Кеше Астананың «Риксос» қонақүйінде Ауғанстан жөніндегі халықаралық байланыс тобының (АХБТ) 12-ші отырысы болып өтті. Отырыстың соңынан баспасөз мәслихаты ұйымдастырылды.
АХБТ 2009 жылы АҚШ-тың Ауғанстан және Пәкстан бойынша арнаулы өкілі Ричард Холбруктың ұсынысы бойынша құрылған еді. Оның құрамына 50 мемлекет пен халықаралық ұйымдар өкілдері енеді. Соның ішінде мұсылман тұрғындары басым болып саналатын 15 мемлекет бар. Осыған дейін байланыс тобының 11 отырысы Мюнхен, Токио, Ыстамбұл, Триесте, Париж, Нью-Йорк, Абу-Даби, Мадрид, Рим, Жидда секілді әлемдік қалалар мен Ауғанстан астанасы Кабулда өткен еді. Кеше ол ТМД елдері арасынан бірінші болып Астанада өткізілді.
Отырысты Қазақстан Республикасының Сыртқы істер министрі Ержан Қазыханов ашып, сөз сөйледі. Ол сыйлы қонақтарды Қазақстан астанасында қарсы алуға қуанышты екенін білдіре отырып, бүгін жұмыстарының өнімді болмағына сенім білдірді. Сонымен бірге, Ауғанстан Ислам Республикасының Сыртқы істер министрі, доктор Залмай Расул мен Байланыс тобының төрағасы Елші Михаэл Штайнерге айрықша назар аударып, отырысқа олардың қатысып отырғанына ризашылығын айтты. Біз Ауғанстандағы тұрақтылықтың беки түсіп, экономикасының өркендеуіне өзіміздің үлесімізді қосармыз деген үміттеміз, деді қазақстандық министр.
Одан әрі Е.Қазыханов бүгінгі күні әлемдік қоғамдастық Ауғанстандағы тұрақтылық пен қауіпсіздікті қамтамасыз етуге мүмкіндік беретін өзара іс-қимыл жасаудың аса маңызды шешімдерін қабылдаудың қарсаңында тұрғанын айтты. Біз халықаралық жобалардан Ауғанстанның айналасы және Ауғанстанның қатысуымен іске асырылуға тиісті ынтымақтастықтың пішіндерін іздестіру үстіндеміз. Жуырда Ыстамбұл қаласында болған аймақтық конференцияда халықаралық қоғамдастық БҰҰ-ның ықпалымен Ауғанстанды аймақтың саяси және экономикалық өмірдегі толыққұқылы және жауапты әріптесі ретінде тануға дайын екендіктерін білдірді. Бұл үшін тек осы елде болып жатқан үдерістерді түсінуге және Ыстамбұл декларациясының қағидаттарын сақтауға деген ұмтылыс болуы керек, деді Е.Қазыханов.
Одан әрі қазақстандық министр Астанадағы отырыста қарауға ұсынылған мәселелерге назар аударды. Ауғанстаннан қауіпсіздікті сақтауға ықпал етуші Халықаралық қарулы күштердің шығарыла бастауын есепке ала келіп және тұрақтылықтың сақталуына жауапкершілікті 2014 жылдан бастап толығымен Ауғанстан үкіметінің мойнына жүктей отырып біз халықаралық көмектің әлсіремеуін естен шығармауымыз керек. Гуманитарлық және экономикалық көмектерді жалғастыра отырып, елдің ішіндегі саяси үнқатысулардың дамуына да ықпал етуіміз керек, деді ол.
Өзінің сөзінде Е.Қазыханов Қазақстанның ауған халқына жасап отырған жәрдемі жөнінде де айтып өтті. Бұл қатарда Қазақстаннан гуманитарлық көмек ретінде тұрақты түрде азық-түлік жеткізіліп тұрғанын және еліміздің жоо-ларында бейбіт кәсіптерді меңгеруге тегін оқып жатқан ауған студенттеріне стипендия төленіп отырғанын жеткізді. Біздің еліміз ЕҚЫҰ Төрағасы болып тұрған кезінде Ауғанстан мәселесін шешуге әлем назарын аударуға үлкен себепкер болды. Қазір Байланыс тобының төрағасы ретінде де осы үдерісті жалғастырып, ЕҚЫҰ-дағы азиялық әріптестерімізбен бірге Ұйымның бұл проблемаға белсенді араласуына ықпал етудеміз. Ал Ислам Ынтымақтастық Ұйымының Іс басындағы төрағасы ретінде біз Кабулда ұйымымыздың Тұрақты миссиясын ашуға қол жеткіздік. Осының нәтижесінде, ұйымның қаржылық қоры есебінен көмек беру ісі жақсара түсті, деді қазақстандық министр.
Сөзінің соңында Е.Қазыханов Ауғанстан жөнінде Боннда болатын конференция алдында осы елді қалпына келтіру жөніндегі халықаралық қоғамдастықтың 10 жылғы іс-әрекетінің нәтижесін қорытындылау керек екенін және бүгінгі отырыста сол конференцияның жемісті боларына негіз қаланарынан үмітті екенін айтты. 12-ші отырысқа қатысушылар атынан ертесіне (яғни, бүгін) ашылатын Ауғанстанның бейбітшілік жөніндегі жоғарғы кеңесі – Лои Жырғаның жұмысына табыс тілейтінін жеткізді.
Отырыс барысында халықаралық сарапшылар тобы Ауғанстандағы өтпелі кезеңдегі азаматтық аспектілер, елді қалпына келтіру барысындағы халықаралық қоғамдастықтың міндеті секілді өзекті мәселелерді талқылап, бірізді әдістер әзірлеуге ұмтылыс танытты. Бірақ нақты шешім қабылдауға сарапшылардың құзыры жоқ екені белгілі.
Сарапшылар отырысы аяқталған соң баспасөз мәслихаты болып, қатысушылар журналистердің көптеген сұрақтарына жауап берді.
Жақсыбай САМРАТ.