың жұмыс сапары Қызылжар ауданындағы «Зенченко және К» командиттік серіктестігінде жалғасты. Осы шаруашылыққа Қазақстанның Еңбек Ері, даңғайыр диқан, білгір ұйымдастырушы Геннадий Зенченко өмірінің соңына дейін басшылық жасап, көптеген озық технологияларды іске қосты. Бұл күнде асыл азаматтың ұлы Геннадий Геннадьевич әке аманатына адалдығын танытып, жолын жалғастырып келеді. Мұнда АӨК-ті дамытудың мемлекеттік бағдарламасы шеңберінде қуатты жобалар қолға алынып, өндірістік үдерістер толық автоматтандырылған. Ғылымның озық әдістері егіншілікте, мал шаруашылығында, өнімдерді қалдықсыз өңдеуде, минералды тыңайтқыштар сіңіруде де кеңінен қолданылады. Серіктестіктің директоры ауыл тұрғындарына жан-жақты қамқорлық жасалып отырғанын, барлық әлеуметтік-мәдени нысандар жұмыс істейтінін, биыл шаруашылық есебінен денешынықтыру-сауықтыру кешені тұрғызылғанын жеткізді. Осындағы еңселі Мәдениет үйінде Ақмола, Қостанай, Павлодар, Қарағанды, Солтүстік Қазақстан облыстары ауылшаруашылық тауар өндірушілерінің қатысуымен республикалық жиын өтіп, агроөнеркәсіп кешенінің 2020 жылға дейінгі дамуының жаңа бағдарламасының жүзеге асырылу жайы талқыланды. Премьер-Министр өз сөзінде Президент биылғы Жолдауында Үкімет алдына Қазақстанның агроөнеркәсіптік кешенін одан әрі ілгері бастырудың, әлемдегі ірі аграрлық экспорттық өнім өндірушілер сапына қосылудың келелі тапсырмаларын жүктегенін, бұл орайда қолайлы мүмкіндіктерді тиімді пайдалану қажеттігінің жай-жапсарына тоқталды. Мемлекеттік бағдарламаларда қарастырылған негізгі тетіктер ауыл шаруашылығын түбегейлі жаңғыртуды көздейді. Соңғы 5 жылда тікелей мемлекеттік қолдау шаралары 3 есе артып, субсидиялаудың соны үлгісін енгізудің нәтижесінде сапалы тұқымдар мен тыңайтқыштарды қолдану мөлшері 1,5 есе өсті. «Азық-түлік корпорациясы» АҚ экспорттық әлеуетті арттыру үшін сыртқы нарықтарда отандық ауылшаруашылық өнімдерін ілгерілету бойынша оператор ретінде қайта құрылды. Мемлекет басшысының уағдаластықтарының арқасында шетелдік нарықтар ашылуда. Олардың қатарында ҚХР, БАЭ, Иран, тағы басқа да елдер бар. АӨК-ті дамытудың мемлекеттік бағдарламасын орындаудың жартыжылдық қорытындылары жайлы Премьер-Министрдің орынбасары – Ауыл шаруашылығы министрі Асқар Мырзахметов баяндады. Оның айтуынша, өткен жылға қарағанда ауыл шаруашылығының жалпы өнімі – 3,1, азық-түлік өнімдерінің өндірісі 7,5 пайызға өскен. Биыл субсидиялардың үш түрін тағайындау үдерістерін автоматтандыру көзделген. Келесі жылы жұмыс оның 15 түрі бойынша аяқталады. Солтүстік Қазақстан елімізде астық өндіретін негізгі өлкелердің бірі саналады. ЖӨӨ құрылымындағы ауыл шаруашылығының үлесі-25,2 пайыз. Аймақ басшысы Құмар Ақсақалов өз есебінде республика бойынша өсірілетін майлы дақылдар көлемі облыста 55 пайызды құрайтынын, келесі жылы оны бір миллион гектарға дейін жеткізу міндеті тұрғанын, минералды тыңайтқыштарды қолдану екі есе көбейгенін, соңғы үш жылда 30 миллиард теңгенің 500 бірлік техникасы сатып алынғанын, отандық өнімдерге басымдық беріліп отырғанын, қайта өңдеу бойынша 24 жоба іске қосылғанын, экспортқа шығарылатын ауылшаруашылық өнімдері 24,4 миллион долларға жуықтағанын жеткізді. Жиында сөйлеген фермерлер, «Атамекен» ҰКП кеңесінің мүшелері шағын және орта бизнесті дамыту, жұмыспен қамту, елді мекендерде кәсіпкерлікті өркендету, субсидиялардың қолжетімділігін арттыру, қазақстандық мазмұнның үлесін молайту, өнім сапасы мен қолжетімді бағаны тұрақтандыру, әлеуметтік-кәсіпкерлік корпорациялардың өкілеттігін кеңейту, өндірістік кооперативтерді көбейту, ветеринарлық қауіпсіздік шаралары, дизель отыны мен тыңайтқыштардың қолжетімділігін қалыптастыру, тағы басқа мәселелерді сөз етіп, өз ойларын ортаға салды. Үкімет басшысы АӨК саласында мемлекеттік қызметтер ұсыну үдерістерін оңтайландыру, құжаттардың мерзімдері мен тізімдерін қысқарту, технологиялық жаңғырту, ИИДМБ-2 іске асыру, инвестициялар тарту мәселелері бойынша бірқатар тапсырмалар жүктеді. Тиісті ведомство басшыларына ауылшаруашылық тауар өндірушілер мен отандық ауылшаруашылық техникасын өндірушілерге салық салу мәселесін пысықтауды, субсидиялау мәселелерін жетілдіре түсуді, аграршылар ұсынған инвестициялық жобаларды қайта қарауды тапсырды. Үкімет басшысы Солтүстік Қазақстан облысына жұмыс сапары аясында Петропавлдағы тұрғын үй, әлеуметтік-мәдени және спорт нысандарының, инфрақұрылым және инженерлік коммуникациялардың құрылыс барысымен танысты. Петропавлда 2017 жылы барлығы 1 000-нан астам пәтерді пайдалануға беру көзделіп отыр. Құрылыс салынатын негізгі орын ретінде «Жас Өркен» шағын ауданы таңдалған, ол жерде 500-ден астам нысан – ескі үйлер мен өзге де құрылыстар жойылады. Бұл жерде екі жылдың ішінде 2 500 пәтерлі 11 көп қабатты тұрғын үй, Оқушылар сарайы мен Теннис орталығы тұрғызылады. Б.Сағынтаев өңір кәсіпкерлерімен бизнес ортаны жақсарту шараларын да талқылады. Елімізде отандық бизнестің дамуы үшін қолайлы жағдай жасауға барынша көңіл бөлініп отырғанын айтқан Премьер-Министр рұқсат беру қағаздары саны 3 есеге қысқарып, 114 бақылау және 18 қадағалау саласы қайта қаралғанына тоқталды. Қазір бизнестің мемлекеттік органдарға есептер мен мәліметтер беру бөлігіндегі заңнаманы ревизиялау басталған. Оның бірінші кезеңдегі негізгі нәтижесі бизнес үшін ақпараттық талаптарды 30 процентке қысқарту болмақ. Сонымен қатар, Үкімет жоспарлы салық тексерулері санын қысқарту жұмыстарын жүргізіп, сатып алулар саласы жетілдірілуде. Жергілікті қамтуды ұлғайту шаралары қабылдануда. Жаңғырту 3.0 аясында да бизнес үшін жаңа мүмкіндіктер ашылып, экономиканың жаңа салалары, жаңа индустриялар құрылуда. Жиын барысында «Екін 2002» ЖШС директоры Е.Әбиев, «Атай СК» ЖШС құрылтайшысы Т.Қожахметов, «Арқалық» ШҚ басшысы Н.Барлыбаев, «Арт Строй» ЖШС директоры И. Валишин, «Барс-Nord» ЖШС бас директоры В. Богданов, «Радуга» ЖШС бас директоры Д. Шарапаев нәтижелі жұмыспен қамту бағдарламасын жүзеге асыру және жаппай кәсіпкерлік мәселелерін көтеріп, қаржы және рұқсат беру тетіктерін жетілдіру жөніндегі ұсыныстарын ортаға салды. Б.Сағынтаев облыстағы жұмыс сапары барысында Петропавл ауыр машина жасау зауытының тыныс-тіршілігімен танысып, жұмысшылармен кездесті. Биыл көктемде болған қарғын судан көп зардап шеккен Заречный кентінде болып, су тасқындарының алдын алу, зардаптарын жою мәселелері бойынша көшпелі кеңес өткізді.
Өмір ЕСҚАЛИ, «Егемен Қазақстан» Солтүстік Қазақстан облысы