Қазақстан Республикасы Тәуелсіздігінің 20 жылдығы қарсаңында мемлекетіміздің білім беру саласында «Қазақстан Республикасындағы білім беруді дамытудың 2011-2020 жылдарға арналған мемлекеттік бағдарламасы» мен «Интеллектуалды ұлт – 2020», «Ғылым туралы» мемлекеттік бағдарламалары аясында Білім және ғылым министрлігі тарапынан іргелі іс-шаралар атқарылуда. Елбасымыз өзінің биылғы жылғы «Болашақтың іргесін бірге қалаймыз» Жолдауында атап көрсеткеніндей, бүгінгі күннің басты талабы да елімізді дүние жүзіндегі алдыңғы қатарлы елу елдің қатарына қосатын, қазіргі әлемдік өркениет бәсекесіне лайық интеллектуалды тұлға, интеллектуалды ұлт қалыптастыру.
Еліміздің ғылыми әлеуеті мен инновациялар жүйесін әлемдік озық деңгейдегі биік белестерге көтеру негізі білім беру саласындағы іргелі реформалар арқылы жүзеге асуда десек, ЮНЕСКО-ның 2011 жылғы Бүкіләлемдік «Білім – барлығы үшін» есепті баяндамасында Қазақстан білім беруді дамыту индексі бойынша 129 мемлекеттің ішінде алғашқы төрт көшбасшы мемлекеттер қатарына еніп отыр. Білім және ғылым министрлігінің мәліметі бойынша, бұл рейтингте біз ТМД мемлекеттері ішінде де көш бастап отыруымыз (Белоруссия – 26, Өзбекстан – 48, Украина – 53-ші орындарда) қуанарлық жәйт.
Халықаралық ІMD бәсекеге қабілеттілік рейтингісі бойынша да соңғы екі жылда қатарынан Қазақстан халқының ересек азаматтар арасындағы сауаттылық деңгейі бойынша әлемде көш бастап, бірінші орынды иеленіп келеміз. Кез келген мемлекеттің әлеуметтік-экономикалық дамуының негізгі нәтижелі индикаторы болып табылатын адам дамуы индексінің бұл көрсеткіштері – Қазақстандағы білім беру саясатының дұрыстығын күн санап дәлелдеп отыр. Ең бастысы, мемлекетіміздің әлемдік деңгейде бәсекеге қабілетті, білімді, білікті, креативті идеяларға бай адами капиталға ие ұлт ретінде танылуы.
Бұл – Президентіміз Нұрсұлтан Әбішұлының дана көшбасшылығымен атқарылып жатқан игі істердің жемісі, бүгінде әлем мойындап, «әлемдік деңгейдегі көшбасшы мемлекет қайраткері» ретінде танылып отырған Елбасымыздың және Елбасымен бірге келе жатқан барша Қазақстан халқының жеңісі.
Президент Н.Ә.Назарбаев еліміз егемендік алған алғашқы күндерде-ақ: «Бостандық пен тәуелсіздікті жеңіп алу жеткіліксіз, оны табанды түрде қорғап, нығайтып, ұрпақтарға қалдыру қажет», деп көрсеткен еді. Бүгінде мемлекет болашағын тәрбиелеумен айналысатын білім ошақтарының, барша ұстаздар мен ғалымдар алдында келелі міндеттер тұр және бұл салада Білім және ғылым министрі Б.Жұмағұловтың басшылығымен бірқатар игі істер атқарылуда.
Орта білім беру саласына орталықтандырылған вертикальді мемлекеттік бақылау орнату, мектептегі білім сапасын көтеру, модернизациялау бағытында арнайы пән мұғалімдерінің форумдарын өткізу (үстіміздегі жылы мамыр айында өткен математика пәні мұғалімдерінің алғашқы съезі), ұстаздар біліктілігін көтеруге ваучерлік-модульдік қаржыландыруды енгізу, халықаралық «Болашақ» бағдарламасы аясында жаңа формациядағы кәсіби біліктілігі жоғары педагогтар дайындау үшін 2011 жылдан бастап квоталы орындар бөлінуі, оқулықтар сапасына үш сатылы талқылау өткізу – тек орта білім беру саласындағы білім сапасы мен қоғамдағы ұстаз мәртебесін көтеру мақсатында атқарылып жатқан қыруар іс-шаралардың бірегейі ғана ел тарихындағы реформаторлық жаңа қадамдар.
Ал жоғары білімді кәсіби мамандар даярлайтын жоғары оқу орындарына келсек, барша профессор-оқытушы ғалымдар құрамы үстіміздегі жылдың 1 қаңтарынан іске қосылған «Қазақстан Республикасындағы білім беруді дамытудың 2011-2020 жылдарға арналған мемлекеттік бағдарламасын» – «Қазақстан-2030» Стратегиясында көрсетілген білім беру саласындағы мемлекеттік саясат пен Қазақстан Президентінің «Қазақстан Республикасы дамуының 2020 жылға дейінгі стратегиялық жоспары туралы» Үкімін іске асыруға арналған негізгі құжатын басшылыққа ала отырып, Білім және ғылым министрлігімен бірлесе келелі істерді жүзеге асыруда.
Қазақ мемлекеттік қыздар педагогикалық университеті – Қазақстандағы 67 жылдық даму тарихы бар іргелі оқу орындарының бірі. Негізгі бағыты – мектеп ошақтарына кәсіби мамандар дайындайтын әрі тек қыз балалар ғана оқитын оқу орны болғандықтан, отандық университеттер плеядасында өзіндік орны мен ерекшелігі бар оқу ордасы. Жетпіс мыңнан аса түлегі Қазақстанның бар аймағы мен шет мемлекеттерде еңбек етіп жүрген университетте күні бүгін 43 мамандық бойынша 9248 студент, 21 мамандық бойынша 139 магистрант білім алып жатқан болса оларға 718 профессор-оқытушылар дәріс оқуда.
Қазақстан білім беру жүйесінің Болон декларациясына, Лиссабон конвенциясына кіруіне байланысты үш деңгейлі мамандар дайындау жүйесі толығынан енгізіліп, оларды дайындауда академиялық ұтқырлық мәселелерін шешу шұғыл қолға алынды. Жедел түрде биылғы оқу жылының бірінші семестрінде еліміздің беделді жоғары оқу орындарымен келісім-шарттар жасалынып, іске асырылды. Қазіргі кезеңде Жетісу мемлекеттік университетімен, Абай атындағы ҚазҰПУ-мен, Павлодар мемлекеттік университетімен, Бөкетов атындағы ҚарМУ-мен, Атырау университетімен студенттер алмасу қолға алынса, сонымен қатар, Ресей, Түркия, Малайзия мемлекеттерінің белді университеттерімен екі дипломдық білім беру туралы келісімдер жүргізілуде.
Университеттің білім беру кеңістігі күн санап кеңеюде. Аз ғана уақыт ішінде Синьцзян педагогикалық университетімен (Қытай), Миссиссипи мемлекеттік университетімен (АҚШ), Нигде университетімен (Түркия), Томск политехникалық ұлттық зерттеу университетімен (Ресей) келісім-шарттарға қол қойылды. Қазақ мемлекеттік қыздар педагогикалық университеті мен Шыңжаң педагогикалық университеті арасындағы байланысты нығайту үшін Қытай елінің мәдениеті мен салт-дәстүрін дәріптеу және қытай тілін үйрету мақсатында «Қытай тілі орталығы» жұмыс жасай бастады. 2011-2013 жылдар аралығында университетте халықаралық ынтымақтастықты нығайту барысында Шыңжаң педагогикалық университетінің оқытушысы жұмыс істеуге келді.
2011-2012 оқу жылында Қазақстан Республикасы Президентінің «Болашақ» халықаралық бағдарламасы бойынша бір жылдық ғылыми тәлімнамаға Санкт-Петербург, Мәскеу қалаларына психология, физика, жалпы педагогика, музыкалық білім кафедраларынан 4 оқытушы, Австралия мемлекетінің Grіffіth университетіне шет тілдер факультетінен 2 оқытушы жіберілді.
Университетте Білім және ғылым министрлігінің қаржылай қолдауымен бірнеше іргелі және қолданбалы жобалар бойынша ғылыми-зерттеу жұмыстары жүргізіледі. Олар: «Педагогикадағы әдістемелік ілім құрылымының ғылыми негіздерін ұлттың интеллектуалды потенциалын дамытудың факторы ретінде қарастыру», «Қазақстан Республикасындағы білім беру жүйесіне гендерлік тұрғыдан қарау», «Орыс тілін қазақ әдеби тілі туралы ғылымда арнайы терминология трансляторы ретінде қарастыру мәселелері» тақырыбындағы және «12 жылдық оқуға өту кезеңіндегі мектепке дейінгі білім беруді дамытудың ғылыми-әдістемелік негіздерін құру» тақырыбындағы жобалар.
2011 жылдың тамыз-қыркүйек айларында университет салалық министрліктің қаржыландыруымен өтетін іргелі және қолданбалы жобалар бойынша ғылыми-зерттеу жұмыстарының конкурсына 11 ғылыми жоба, Алматы қаласы Кәсіпкерлік және өнеркәсіп басқармасының «Инновациялық ғылыми-зерттеу жұмыстарының конкурсына» 3 ғылыми жоба, Жастар саясаты басқармасының І инновациялық конвентін өткізуіне орай ұйымдастырған ғылыми-зерттеу жұмыстарының конкурсына 2 ғылыми жоба жіберді. Университет қабырғасында «Әлеуметтік гендерлік ғылыми-зерттеу» институты, «Қазақ мектебінің даму мәселелері» зертханасы жұмыс жасайды. Алдағы уақытта университеттің ғылыми-зерттеу әлеуетін саралай отырып, мамандандырылған оқу зертханаларын (Жаңарып тұратын энергия көздерін пайдалану зертханасы т.б.), ғылыми-зерттеу орталықтарын (Педагогикалық және психологиялық зерттеулер, Өзін-өзі тану ғылыми-зерттеу, «Химия» Қазақстан-Ресей инновациялық ғылыми білім беру орталықтары) ашу қарастырылуда.
«Қазақстан Республикасының білім беруді дамытудың 2011-2020 жылдарға арналған мемлекеттік бағдарламасында» республикалық жоғары оқу орындары арасындағы электрондық кітапханаға 2010 жылы 26% оқу орындарының мүше екендігін көрсете отырып, бұл көрсеткіштің 2015 жылы 55%, ал 2020 жылы 100% болу қажеттілігі баса айтылған. Қазіргі таңда университет ғылыми кітапханасын электронды кітапхана ретінде жабдықтау жұмысы шұғыл түрде қолға алынып, ҚР Ұлттық кітапханасының тәжірибесіне сүйене отырып, стратегиялық жоспары жасалуда.
Сонымен қатар, білім берудегі жаңа технологияны меңгерудің негізгі тетіктерінің бірі – жоғары оқу орындары оқытушыларының кәсіби біліктілігін көтеру мәселесі десек, мемлекеттік бағдарламада бұл көрсеткіш 2010 жылы 6% болғандығы, ал 2015 жылы 20% болу қажеттігі көрсетілген. Бұл бағытта университет жанындағы ғылыми-педагогикалық кадрлар біліктілігін арттыру орталығының 2011-2015 жылдарға арналған арнайы бағдарламасы бекітілді. Электронды оқыту жүйесін оқыту, оны оқу процесінде қолдану мәселесі бойынша үстіміздегі жылдың қыркүйек айында университеттің 60 оқытушысы «E-Learnіng – электрондық оқыту және оның Қазақстан Республикасындағы білім беруді дамытудың 2011-2020 жылдарға арналған мемлекеттік бағдарламасы аясындағы рөлі мен орны» тақырыбында 36 сағаттық, қазан айында 30 оқытушы «Кейстерді дайындау технологиясы» тақырыбында 36 сағаттық университет тарапынан қаржыландырылған әдістемелік семинар-тренингтен өтті.
Әлбетте, бір мақала көлеміне бүкіл ұжым атқарып жатқан келелі іс-шараларды сыйғызу мүмкін емес. Әйтсе де, бір ұжымның жетістіктері арқылы егемен еліміздің елеулі табыстарына көз жеткізуге болатындай.
2011 жыл – Қазақстан Республикасы Тәуелсіздігіне 20 жыл толып отырғаны өзімізге белгілі. Міне, биылғы жыл осы жиырма жыл ішінде жеткен жетістіктерімізді бағамдап, болашағымызға бағыт сілтеп, әлемдік кеңістіктегі биік белестерге жетелеген тарихи жыл болып отыр. Дүние жүзінде көрініс тапқан соңғы оқиғалар Тәуелсіз жас мемлекетіміз ұстанған бағыттың дұрыстығын, Елбасы саясатының көрегендігін күн санап дәлелдей түсуде. Соның бірі – білім беру жүйесін жетілдіру, бұл салаға бағытталған мемлекеттік инвестиция көлемінің өркениетті елдер деңгейіне жеткізілуі. Біздің басты байлығымыз – бәсекеге қабілетті, кәсіби білікті әрі жоғары білімді, рухани жан-дүниесі таза, Отанын шексіз сүйетін әрі мақтан тұтатын, интеллектуал тұлғалардан тұратын адам капиталы. Қазіргі уақыт, Елбасымыз көрсеткендей, «адамзат биігін білекпен емес, біліммен бағындыру заманы». Жоғары білімді қоғам ғана бүгінгі халықаралық аренада ірі жеңістерге жетпек.
Динар НӨКЕТАЕВА, Қазақ мемлекеттік қыздар педагогикалық университетінің ректоры.