Алматыда Әл-Фараби атындағы Қазақ ұлттық университетінде Қазақстан Тәуелсіздігінің 20 жылдығына орай «Зерттеу университеттерін қалыптастыру және олардың Қазақстан Республикасының инновациялық дамуына қосатын үлесі» тақырыбында халықаралық форум өтті.
Форумның жұмысын кіріспе сөз сөйлеп ашқан ҚазҰУ ректоры Ғалым Мұтанов жоғары оқу орнында зерттеу университетін қалыптастыру және бұл бағыттағы ізденістер туралы жан-жақты баяндады.
Қазақстанда ғылыми-зерттеу университетін құру мәселесі күн тәртібіне қойылған халықаралық форумның тәуелсіз еліміздің жиырма жылдығы қарсаңында өткізілуі біздер, ғалымдар үшін үлкен мәртебе. Мемлекет басшысы Нұрсұлтан Назарбаев әлемдегі бәсекеге қабілетті елу елдің қатарына енудегі ең басты шарт – білім мен ғылым жүйесіндегі мазмұнды өзгерістерге тәуелді екендігін атап айтқан болатын. Елімізде жастардың білім деңгейін одан әрі жетілдіріп, халықаралық деңгейдегі мамандар дайындаудың бүгінгі таңда қажеттілігі зор. Сондықтан да, білім сапасы жоғары жаңа университетті құру қазақстандық жоғары оқу орындарының әлемдік білім кеңістігі интеграциясына бағытталған маңызды даму сатысы болып табылады, деді Ғалым Мұтанов.
Әлемнің отыз елінен жүзден астам ғалымдар, жоғары білім беру саласының көрнекті қайраткерлері және IGIP, IFEES, SEFI, COPEC және өзге де халықаралық ұйымдардың өкілдері мен отандық жоо басшылары қатысқан жиында зерттеу университетін қалыптастыру мен дамытудағы шетелдік озық тәжірибелер күн тәртібіне қойылды. Сонымен қатар, инновациялық қызмет пен ғалымдардың ғылыми-зерттеу, құрастырмалы тәжірибелерін жетілдіру сияқты өзекті мәселелер талқыға салынды. Қазақстандағы көшбасшы университеттердің бірі болып есептелінетін ҚазҰУ бүгінде Ұлыбританияның «Quacduarelli Symonds» агенттігінің рейтингі бойынша әлемдегі 700 үздік университеттің арасында екі жүз орынға жоғарылап, 401-450-ші дәрежеге шығуы көп нәрседен хабар берсе керек. Сонымен қоса, халықаралық стандарттарға сай келетін білім бағдарламаларына көшкен ҚазҰУ әлемдік деңгейдегі зерттеу университетін құруда мемлекеттік маңызы бар мәселелерді шешумен айналыспақ. Әрине, мұның өзі оқу орны ғалымдарынан жоғары деңгейдегі біліктілік пен іскерлікті талап етумен қатар, оларға үлкен жауапкершілік жүктейтіндігі анық. Сөйтіп, университет ғалымдары елдің экономикалық дамуына, әлеуметтік құрылымы мен ғылыми ілгерілеуі бағытындағы іс-шараларға үлес қоспақ. Форум жұмысына қатысып, сөз алған АҚШ-тың Гарвард университетінің Азия мен Кавказды зерттеу бағдарламасының директоры Джон Шоберлаин, Ататүрік университетінің ректоры Хикмет Коджак және басқа да ғалымдар Әл-Фараби атындағы ҚазҰУ-де білім беру деңгейінің жоғары талапқа сай екендігін тілге тиек етіп, келешектегі ауқымды жобаларға да тоқталды.
Халықаралық форум қонақтарының бірі, Оңтүстік Кореядағы Корея университетінің өкілі, экономика ғылымының докторы Ли Ман У-дың пікірінше, «қазақстандық студенттердің білімі бүгінгі күннің жоғары талабына сай болуы құптарлық жәйт». Форум аясындағы басқосуларда қазақстандық білім жүйесімен кеңірек танысқан ғалымдар Әл-Фараби атындағы ҚазҰУ келешекте іргелі зерттеулермен жан-жақты айналысатындығына сенім білдірді. Форумның пленарлық және секциялық отырысында университеттің қалыптасуы мен дамуындағы шетелдік тәжірибелер, оқытушылар мен студенттердің академиялық жұмылысы, инновациялық қызмет пен ғалымдардың ғылыми-зерттеу, құрастырмалы-тәжірибелерін жетілдіру тұстары қарастырылды.
Әл-Фараби атындағы Қазақ ұлттық университеті Елбасы тарапынан қойылған әлемдік деңгейдегі зерттеу университетін құруда мемлекеттік маңызы бар мәселелерді шешумен айналысатындығы құптарлық жәйт. Университет халықаралық стандарттарға сай келетін білім бағдарламасына Орталық Азия аймағы бойынша білім мен ғылымның жетекші орталығы ретінде белсенді дамып, әлемдік білім кеңістігінде мойындалып келеді. Бүгінде университетте еліміздің әр аймағынан және алыс-жақын шетелден он тоғыз мыңнан аса студент білім алуда.
Бақыт БАЛҒАРИНА, Алматы.