Қазақстанда мұнай өндірудің жүз жылдан аса, ал газ өндірудің алпыс жылдай тарихы бар дегенмен, оларды сапалы түрде өндіру, әлемдік рынокқа жеткізу, табысты ұлғайту арқылы инвесторлар тарту бертінде қалыптасты. Тәуелсіздік алғанымызға жиырма жыл толайын деп тұр. Жиырма жылда осы сала ауыз толтырып айтарлықтай қандай табысқа қол жеткізді, қандай ілгерілеушілік байқалады деген заңды сауал туындайтыны түсінікті. Бір мақалада айдыны кең бұл саланы түгел қамту мүмкін емес. Сондықтан «ҚазМұнайГаз» ұлттық компаниясы» АҚ-тың еншілес компаниясы «ҚазМұнайГаз» Барлау Өндіру» АҚ-ты ғана нысанаға ала отырып, ақпарат беруді жөн көріп отырмыз.
Бұл компания «Өзенмұнайгаз» АҚ және «Ембімұнайгаз» АҚ-тың бірігуімен 2004 жылдың наурызында құрылып, содан бері нәтижелі жұмыс істеп келеді. Ол Қазақстанда мұнай өндіретін көшбасшылардың үштігіне кіреді. Компания мұнайды, табиғи және ілеспе газды өндіруші болып табылады, сондай-ақ, мұнай-газ қорларын үнемі ұлғайтып отыру үшін барлау жұмыстарын іске асырады.
Биыл бұл компания Еуропа, Таяу Шығыс және Африка елдеріндегі 79 компанияның арасынан «Барлау және Өндіру» санаты бойынша 41-ші орынға көтерілді. Айта кетсек, былтыр отандық алпауыт компания осы рейтингте 47-ші орында еді. Мұның өзі «ҚазМұнайГаз» Барлау Өндіру» АҚ-тың бір жыл ішінде аса жоғары табыстарға қол жеткізгенін байқатады. Сондай-ақ, қазақстандық мұнай компаниясы «Platts» халықаралық ақпараттық агенттігінің «әлемдегі ең ірі 250 энергетикалық компаниялары» атты рейтингінде де сол тізімнің жоғарғы бөлігінен – 99-шы орыннан табылды. Өткен 2010 жылы «ҚМГ БӨ» осы рейтингтің 101-ші орнында болатын.
2006 жылдың қыркүйегінде отандық компаниялар арасынан бірінші болып IPO-ға шығып, өз акцияларын Лондон қор биржасында орналастырғанына, міне, бес жыл. Бүгінде компания активінде соңғы жылдарғы сатып алуларды қоспағанда, 41 кен орны бар.
Компания стратегиясындағы негізгі элементтердің бірі жаңа активтерді сатып алу. 2007 жылы «Қазгермұнай» БК ЖШС-дегі үлестердің 50 %-ын, сол жылдың желтоқсанында мұнай қорының өсуін қамтамасыз еткен CCEL-дағы («Қаражанбасмұнай» АҚ) үлестердің 50 %-ын сатып алды.
Жуырда ғана IPO-ға шыққандығының бес жылдығын атап өту іс-шаралары кезінде акционерлік қоғамның бас директоры Асқар Балжанов отандық және шетелдік инвесторлармен, сарапшылармен, журналистермен кездесіп, сұрақтарға жауап беріп, соңғы жылдары қол жеткен табыстар мен алдағы жоспарлар жайында сыр шертті. Біздің артықшылығымыз, «ҚазМұнайГаз» ұлттық компаниясымен тығыз байланыстылығымызда. Бұл мұнай-газ активтері мен инфрақұрылымына қол жеткізуге жол ашып береді», – деген басшы компанияның осы жылдарда айтарлықтай алға басқанына тоқталды. Бұның бір айғағы – миноритарлы акционерлердің мүддесін қорғауға бағытталған корпоративті басқару жүйесі. Басқару қалай болса, нәтиже де соған байланысты болмақ. Сонымен, «Қазмұнайгаз» Барлау Өндіру неден бастады, IPО-ға шыққанда қолында не болды, ол қаншалықты өсті дегенге келейік. Компания IPО-ға шыққанда қолында Өзен және Ембі секілді екі ірі өндіру активтері мен небәрі үш барлау блогы және акцияны сатқаннан түскен 2 млрд. доллары болған. Сол кездегі басты стратегиялық бағыты – жаңа активтерді тарту және Өзен мен Ембіде түрлі шығындарды қысқартып, өндіруді тұрақты деңгейде жалғастыра беру еді. Қазір де бұл мәселе өз маңызын жоғалтқан жоқ.
Компания бизнесінің үлкен бір компоненті ретінде төмендегі үш нәрсені атауға болады. Осыдан бес жыл бұрын барлау активтерінен үш блок бар болса, бүгінгі күні олардың саны онға жетті. Биылғы жылдың өзінде 24 ұңғыма бұрғылануда. 2Д және 3Д өлшеміндегі үлкен көлемді сейсмика жасалды. Ең бастысы, жаңадан мұнай орны ашылды. Қазір Компания «ҚазМұнайГаз» компаниясымен жасалған меморандум аясында бірқатар блоктарды зерттеп жатыр. BG Group компаниясымен бірлесіп, Солтүстік теңізде алғашқы сынақтарын жүргізуге әзірленуде. Ақшалай қаржысы осыдан бес жыл бұрын 2 млрд. доллар еді, қазір 4 млрд. доллар. Бес жыл ішінде кезінде IPO-ға шыққанда тартылған 2 млрд. доллар көлеміндегі қаржы акционерлерге дивиденд түрінде төленді. Ал енді бірлескен кәсіпорындардағы үлестері компанияның мұнай өндіру көлемінің үштен бірін, таза табысының 40 пайызын құрайды.
Өткен жылдың соңында Директорлар кеңесі онжылдық даму стратегиясын (2011-2020 жж) бекіткен болатын. Оның басты мақсаты – компанияның акционерлік құнын көтеру. Ал оған жету үшін тиімділік артып, бизнес көлемінің өсуі шарт. Компания өсу үшін Қазақстанда да, шетелде де қанатын кеңге жаюы, геологиялық барлау мен Каспий аймағындағы операцияларды жеделдете жүргізуі қажет. Стратегияда геологиялық барлау мен теңіз операцияларына негізгі басымдық беріліп отыр.
«ҚазМұнайГаз» Барлау Өндіру» АҚ жақын перспектива тұрғысынан өз алдына төрт мақсат қойып отыр. Біріншіден, өндіру активтерінің экономикалық тиімділігін арттыру. Екіншіден, геологиялық барлау ауқымын кеңейту. Үшіншіден, Каспий аймағынан активтер тарту және теңіз операцияларын бастау. Төртіншіден, Қазақстандағы активтерді шоғырландыру ісін жалғастыру.
Компанияның көне активтерінің әлеуеті әлі де зор. Кен орындарының ескіргеніне қарамастан кемінде жиырма жылға жететін шикізат қорлары бар. Кен орындарының ескілігіне қарамастан олардың көбісінде, әсіресе, Өзен кенішінде тұрақты өндіріс деңгейі әлі бес жыл сақталады. Дегенмен, жұмыскерлерге төленетін жалақының өскені, жұмыс процесін ұстап тұруға кететін қаражат, құрал жабдық пен химиялық реагенттердің қымбаттауы, салықтың болжамға көнбей өсіп жатуы, монополистердің тариф белгілеудегі үстемдігі, т.б көптеген факторлар өндірістік шығындардың артуына себеп болып отыр. Сондықтан, жалпы өндірісті модернизациялау арқылы ғана экономикалық тиімділікке қол жеткізуге болады. Келер жылы Өзен кен орнындағы өнімді 5,8 млн. тоннаға дейін, 2013 жылы 6 млн. тоннадан арттыру, ал, жалпы екі ескі кен орны – Өзен мен Ембіде өнімді 9 млн. тонна деңгейінде ұстап тұру компания жоспарында тұр.
Осы жылы барлау блоктарының жалпы көлемі екі есеге ұлғайды. Бұрғылап жатқан ұңғымалар үш еселенді. Қойнауды қазбалау төрт есеге ұлғайды. Сейсмикалық жұмыстарды жүргізу көлемі өсті. Теңіз операциялары аясындағы жұмысты компания бастап та үлгерді. Осы жылы «ҚазМұнайГаз» компаниясымен меморандумға қол қойылып, бес теңіз блогы зерттеу объектісіне айналып отыр. Сонымен қатар стратегиялық серіктесі BG Group компаниясымен бірге Солтүстік теңіздегі Уайт Беар жобасы бойынша алғашқы тәжірибелік жұмыстарын жүргізуде.
Бүгінгі күні «ҚазМұнайГаз» Барлау Өндіру» компаниясының ешқандай қарызы жоқ. Қолда бар 4 млрд. доллар қаржы алдағы уақытта барлау жұмыстарына, Қазақстандағы және шетелдердегі жаңа мұнай-газ активтерін сатып алуға, өзі жұмыс істеп жатқан өңірлердегі ауқымды әлеуметтік бағдарламаларды жүзеге асыруға бағытталмақ.
Венера ТҮГЕЛБАЙ.