Тәуелсіздіктің бесігі болған Алматы
Елордадағы Бейбітшілік және келісім сарайында Алматы қаласының Астанадағы күндері аясында көрме ұйымдастырылып отыр. Бұған дейін жас қалаға Жетісу жерінің сыйы ретінде 25-27 қазан күндері Алматы облысы өзінің берекелі жәрмеңкесімен келіп, астаналықтар мен қала қонақтарына сапалы да қолжетімді азық-түлік өнімдерін ұсынған болатын. Облыс ауылшаруашылық жәрмеңкесіне 177,2 миллион теңгенің, оның ішінде 90,5 тонна ет өнімдерін, 160 тонна көкөніс, 74 тонна жеміс-жидек, 100 тонна картоп пен 0,5 тонна сүт өнімдерін әкелген болатын және осы сапалы өнімнің бағасы да базар бағасынан 15-20 пайызға арзанға түсіп, Астана жұртшылығы оңтүстіктен келген көл-көсір тағамды үлкен ықыласпен қабыл алған-ды. Осы Бейбітшілік және келісім сарайында облыстық көркемөнерпаздар, отбасылық ансамбльдер мен республикалық түрлі байқаулар мен бәйгелердің жеңімпазы атанған өнер ұжымдары қала жұртының көңілін шалқытқан үлкен концерт ұйымдастырғаны да астаналықтардың көңілінен көше қойған жоқ. Енді міне, Елбасының өзі келіп қатысатын көрмеге әсем қала Алматы өзінің егемендік алғаннан бері қол жеткізген жетістіктерін Тәуелсіздіктің 20 жылдық ұлы мерекесі қарсаңында паш еткелі отыр. Осы ретте әйгілі апорттың отаны, жер жәннаты Жетісудың алып тауларының баурайында орналасқан әсем қала туралы аз-кем айта кетсек, артық болмас. Алматы – Еуразиялық контитенттің маңызды және ыңғайлы жерінде, Ұлы Жібек жолының жүлгесінде орналасқан. Сонымен қатар қаланың туризм саласын дамытуға үлкен мүмкіндіктері бар. Алматы ішкі жалпы өнімнің бестен бір бөлігін өндіреді және мемлекеттің бюджеттік кірісінің ширек бөлігінен астамын береді. Бүгінде Алматыда қазіргі заманғы мегаполиске сәйкес келетін инфрақұрылымның барлық негізгі элементтері орналастырылған. Өңірлік ішкі өнім көрсеткіші бойынша Алматы Орталық Азияның барлық қаласын және Ресейдің кейбір аймақтарын да едәуір басып озады. Мәселен, Алматының өңірлік ішкі өнім көрсеткіші Ташкенттен 4,5 есе, Новосібірден 1,5 есе, Омбы облысынан 2 есе жоғары. Қала өңірлер арасында барлық жағынан болсын өте жағымды жағынан сипатталады. Сондай-ақ, қала дамуының деңгейі туралы халықаралық сарапшылардың бағалауынша, Алматы «Әлемнің ғаламдық қалаларының» тізіміне кірді. Атап айтқанда, Детройт, Эдинбург, Манчестер, Санкт-Петербург және Доха сияқты әлемдік экономиканың орталығы ретінде танымал болып отыр. Қаланың маңыздылығы артып келеді, сондықтан мемлекет оған үлкен мән береді. Еліміздегі шағын және орта бизнес өндірген барлық өнім көлемінің 27 пайызы Алматы қаласының үлесіне тиесілі. Бұл – жақсы көрсеткіш. Қала басшылығы 3 бірдей маңызды бағытқа ынта қойып отыр. Олар, бірінші бағыт – экономикалық өсімнің маңызды көрсеткішінің бірі болуы тиіс – Алатау ауданында алаңы 490 гектар болатын индустриялық аймақты дамыту. Президент Үкіметке Алматы қаласы мен Алматы облысының әкімдерімен бірлесіп, қала мен іргелес аумақтың көлік жүйесін дамытудың кешенді жоспарын қарауды және қабылдауды тапсырған болатын, сол себепті де, екінші бағыт – көлік қызметінің жаңа баламалы түрлерін қоса алғанда, қаланың барлық көлік жүйесін кешенді дамыту. Сонымен қатар, баса назар аударып отырған үшінші бағыт – Алматы өңірінде туризмді, соның ішінде жеке меншік тау шаңғысын дамыту. Ағымдағы жылдағы маңызды жобалардың арасында – метроның бірінші кезегін пайдалануға беру, Шығыс-айналма автожолының құрылысын аяқтау, Республика сарайын қайта жөндеу, бірқатар өзге де маңызды инфрақұрылымдық және әлеуметтік жобалар бар. Алматыны ірі өңірлік қаржылық орталық ретінде одан әрі дамыту өзекті мәселе екендігі анық. Мамыр айының басында келген кезде Елбасы Тәуелсіздігіміздің 20 жылдық мерей тойына Алматы қаласының белсенді қатысуын және тарихи ұлы датаны айырықша атап өтуге шақырған болатын. Бұл көрме Президенттің сол сөзінің үдесінен шығуға жасалып отырған қадам. Ақмоланың ақ пейілі Жетпіс жылдық тарихы бар Ақмола өңірі 1939 жылдың 14 қазанында іргетасын қалады. Облыс орталығы солтүстіктің сұлу мекені Көкшетау қаласында орналасып, осы әсем қаладан басқарылады. Облыстың жер ауқымы 146,2 мың шақырым аумақты қамтып жатыр. Тек сұлулығымен ғана емес, табиғи бай қазыналы өлкеде Көкшетау мен Степногор қалалары, 17 аудан, аудандарға қарасты 8 кішігірім қала мен 244 ауылдық округ бар. Облыстың халық саны 733 мың адамды құраумен қатар бұл облыс көп ұлтты өңір екендігімен де белгілі. Пайдалы қазба байлығы жөнінен ауыз толтырып айтарлықтай бай өлкеде техникалық алмаздың, уранның 25 пайызы, алтынның 12 пайызы және құрылыс материалдарын жасауға пайдаланатын кварц құмы, доломит, каолин секілді мол қазына қоры бар. Ақмола – астықпен аты шыққан құтты мекен. Мұнда жылына жиналған жоғары сапалы астық бүкіл елімізді қамтамасыз етіп отыр десек те болады. Сонымен қатар, ет пен сүт өнімін өндіруде де Ақмола облысының көрсеткіші жоғары. Ақмола облысының Астанадағы күндеріне арнап Еңбекшілдер ауданы жәрмеңкеге 22 тонна сиыр етін, 7 тонна жылқы етін, 3 тонна қой еті мен нан өнімдерін, сүт, бал әкеліп халыққа қолжетімді бағамен ұсынып отыр. 11 ауылдық округ, «Еңбек» ЖШС, «Хлебороб» ЖШС, «Бақытжан» шаруа қожалығы секілді 22 жекелеген өнім өндіруші серіктестіктер сапалы өнімін жәрмеңкеге шығарды. Мал және астық өндіруді кәсіп еткен аудан биыл 124 мың гектар жерге егін егіп, оның әр гектарынан 15 центнерден астық жинап алған. Өткен жолы Елбасы Нұрсұлтан Назарбаевтың өзі арнайы барып тамашалаған «СК-Фуд» ЖШС жуырда мал бордақылайтын ферма ашып, Америкадан, Австралиядан 942 бас асыл тұқымды қой алып, болашақта ет дайындау ісін бүгінгі деңгейден де жоғарылатамыз деп отыр. Еңбекшілдер ауданынан келген Құттыбек Шарипов басқаратын «Шариповтар» шаруа қожалығы 2 тонна сиыр етін әкеліп, елдің қалтасы көтеретін бағамен саудаға шығарды. Алушылар дән риза. Шаруашылықтың 600 бас ірі қарасы бар, 2 мың гектар жердің мың гектарына бидай егіп, қалған мың гектарына малдың азығы үшін жем-шөп дайындауға арналған құнарлы дақылдар себіледі. Өз ісіне ұқыпты қожалық биылғы астықты уақытылы жинап алумен қатар Азық-түлік келісім-шарт корпорациясына мың тонна бидай өткізген. Бүгінгі жәрмеңкеге Еңбекшілдер ауданы 6 тонна сиыр етін, 600 кило жылқы етін, 800 кило қой етін және 1 тонна шошқа етін әкелген. Одан өзге 10 тонна картоп пен 50 мың дана жұмыртқа да бар. Жәрмеңкеге ауданнан 3 жауапкершілігі шектеулі серіктестік пен 3 шаруа қожалығы қатысып отыр. Ауданның биылғы көрсеткіші көңіл қуантарлық. Биыл «ҚазАгроның» несиелік қолдауымен мал тұқымын асылдандырумен айналысатын серіктестік ашып Солтүстік Дакотадан әкелген асыл тұқымды мал басын көбейту қолға алынды. Қазақстандағы ең ірі құс фабрикасының бірі болып есептелетін «Қазгерқұс» дейтін құс фабрикасында 650 мың бас тауық бар. Еңбекшілдер ауданы әкімінің орынбасары Қабиболла Шаяхметов егемендіктің 20 жылдығы тұсында Астана халқына сый ретінде Ақмола облысының тағам өнімдері мен мерекелік көрме, түрлі шаралар дайындап келгендігін айтты. Қорғалжын ауданы 15 шаруа қожалығы мен 8 ауылдық округтың ауылшаруашылық өнімдерін ұсынды. Оның ішінде 2 тонна сиыр еті, бір жарым тонна жылқы еті, ондаған тонна қой еті мен 2 тонна балық, шұжықтың жүзге тарта түрін ұсынып отыр. Азық-түліктен өзге қорғалжындықтар Астана жұртшылығы мен қонақтарына арнап жергілікті «Дударай» халықтық-фальклорлық ансамблінің дайындаған мерекелік концерті жәрмеңкеге келген жұрттың еңсесін көтеріп тастады. Арайланған Ақтөбе Тәуелсіздіктің 20 жылдығын мерекелеу аясында елордалықтарға өз сыйларын алып жеткен ақтөбеліктер «Meгa Астана» ойын-сауық және сауда орталығына жапсарлас аумаққа «орын теуіп», онда Ақтөбе облысының әлеуметтік-экономикалық дамуы туралы көрмесін, ауыл шаруашылығы өнімдерінің жәрмеңкесі мен өнер шеберлерінің концертін өткізді. «Соңғы түйенің жүгі ауыр» демекші, өңірлердің соңын ала жеткен облыс шараға мұқият дайындалыпты. Ақтөбе өңірі еліміздегі ірі аумақты алып жатқан облыстардың санатына жатады. Табиғи қазба байлыққа бай, адами, өндірістік және көліктік әлеует бойынша Қазақстанның қарқынды дамушы аймағы болып саналады. Облыстың өңірлік жалпы өнімі өткен жылы 1993 жылмен салыстырғанда 822 есеге өсіп, 1,4 млрд. теңгені құраған. Биыл өңірлік жалпы өнімді 1 трлн.300 млрд. теңгеге жеткізу жоспарланып отыр. Өнеркәсіп өндірісі бойынша да алдыңғы бестікке кіретін Ақтөбе облысында соңғы жеті жыл ішінде 400-ге жуық инвестициялық жобалар жүзеге асырылыпты. Бұл 25 мың адамды жұмыспен қамтамасыз етуге мүмкіндік берген. Осы орайда басты жетістік, Ресейден келетін электр энергиясы импортына тәуелділіктен құтылу болып отыр. 90-жылдары облыстағы электр қуатының 85%-ы Ресейден алынса, бұл көрсеткіш бүгінде тек 3 %-ды ғана құрайды. Ауыл шаруашылығы саласы да оң өзгерістерге толы. Қазір облыс өз тұрғындарын облыста шығарылатын өз тауарларымен 80%-ға қамтамасыз етіп отырған көрінеді. Ақтөбе облыстық ауыл шаруашылығы басқармасының бастығы Мұхтар Жұмағазиев елордада өткізілген жәрмеңкеге 300 тонна ет пен 100 тонна көлемінде көкөніс өнімдерін алып келгендігі туралы мәлімет бере кетті. «Ақтөбе облысынан келген өнімдердің ішінде шұжықтың 50 түрі, 300 тонна ет, 100 тонна көкөніс өнімдері бар. Жәрмеңкеде сиырдың еті 1 килосы 850 теңгеден, ал қой етінің әр килосы 750 теңгеден, түйе еті 900-ден, жылқы етінің килосы 950 теңгеден саудаланды, деді ол. Ал бұл баға елордалықтарға базар бағасынан әжептәуір арзанға түспек. «Мега Астана» ойын-сауық және сауда орталығы айналасында облыс аудандары мен Ақтөбе қаласы атынан 12 қанатты бір және сегіз қанатты 6 ақшаңқан киіз үйлер тігіліп, этноқалашық жұмыс істеді. Бұл ауылдар ерен еңбегімен және әскери ерлігімен ел тарихында есімдері қалған адамдардың аттарымен аталыпты. Мысалы, Әбілхайыр хан, Қобыланды батыр, Нұрпейіс Байғанин, Шығанақ Берсиев, Әйтеке би және тағы басқа ауылдарда дастархан жайылып, қонақтарға дәстүрімен бас тартылды. Бұл киіз үйлер халық шеберлерінің қолынан шыққан бұйымдармен жабдықталыпты. Сондай-ақ мұнда Кіші жүздің ханы Әбілхайырдың атаулы жүзігі, атақты композитор Ахмет Жұбановтың концерттік костюмі секілді көптеген тарихи маңызға ие экспонаттар бар. Халықтық мерекенің басты тартуы – ақтөбеліктер ұйымдастырған «Бауырсақ күні» мерекесі болды. Мерекеге қатысушы Астана тұрғындарына 220 мыңнан астам бауырсақтар тегін таратылды. Бұл облыс әкімі Архимед Мұхамбетовтің айтуынша, Ақтөбе облысына 80 жыл, ал Ақтөбе қаласына 142 жыл толуына орай ұйымдастырылған сый болып шықты. Ауыл шаруашылығы өнімдерін өндірушілер төменгі бағамен сатылатын өнімдердің көптеген түрін ала келіпті. Оның ішінде ет, балық, сүт, шұжық, көкөністер, күнбағыс майы, ұн, бал және басқалар бар. Шалғай ауданнан тарту Тәуелсіздіктің 20 жылдығына тарту ретінде елордада өткізілген жәрмеңкеге Ырғыз ауданы қандай тартумен келді дегенде, ауыз толтырып айтардай көрсеткіштер бар. 15 мың тұрғыны бар Ырғыз ауданынан 10 тонна балық пен 3 тонна ет алып келдік. Балықтың түр-түрінен, атап айтсақ, 6 түрі әкелінді. Оның орташа бағасы 250-300 теңге. Аудан ауыл шаруашылығымен, оның ішінде мал шаруашылығы және балық шаруашылығымен айналысады. Осы екі бағытта аудан көлемінде өндірілген өз өнімдерімізді сатуға әкелдік. Қазақтың салт-дәстүрінің қаймағы бұзылмаған Ырғыз ауданы облыс орталығынан шалғай орналасқан. Дегенмен, бұл аудан өмірінің өрлеуіне кедергі болып отырған жоқ. Тәуелсіздік алғалы бері көп жетістікке қол жеткіздік. Мысалы, «Батыс Қытай – Батыс Еуропа» жолының 215 шақырымы аудан территориясымен өтеді. Енді Астана бағытындағы жол құрылысы басталмақ. Жуырда Ырғыз-Торғай резерваты пайдалануға берілді. Мұның барлығы тұрғындардың әлеуметтік жағдайын арттыруға септігін тигізіп отырған үлкен шаралар. Бұған қоса, жуырда тәуелсіздіктің 20 жылдығына орай ауданда облыс орталығына аптасына екі рет ұшақпен қатынау жолға қойылды. Енді аудан тұрғындары жалпы құны 15 мың теңгенің үстіндегі билетті облыстық бюджет есебінен 3 950 теңгеден ала алады. Мирхан ДУАНБЕКОВ, Ырғыз ауданының әкімі. Бетті дайындағандар Қанат ЕСКЕНДІР, Венера ТҮГЕЛБАЙ. Суреттерді түсірген Орынбай БАЛМҰРАТ,
•
16 Қараша, 2011
Аймақтар алақаны аялаған Астана
388 рет
көрсетілді