Салықтық хабарландыруға, актіге дау айту және салық төлеушінің іс-әрекетіне дау айту туралы сотқа шағым жасаған кезде әдетте бірінші кезекте Конституция және Азаматтық іс жүргізу кодексімен (АЖК) реттелетін тараптардың теңдігі қағидасын негізге алады.
Мұндай санаттағы істі қараудың өзіндік ерекшеліктері бар және тараптардың мәртебесі туралы ерекше түсінікті қажет етеді. Осы жағдайға орай салық төлеуші салық органдарымен тең қатынаста екендігін және салық органдарының оның алдында міндеттемесі бар екендігін көрсете отырып, көп жағдайда қателіктерге ұрынып жатады. Мұндай жағдайда салықтық қатынастар бір жақтың екінші жаққа бағыныштылығына негізделетіндігін, яғни мемлекет атынан әрекет ететін салық органдарының салық төлеушіге қарағанда, үстем екендігін ескеруіміз керек.
Салық кодексінің 14-бабында көрсетілгеніндей, салық төлеуші салық жөніндегі міндеттемесін дер кезінде және толық көлемінде орындауға міндетті. Сондықтан салық төлеушінің қателіктері анықталған кезде салық органы оның алдында түсіндіру жұмыстарын жүргізіп, қателікті жоюды көрсетуге міндетті деген салық төлеушінің түсінігі қате болып табылады.
Салық төлеуші өз құқығын қорғау үшін мына жағдайды анық түсінуі керек. Салық кодексінің 14-бабындағы нормаларда көрсетілгеніндей, ол өзінің салық жөніндегі міндеттемелерін өз бетімен дербес, дер кезінде және толық көлемінде орындауы керек. Бұл жөнінде салық органымен арада келісімсіздік пайда болған кезде, ол жоғары тұрған органға немесе сотқа шағым жасай алады. Сондай-ақ, тағы бір түсініп алатын жайт, салық төлеушінің салық органының белгілі бір әрекетімен келісетін болса, осымен бұл мәселе шешімін тапты, яғни жабылды дегенді білдірмейді. Өйткені, Салық кодексінің 46-бабының нормаларында көзделгеніндей, салық қызметі органының салық пен басқа да бюджет алдындағы міндетті төлемдерді есептеуді немесе салынған соманы қайта есептеуді бес жыл бойы жүргізуге құқы бар.
Сондықтан салық төлеушінің экономикалық тұрақтылығы өз құқығын және заңды мүддесін қорғауда дұрыс көзқарас ұстауына байланысты. Демек, мамандандырылған біліктілік көмекті (салық салу мәселесі бойынша маманданған білікті бухгалтерлер, заңгерлер және адвокаттар көмегін) ескермеуге болмайды.
Салықтарды және басқа да бюджеттік міндетті төлемдерді белгілеу, жүргізу және төлеу тәртібін анықтау жөніндегі билік қатынасы Салық кодексімен реттеудің мәні болып табылады. Салық кодексі тек қана биліктік қатынасты реттеуге тиіс. Салықтар мен басқа да міндетті бюджеттік төлемдерге қатысы жоқ қатынастар Салық кодексі реттейтін іс ретінде қарастырылмайды. Дегенмен, Салық кодексінде тек қана салықтар және салықтық қатынастарды реттеу ғана емес, сонымен қатар басқа да (салықтық емес) мемлекеттік істер белгіленген. Салық кодексінде барлық мемлекеттік кірістерді біріктіру және белгілеу оның мағынасында қарама-қайшылықтардың пайда болуын жоққа шығара алмады. Заң шығарушы Салық кодексінің биліктік қатынасты реттейтіндігін жариялай отырып, мемлекеттің азаматтық айналымға тең дәрежелі қатысушы қызметінен туындайтын басқа да мемлекеттік кірістерінің түрлерін (жер телімдерін пайдалану үшін төлем секілді) санамалап көрсетеді. Мұндай жағдайда биліктік және азаматтық-құқықтық қатынастардың араласуы орын алады. Мәселен, Салық кодексінің реттеу мәніне жинақтаушы зейнетақы қорларына міндетті зейнетақы жарналарын төлеу жөнінде қатынас кіргізілмеген, аталған қатынасты Қазақстан Республикасының зейнетақымен қамтамасыз ету туралы арнаулы заңында қолданылады.
Осыған байланысты салық комитеті зейнетақы төлемдерін аударуға міндеттілік туралы, мәмілелерді жарамды емес деп тану туралы, заңды тұлғаны тіркеуді жарамды емес деп тану туралы талап-арыздарға бастамашылық етуге құқықты емес. Салық кодексінде салық комитетінің зейнетақы қорларына төлемдерді дер кезінде және толық орындауға бақылау жасау қызметі белгіленген. Бірақ бұл жағдайда ол жұмыс беруші мен жұмысшы, сондай-ақ мәміле жөнінде тараптар арасында құқықтық қатынас жөніндегі тұлға ретінде қосыла алмайды. Мұнда оның биліктік қатынасы белгіленбеген.
Мәселен, салық органы Әділет департаментіне және ЖШС-ға заңды тұлғаны тіркеуді заңсыз деп тану туралы талап-арыздың берілуіне бастамашылық жасай алады. Негіздемеде құрылтайшы – жеке тұлғаның ЖШС-ны құрмағандығы және оның бар екендігін білмейтіндігі көрсетіледі. Сонымен қатар, салық қызметінің органы талап-арызда салық қызметінің қандай құқығы қозғалғандығы және заңның қандай нормасының негізінде талап қойылғандығын көрсетпейді. Салық органы Азаматтық кодекстің (бұдан әрі - АК) 49-бабындағы тәртіпке сәйкес заңды тұлғаның таратылуы туралы талап-арызды жолдауға құқықты, мұндай жағдайда АК-ның 49-бабы 2-тармағының 2-тармақшасына сәйкес сот шешімі бойынша заңды тұлға заңсыз тіркелген деп танылған жағдайда заңды тұлға таратылуы мүмкін, яғни тіркеуді заңсыз деп тапқаннан кейін мүдделі тұлғаның талабы бойынша құқығы бұзылған тараптар, ол прокурор да болуы мүмкін.
Салық органы талап-арызда неліктен ЖШС құрылтайшысы – жеке тұлғаның мүддесіне сәйкес әрекет етіп отырғандығын көрсетпейді. Салық төлеуші өз бетімен де дербес түрде заңды тұлғаның өз атына тіркелгендігін немесе тіркелмегендігіне қатысты мәселені заңды жолдармен шеше алатындығы анық. Бұл жерде салық органы үшін басты қажеттілік жеке тұлғаның заңды тұлғаны өз затына тіркемегендігі туралы шындықты айтқанын анықтау, нақты заң бұзушыны айқындау болып табылады.
Салық органына салықтар мен басқа да бюджеттік міндетті төлемдерді толық орындауды қамтамасыз ету жүктелген. Заңды тұлғаны тіркеудің заңсыз екенін тану туралы талап-арызды берген кезде салық органы құқық қорғаушы рөлін, осыған сәйкес прокуратураның рөлін өз мойнына алады.
«Заңды тұлғаны мемлекеттік тіркеу және филиалдары мен өкілдіктерін есепке тіркеу туралы» Заңның 11-бабындағы нормаларда заңды тұлғаны құру мен қайта ұйымдастыру, жоғалған құжаттарды, жеке куәлігін ұсыну тәртібін бұзу, заңды тұлғаны мемлекеттік тіркеуден, қайта тіркеуден бас тартуға әкелетіні қарастырылған. Осыған байланысты заңды тұлғаны тіркеу сот арқылы АІЖК-нің 27-тарауында көрсетілгендегідей, мемлекеттік органның іс-әрекетіне дау тудыру туралы тәртіппен қаралады. Яғни салық органы ұсынғандағыдай талап-арыз тәртібімен қаралмайды.
Бір есептен қарағанда, соттың заңды тұлғаны тіркеуді заңсыз деп тануы ешбір дау тудырмайды, оған ешкім кінә тақпайды және мұнда күрделі мәселе де жоқ. Дегенмен заңды тұлғаны тіркеуді жою туралы шешімнің заңды тұлғаның контрагенттері үшін елеулі зардаптарын тигізетінін де анық. Егер салық заңнамасымен жалған кәсіпорыннан қосымша құн салығына жатқызылған соманы және соған сәйкес корпоративтік табыс салығынан алынуға жатқызылған соманы түзетуді сот белгілегендегідей жалған кәсіпкерлікпен айналысқан кезден бастап қарастыратын болса, онда заңды тұлғаны тіркеуді жойған кезден бастап оның салық төлеуші ретінде тіркеуден өткенен кейінгі әрекеттерінің бәрі заңсыз болып табылады. Әдетте контрагенттер заңды тұлғаны тіркеуді жою туралы сот актісінің барлығынан хабарсыз болады да және мұнан кейінгі елеулі салық төлеу кезінде өздерінің заң аясында әрекет еткендерін дәлелдей алмай жатады.
Мәселен, салықтық хабарландырудың дұрыстығы туралы дауды қараған кезде салықты есептеуді тағы да осындай сот шешімімен тіркеуі жойылған кәсіпорынның жүргізгендігі анықталды. Тіркеуді жойған кезде сот ЖШС-ны құрған жоқпын деген түсінік берген құрылтайшының түсіндірмесін есепке алған. Оның үстіне соттың тіркеуді жою туралы мұнан кейінгі шешімі орындалмаған және ол заңды тұлғалар тізімінен шығарылмаған. Ал ЖШС-ны құрған жоқпын деген мәлімет берген құрылтайшы ЖШС-дағы өз үлесін басқа тұлғаға сатқан. ЖШС басқа облыста қайтадан тіркеуден өткен. Мұндай жағдай көбінесе жеке тұлғаның азаматтық іс қарау кезінде дұрыс түсінік бермеуінен орын алады. Ол қылмысты іздестіру органдарының қолына түскен кезінен барып болған оқиғаның салдарының қайда апарып соғатындығы туралы шын мәнінде ойластыра бастайды.
Осы жағдайға байланысты заңды тұлғаны кімнің құрғандығы туралы мәселемен бірінші кезекте салықтардың және басқа да бюджеттік төлемдердің дұрыс түсуімен шұғылданатын салық органы емес, керісінше, ЖШС-ны құрған жоқпын деп мәлімдеген жеке тұлға және қылмысты іздестіру органы мен прокуратура шұғылдануға тиісті.
Қазақстан Республикасының резидент емес тұлғаларға қатысты қолданылатын салық заңдылықтары туралы да айта кету керек. «Қазақстан Республикасының Үкіметі мен Ұлыбритания Біріккен Корольдігі және Солтүстік Ирландия Үкіметі арасындағы қосарланған салықты болдырмау және кіріс пен мүлік құнының өсімі салығын төлемеудің алдын алу конвенциясында» (Лондон, 21.03.1994, 26.06.1996 жылдардағы заңмен ратификацияланған) мына мәселелер қарастырылған. Егер келісімге келген мемлекеттердің резиденті келісімге келген мемлекеттердің бірінің немесе екеуінің әрекеті оның салық төлеуін аталған конвенциясының ережелеріне сәйкестендірмесе немесе оның ісі осы конвенцияның 25-бабының 1-тармағына жататын болса, онда ол ұлттық заңдарында қарастырылған қорғау құралдарынан дербес түрде өз ісін қарауды өзі азаматы болып табылатын осы мемлекеттердің бірінің құзыретті органдарына ұсына алады. Мұндай жағдайда құзыретті орган шағым берушінің талабы негізді деп тапқан жағдайда және ол шешімге қанағаттанбаған жағдайда екінші елдің құзыретті органдарымен келісімге келе отырып істі қарайтын болады.
Бұл конвенцияның нормалары АК-тің үшінші бабынан ұлттық заңдардан артықшылықты құқыққа ие. Мұндай жағдайда біздің ойымызша шешім сотқа дейін қаралуы тиіс және дауларды сотта қарау қажеттігін жою керек.
Құзыретті органнан өзара келісімді жүргізу туралы оң қорытындыға ие болған салық төлеуші бәрібір өз ісінің сотта қаралуын талап етуі де мүмкін. Өйткені, Қазақстан заңнамаларында өзара келісімге келу кезінде салықтар мен оның өсімін тоқтату мәселесі қарастырылмаған, мұндай жағдай салықтық хабарландыруды сот тәртібінде қарағаннан кейін барып орнығады. Қазақстан жағдайында АІЖК-нің нормаларымен реттелетін өзара келісімді негіздеу арқылы қозғалған істі тоқтату әрекеті қарастырылмаған. Соттың да резидент емес тұлғаның әкімшілік шығыстары жөніндегі дәлелдерді зерттеу мүмкіндігі жоқ. Мұндай жағдай тек компания резиденті болып табылатын шет мемлекеттің құзыретті органы өз мәліметтерін бергенде ғана мүмкін болады.
АҚШ заңдылықтарында осы мәселеге байланысты өзара келісімге келу салықтың жартысын бюджетке төлегенде ғана мүмкін болады деп белгіленген. Ал шағымданушы кірістерін дәлелдеген жағдайда оған төлеген салық қаржысы қайта қайтарылады. Мұндай жағдайда мемлекет мүддесі де зардап шекпейді. Ал адал салық төлеуші осының нәтижесінде өзінің төлеген қаржысын қайтарып алу мүмкіндігіне ие болады.
Қазақстан заң шығарушысы өзара келісімге келу кезінде салықтық хабарландыру әрекетін тоқтатуды қарастырмау арқылы ол да мемлекеттік бюджеттің мүддесін қорғау талабынан келген деп есептеймін. Мұндай жағдайда да адал салық төлеушінің құқығы бұзылмайды. Өйткені, оған өзара келісімге келу кезінде өз ұстанымын дәлелдей алған жағдайда төленген салықтар мен олардың өсімі қайта қайтарылатын болады. Бұл жерде іс өндірісін тоқтау және азаматтық істің өзара келісімге келу нәтижесін күту тек қана ұзақ уақытты қажет етіп қоймай, сонымен қатар бюджетте салық сомасын уақытында ала алмауы қаупін тудыратындығын да айта кетпекпін. Өйткені, өзара келісімге келу кезінде салық төлеуші өз активтерін сыртқа шығарып әкетуі және есептелген салықтар мен өсімдерді төлеуден жалтаруы ғажап емес. Мұндай жағдай мәселенің осы бөлігіндегі келісімсіздіктерден туындайды.
Салық төлеушілер салық заңдылықтарында болатын мұнан кейінгі өзгерістерге де жиі иек артып жатады. Мұндай мәселеге қатысты «Нормативтік-актілер туралы» Заңның 37-бабының 1-тармағында қабылданған нормативтік-құқықтық актінің әрекеті ол іске қосылғанға дейінгі кезеңді қарастырмайтындығын айтамыз. Осы мәселе бойынша заңдылықтарға талдау жүргізе және осы жөніндегі мемлекеттік саясатты анықтай келе, ескерте кететін бір жағдай азаматтық заңдылықтар салыққа қатысты қолданылмайды және салық заңдылықтарына енгізілген мұнан кейінгі өзгерістерді заң шығарушының аталған мәселе жөніндегі өз ұстанымын өзгерткендігі деп есептеуге болмайды. Салықтық құқықтық қатынас дегеніміз – бұл салық төлеушіге мемлекеттің билік өкілеттілігі. Мемлекет салық төлеушіден қандай салық алу және қандай көлемде алу мәселесін өз бетімен дербес айқындайды. Оның үстіне салықтар мен олардың көлемдері өсу жағына да, төмендеу жағына да өзгеруі әбден мүмкін. Мұны мемлекеттің экономикалық саясаты айқындайды.
Әсемгүл СҮЛЕЙМЕНОВА, Астана қаласының мамандандырылған ауданаралық экономикалық сотының судьясы.