Биыл Тәуелсіздігінің 20 жылдығын тойлап жатқан мемлекет жалғыз біз емеспіз. ТМД елдерінің бәрі мәз-мәйрам мереке үстінде. Кеңес Одағы ыдырағанда тоқтап, тоқтамағаны тұралап істен шыққан ел шаруашылығын нарыққа айналдырып, өтпелі кезеңнен аман-есен өтіп, дербес мемлекет құру оңайға соқпаса да, бұлардың қай-қайсысы болсын қиямет қиындықтарды жеңе отырып, өсіп нығайып келеді. Әсіресе, тәуелсіз Қазақстанның даму қарқыны айрықша.
Қаракөз қазақ, жан жағыңа бажайлап қарашы!
Жиырма жыл бұрын Қазақстаннанмын десең, аңырып, тосылып қалатын шет ел жұртынан енді тәуелсіз, азат Қазақстанның қарышты қадамына назарын салмайтыны табылмайды деп кесіп айтуға болады. Экономикалық, әлеуметтік һәм демократиялық дамудың барша саласында Қазақстан Республикасы, шүкіршілік, мына жиырма жылдың ішінде жиырма ғасырға татырлық өсу, өркендеу жолынан өтті.
Соның бір айтарлықтай жемісі – Тәуелсіздік жылдары ұзына тарихымызда тұңғыш рет қазақ халқының демографиялық көрсеткіштері күрт жақсарды. Соңғы жиырма жыл ішінде атамекеніне 300 мың отбасы – 1 миллионнан астам шетелдегі туысқандарымыз оралып, шаңырақ көтеріп, ырыс-берекемізді тасыта түсті. Бір кезде өз елімізде азшылықта қалсақ, енді көпшілікке айналып, ұлан-байтақ Отанымыздың түкпір-түкпірін түгел жайлай бастадық.
Еліміздің солтүстік бөлегінде қазақ қонысының жиілеуі көп ретте Арқаның төсінде үлкен жаңа шаһардың пайда болуына тіке байланысты ма деп ойлаймын. Жиырмасында жиырма ғасыр жаңарған, ойы да бойы да өскен елдің тамаша табысы – елорда – Астана.
Мәскеу бір жылда салынбаған дейтін сөз бар ұлы халықта. Ал біздің Астанамыз, керісінше, бір жыл, тіпті бір күндей болмаған он, он бес жылда бой көтерді. Мұндай жасында тіл-ауыз байлайтын болашақ ару да бүйтіп сыланып шыға келмейді. Дүние жүзінің ең сұлу шаһары қатарына еркін қосылған Астананы шетелден келген небір білікті мейман таңырқай, тамсана ертегі қалаға балайды.
Тәуелсіздіктің жиырма жылында мемлекеттік іргемізді мықтап бекітіп алдық. Біреулер Қазақ елінің шекарасы бұрын сызылмаған деп жатады. Бұл тұжырымның дұрыс та, бұрыс та жағы бар. Орыс картографтары сонау ұлы Петр патшаның заманынан бері Қазақ жерін картаға түсірумен келеді. Сол карталарға көз жүгіртсеңіз, шекарамыз бүгінгіден әлдеқайда далиып жатқанын байқайсың. Міне, бұл жерлер сызылса да, мойындалмады. Түрлі-түсті басқыншылықтың салдарынан ту-талақай таланған, жырымдалған қонысымыз қаншама. Жиырма жылдың жиырма ғасырға теңелетін себебі, Қазақстан Республикасының қазіргі шекарасы барша дүние, бер жағы Ресей мен Қытай, арғы жағы АҚШ, күллі жаһан мойындаған, Біріккен Ұлттар Ұйымында заңдастырылған жер.
Шекара демекші, ол енді – құлыптаулы. Атамекенімізді бүгінгі заманғы талапқа сай қуатты Қарулы күштеріміз күндіз-түні міз бақпай күзетуде. Соңғы жылдары Конституция күнінде өткізіліп жүрген әскери парадтарды самарқау бақылай алмайсың. Ойың шартарапқа самғайды. Тәуелсіз Қазақ елі сарбаздарының шеруін жерімізді бұдан үш ғасыр бұрын жоңғардан азат еткен Абылай хан, Қаракерей Қабанбай, Қанжығалы Бөгенбай батырлар көрсе не дер еді деп ойлайсың. Көңіл жүйрік пе, көк дөнен жүйрік пе демекші, парадта сұңғақ бойларына әскери сәнді көк киімі жарасқан, көруге көз керек қазақ аруларының қару асынған сапын көргенде қиялың шалқып, сонау біздің дәуірімізге дейінгі 530-ыншы жылдан бір-ақ шығады. Сол жылы массагет қыздарының Сырдария аймағында Кир екіншінің ешкімнен жеңіліп көрмеген басқыншы әскеріне қарсы қан майданның ең шешуші сәтінде Томирис ханым бұйрығымен ойран салғаны, парсы патшасының басын алғаны, кейінгі қазақ қыздарының ел шетіне жау тигенде шаштарын төбесіне түйіп, жауынгерлік жанқияр ерлік көрсеткендері есіңе оралады.
Қазақ елі деген бейбітшіл, мінезге бай халық. Ауасы таза, суы таза, көгалы таза кең байтақ даласына тартқан. Бар ісінің алтын арқауы, адастырмас темірқазығы «Малым – жанымның садақасы, жаным – арымның садақасы» дейтін өнегелі қағида. Қазақтың бөтен елдің жеріне сұқтанбайтыны, өзге жұртқа қастық ойламайтыны, достыққа бейілділігі – бар биік қасиет болмысы мына дербес мемлекет кезінде айрықша жарқырап көрінуде. Қайсыбір мемлекет көршісімен дүрдараз. Өзге біреуі іштей алау-далау. Лаңкестік дейтін пәле ұлы Ресейдің өзінің берекесін кетіруде. Қазақ елі, тіл-аузымыз тасқа, бұндай дерттің бәрінен дін аман.
Қазақстан Республикасы тәуелсіздігінің жиырма жылы ішінде жаһан жұртының алдында үлкен беделге ие болып үлгерді. Республикамыздың Президенті Нұрсұлтан Назарбаевтың халықаралық аренадағы абыройы қандай. Енді әлемнің алпауыт державаларына дейін барша ел Қазақстан Республикасы саясатымен санасып, әрдайым қолдау білдіріп келеді. Мұны мақтаныш етуіміз әбден орынды.
Қазақстан Республикасы бұдан жиырма жыл бұрын әлемде бірінші болып дүние жүзіндегі ең бір қуатты Семей ядролық полигонын жапты. Бұл полигон арсеналы сол уақытта Ұлыбритания, Франция, Қытай үшеуін қосып алғандағы ядролық әлеуетінен асып түсетін. Енді Қазақ елі ядролық қарусыз әлем атты қозғалыстың дем берушісіне, лидеріне айналып отыр.
Осыдан жиырма шақты жыл бұрын, яғни 1994 жылы наурыз айында Қазақстан Президенті Нұрсұлтан Назарбаев Мәскеу университетінде сөйлеген сөзінде тұңғыш рет Еуразия одағын құру жобасын ұсынды. Бүгінгі Кеден одағы – сол жобаның іске асуының бастамасы. Енді күн тәртібіне бірыңғай экономикалық кеңістік құру мәселесі қойылып отыр. Бұған мұрындық болушының бірі – Қазақстан...
Еуразия одағы әсте Кеңес Одағын жаңғыртуды көздемейді. Оған итермелеудің қандай нышанына болсын қарсы тұруға тиістіміз. Тіпті келешекте Еуразия одағы сонау Лиссабоннан Владивостокқа дейін қанат жайғанда да ұлттық мүддені көздің қарашығындай сақтау, тәуелсіздігіміздің символы – Көк байрағымыздың мәңгі желбіреп тұруын қамтамасыз ету ата-баба аруағы алдындағы, болашақ қазақ ұрпағы алдындағы антымыз, ең қасиетті борышымыз саналуға тиіс.
Жуықта ежелден әр санын құр жібермей ынта қойып оқитын қадірлі «Литературная газетаның» ТМД елдері тәуелсіздігінің жиырма жылдығына арнаған «Біз бір ағаштың жапырағымыз» атты қос беттік материалымен танысып шықтым. Онда Әзербайжан, Армян, Беларусь, Қазақстан, Қырғызстан, Молдова, Тәжікстан, Түркіменстан, Өзбекстан елдерінің ұлттық һәм орыс жазушылары өз халықтарының тәуелсіздік кезеңінде қол жеткен табыстарын тілге тиек етеді. ТМД – Еуразиялық одақ үйі екендігін, біртұтас мәдени-тарихи ареал ғасырлар бойы қалыптасқанын атап көрсетеді. ТМД елдерінің рухани аралас-құраластығын күшейте түсуге шақырады. Экономикалық бірыңғай кеңістікпен қатар рухани һәм мәдени кеңістік жасау керектігін еске салады.
Бұған жетудің жол-жобасы қандай? Түйіні күрделі мәселе кең зерделеп талдауды, парасатты ізденіс, ыждағаттылықты талап етеді. «Литературная газета» сияқты бергі жағы ТМД елдері, арғысы әлем жұртына беделді мінберде әр пікіріңді салмақтап, дәлелді сөйлеуге не жетсін. Осы тұрғыдан маған Белоруссияда қырық жылдан аса тұратын орыс ақыны Тамара Краснова-Гусаченконың мақаласы ұнады. Жерін жерлеп, суын сулап отырған елін көкке көтереді. Еңбекқор, төзімді де ізгілікті, талантты белорус халқын жақсы білетінін, сүйетінін жазады. Бүгінгі ахуалын мақтаныш ете суреттейді.
Газет бетінде сөйлеген басқа да ақын, жазушылар өз елдері туралы жылы-жылы сөз айтудан аянып қалмаған. Тек бір ғана автордың пікірі өзгелердікінен өзгеше өрнектеліпті. Әңгіме Астана қаласында шығатын «Нива» журналының бас редакторы, қазақстандық ақын Владимир Гундаревтің мақаласы туралы болып отыр.
Республикамыздың соңғы жылдарғы табыстарына желе-жорта шолу жасай келе, В.Гундарев мақаласында одан әрі Қазақстандағы орыс тілі жағдайының оңбай бара жатқандығы жайынан асанқайғы соғуға арнаған. Жерлесіміздің Қазақ елі хақында жылы лебізге сараңдығын былай қойғанда, Қазақстанда орыс тілі құрып бара жатыр деп қабағынан қар жауып байбалам салғанын, мыналардың оңдыратын түрі жоқ деп әлдекімге шағынғандай болғанын бас шайқамай оқи алмайсың. Ол тіпті республикамыздағы жүзден аса ұлт өкілдері мәмілеге келген, құптаған мемлекеттік тіл саласындағы саясатымыздың дұрыстығына әжептәуір шәк келтіреді.
Ол айтқан тұжырымның қайшылығы аяқ алып жүргісіз. Қазақ тілінің өрісі бүгіндері там-тұмдап болса да кеңейе бастағаны, Гундаревтің ойынша, орыс тілінің республикамызда құлдырай бастауына әкеп соққан. Орыс тілі ұлтаралық қатынас тілі рөлінен қазірдің өзінде-ақ айырыла бастады дейді. Орыс тілінің ұлтаралық қатынас тілі қызметі алдағы он жылда қазақ тілі үлесіне тимегі орынды. Бірақ бұл өзгерістер орыс тілін өгейсіту есебінен жүргізілмесін деп безектейді. Сонда деймін-ау, мемлекет иесі қазақ халқының тілі өзіне тиісті заңды орнын алса, мұның қалайша орыс тіліне зардабы тимек?!
Тіпті, ол еш ыңғайсызданбастан мен, мемлекеттік қызметте істейтін жас қазақтардың орыс тілін мүлде білмейтінін, ары кеткенде орысшадан оншақты ғана сөз білетінін көріп жүрмін, дей келіп, «В общем, русский язык в Казахстане переживает далеко не лучшие времена» деп ой қорытады.
Аталмыш автор республикадағы ономастикалық комиссияның мүшесі көрінеді. Орыс және басқа шет тілдерден келген терминдерді қазақшалауды міндетіне алған комиссия тек қазақ тілінде сөйлейді екен. Құжаттары да қазақша жазылады. Комиссия мүшелері мемлекеттік тілден Гундаревтің хабарсыз екенін біле тұра сөйтеді деп налиды. «Иногда мне снисходительно объяснят в двух-трех словах, о чем идет речь» деп ренжиді. Алпысты орталаған жасымның саналы бөлегін Қазақстанда өткізіп келемін, аздап қазақ тілінен де саңылауым болуы керек қой деген ойды ол кәперіне де алмайды.
Қысқасы, Гундарев қазақ тілінің мемлекеттік тілге айналуы республикада орыс тілін игеруге бөгесін болып отыр дейді. Тіпті екі тілді де бірдей игеру оның ойынша мүмкін емес сияқты. Қалайша қайран қалмассың...
Әрине, бұлай ойлайтындар, мықтап қателеседі. Қазақ тілінің мемлекеттік тілге айналуы ұлттың орыс тілін игеруіне бөгет бола алмайды. Былай деп те айтар едік. Егер қазақ халқының тілі Ата Заңымызда жазылған талаптың үдесінен шығатындай күн туса, біз, қазақ, бұл межеге ұлы орыс тілін, Пушкин, Толстой, Достоевский, Шолохов әдебиетін үйрене отырып жетеміз. Біреу-міреулердің қоқан-лоққысынан сескенгендіктен емес. Орыс тілін меңгеру біз, алаш баласы үшін қашанда ауадай қажет нәрсе.
Ұлы Абай: «Орысша оқу керек, хикмет те, мал да, өнер де, ғылым да – бәрі орыста зор» деген. Рас, Қазақ елінде экономика мен мәдениет, ғылым-білім жарығы Абай өмір сүрген заманнан бері өлшеусіз молайды. Сонда да ұлы ақын, кемеңгер хакім ғақлиясы көз ұшындағы уақытта маңызын жоймайды. Бұдан былай да бұлжымас ұлттық борышымыз саналады. Неге дейтін емес.
Дүние жүзінде 2000-нан аса тіл болса, соның екі-үшеуінде ғана адамзаттың мәдени, ғылыми жетістіктері мың миллиондаған басылымдарда жинақталған. Мұндай алтын қор, айталық, орыс кітапханаларынан молынан табылса, бізде ондай байлық белгілі тарихи себептермен әлі жеткілікті жасала қойған жоқ. Уақытында оған да қол жеткізерміз...
Қазіргі міндет – сол уақыттың жақындауын тездетуде. Өзімізге белгілі, біз әлемдік тарихты бұрын өзге елдерде жазылған кітаптар бойынша бағалап келдік. Енді, мына тәуелсіздік заманында біреудің шайнап берген асын қылғыта беруден сақтануға тиістіміз. Мәселе, ежелгі намысқойлығымызда ғана емес.
Ресей либерализмі бүгіндер «Николай Палкин» мен «Николай Кровавый» аталған патшаларды сүттен ақ, судан таза етіп көрсетуге тырысуда. Столыпиндей жер алғыш, жан алғышқа ескерткіш тұрғызайын деп жатыр. Бұл – Ресейдің ішкі ісі. Оған араласу әбестік болар еді. Бірақ «әр елдің заңы басқа, иттері қара қасқа» деген мәтел босқа айтылмаған ғой... Халық даналығынан ұғатынымыз, ұлт пен ұлттың мүддесі үйлесе бермейді. Тарихи тағдырлары әрқилы қалыптасқандықтан.
Біз – тәуелсіз елміз. Бұрындар бөтен ел бұрмалаған тарихымызды қалпына келтіруге тиістіміз. Бір шаңырақтың астында тұрған үш ғасырға жуық уақыттың ішінде Ресей императорларының қазаққа пайдасы тигені де болды, зиян жасағандары да аз болған жоқ. Соны бар ақиқатында көрсете білуіміз керек.
Николай ІІ патша Қазақстанды төрт губернияға бөлшектеп, мемлекеттілігіміздің жұрнағын қалдырмай жойып жіберді. Екатерина ІІ патша 1782 жылы қазақ жүздеріне мешіт салуға 20 мың рубль ақша бөлсе, бір ғасыр өткен соң қазақ империяның тең құқықты азаматы болудан қалды. Николай ІІ миссионерлік саясат жүргізіп, тіл, дін, ділімізді құртуға, қазақ халқын шоқындыруға, орыстандыруға барын салды. Шоқынды, шала қазақтардың пайда бола бастағаны сол кез. Ал, Ленин керісінше, қазаққа автономия беруі, мемлекеттігімізді қалпына келтіруі үстіне, жерімізді түгел дерлік жинап қайтарып берді. Орыс либералдары Ленинді қарғап-сілеумен келеді. Өз ұлттық тұрғымыздан осы фактілерге қалай қарауымыз керек?
Біз жаһан тарихын да өз еліміздің тарихына байланыста зерделеуге тиістіміз. Бұл айтылғанның әдебиет пен сын майданына да тікелей қатысы бар. Мәскеудегі Максим Горький атындағы Әлем әдебиеті институты секілді бізде де сондай институт құрылуға тиісті. (Әзербайжан да сол ел президентінің жарлығы бойынша қазір «Мировая литература в 150 томах» (2008-2013) атты бағдарлама ойдағыдай жүзеге асып, жаңа аудармаларға айрықша көңіл бөлумен қатар, ескі тәржімалар қайта қаралып, қатаң редакция жолымен сұрыпталуда). Ал мұндай институт құрылса, біз әлем әдебиеті тарихын өз ұлттық мұнарамыздан бағалауға, ұлттық құндылықтарды таразылаудың жаңа критерийіне ие болуға мүмкіндік алар едік.
Дүние жүзі әдебиеті институтын құрудың екі жолы бар. Біріншісі, бірден жаңадан ашу. Екіншісі, бірте-бірте даярлық жасап барып құру. Айталық, бүгінгі М.О.Әуезов атындағы Әдебиет және өнер институты жанынан американ, қытай, түрік бөлімдерін ашу оншама қиындыққа түсе қоймас еді.
Жиырма жылда жиырма ғасырлық қадам жасасақ та, әлі де үлгермей жатқан істеріміз жетерлік. Тіпті бұрынғы кей табысымыздан айырылып қалған жәйт те кездеседі. Кітап шығару ісінің мүлдем сын көтермейтінін айтып талайдан бері үкімет құлағын шулатумен келеміз. Ең басты кемшілік – кітап бұқаралық ақпарат құралы болудан қалды. Тиражы там-тұм. Ары кеткенде – 2000. Республика халқының саны 17 миллионнан асып жығылады. Алдағы төрт жылда 20 миллионға жетеміз деп отырмыз. Соншама жұртқа екі мың таралымды көзге тамызатын дәрі етсең де жетпейтіні хақ. Бір шөкім тиражды басылым кітаптану ғылымының тілінде қолжазба саналады. Яғни, БАҚ-тан өзгеше, топтық ақпарат (ТАҚ) құралына жатады. Тасқа басылса да Гутенберг әлемінің дүниесі саналмайды.
Жетпіс жыл бойы «Кеңес Одағы – әлемдегі ең демократияшыл ел» деп қақсадық. Енді бақсақ өтірік, жалған сөзге алданған екенбіз. Ауру қалса да әдет қалмайды демекші, енді қазір тиражы мысқалдай, жоқтың қасы басылымды баспа кітабы санап жүрміз. Мұның аты – көзбояушылық қой. Өзімізді өзіміз алдарқатудан арылатын уақыт жетті емес пе?!
Аз тиражды кітаптың әлегі де аз емес. Онсыз да жүгі ауыр бюджетке қосымша салмақ салады. Осыдан жиырма жыл бұрын кітап мемлекеттен бір тиын ақша алмайтыны үстіне, жылына 12-15 миллион рубль пайда келтіретін еді. Барды жоқ қылуды не деуші едік?
Тығырықтан шығудың, тиражды барынша көбейтіп, ақшалай пайда көрудің, бюджеттің мойнын босатудың жолы қандай? Оның кітаптану тарихында сыннан өткен бір ғана тәсілі бар: қағазға кететін шығынды барынша азайту керек. Біз қазіргі уақытта қағазды шетелдерден удай қымбат бағаға сатып аламыз. Қағазды өз елімізде өндірсек, жағдай өзгерер еді. Тәуелсіздіктің алғашқы жылдары Талдықорғанда қағаз өндіретін фабрика тұрғызылады деп естіп қуанып қалған едік, бірақ аяғы сиырқұйымшақтанып кетті.
Орманымызды отамай-ақ қағаз шығарудың ежелден келе жатқан тәсілін қолдануға болады. Кәдуілгі ақ қағаз үстіміздегі мыңжылдықтың VІІІ-інші ғасырында Самарқант шаһарында өндірілген болатын. Ол ормансыз, шөл-шөлейт жерде тұр ғой. Бізде не көп – сабан көп. Астықтың, күріштің. Қытайда бұл заттардан қағаз өндіретін кәсіпорындар біздің заманымыздың екінші ғасырында-ақ пайда болған. Қытай - қағазды ойлап тапқан ел. Сол көршіміздің технологиясына жаттығып үйреніп, 19 ғасыр өткен соң да бір қағаз жасайтын фабрика сала алмайтындай бізге не көрініпті. Бұл – бір.
Екіншіден, Баспа комитетін агенттік болса да жеке отау етіп қайта құрсақ дейміз. Өзге министрліктердің қолтығында тұншығып біткен бұл буынның тендер дейтінді өткізетінін естиміз. Өзге бір ісін, жаңалығын ести алмадық...
Жиырма жылдықтың жиырма ғасырға тепе-тең және бір ісі – «Мәдени мұра» атты бағдарлама ойдағыдай іске асуда. М.О.Әуезов атындағы Әдебиет және өнер институты он томдық «Қазақ әдебиеті тарихын» дүниеге келтірді. Заманымыздың заңғар жазушысы Мұхтар Әуезовтің 50 томдық академиялық толық жинағын жарыққа шығарды. 100 томдық «Бабалар сөзі» аяқталып келеді. Басқа да тындырылған іс аз емес. Республика мұражайларының экспонаттары жарқырап молыға түсті. Осы қатарға енді кітап мұражайы іліксе дейсің. Алматыдағы кітап мұражайы үйін кезінде екі-үш есе кеңейтудің жоба-сметасы жасалып еді. Бірақ тиісті көңіл бөлінбегендіктен сол баяғы жартас, сол жартас қалпында. Мұражай қызметкерлері жылдан жылға лақылдап түсіп жататын кітап өнімдерін сақтайтын орын таба алмай қиналуда.
Мен былай деп те айтар едім. Мәдени мұраның көкесі – кітап. Гомердің «Илиада» мен «Одиссея» атты поэмалары біздің заманымызға дейінгі 12-8 ғасырлар мөлшерінде жазылған. Содан бері жер бетінен талай мемлекет, қала, тұтас халықтар ғайып болды. Ал, Гомер туындыларының бір үтірінің мұрты қисайған жоқ. Оның сыры айтпаса да айқын: эпос-жыр алдымен қолжазба кітапта, сонсоң баспа кітабында сақталды. Бұдан туатын қорытынды: екі ғасырдан аса тарихы бар кітабымыздың біреуінің де шетінемеуін қадағалауымыз шарт. Кітап тіпті көпшілік кітапханаларда да дұрыстап сақталмайтынын көріп жүрміз. Қолдан қолға ауысқанда тозады, жыртылады. Ал, кітап мұражайы мен кітап палатасының қоймаларында ондай кінәрат ұшыраспайды.
* * *
Жиырма ғасырдың қызметін жиырма жылда атқарудың тағылымы да бағалы. Көркем сөз зергері Ғабит Мүсірепов: «Егінге кезінде жаумаған жаңбыр да зиян, кезінде түспеген күн де зиян», деп отырушы еді. Жиырма жылдықтың тағылымы – дер кезінде істелмеген істің зиянға шығатынын түсіндік. Уақыт екпінін, уақыт ырғағын сезінуіміз еселеп күшейді. Бұрынғы қазақы мимырт жүрісімізді, шабандау аяқ алысымызды ширатып, қапы кетіп қателескен жерімізді түзетіп, кеткен ұпайымызды толтырып та алғандаймыз. Иншалла, осы бетімізден Аллатағала айырмасын.
Шериаздан ЕЛЕУКЕНОВ.