Мемлекеттік үдемелі индустриялды-инновациялық бағдарламасы аясында «ҚазТрансОйл» АҚ-ның инновациялық-технологиялық жаңғырту бағдарламасын жүзеге асыру бағытында компанияның Шығыс филиалында «Павлодар» орталық диспетчерлік пункті іске қосылды. «ҚазТрансОйл» АҚ - еліміздің мұнай құбырлары жүйесінің елеулі бөлігін пайдаланатын «ҚазМұнайГаз» ҰК» АҚ еншілес компаниясы болып табылады. Жаңа жоба магистралды мұнай құбырларын алыс қашықтықтан сенімді түрде басқаруға және бақылауға мүмкіндік беретін үздік әлемдік тәжірибелер негізінде жүзеге асырылған алғашқы орталық басқару жүйелерінің бірі болып отыр. Орталық басқару жүйесінің іске қосылу рәсіміне «ҚазТрансОйл» АҚ бас директоры Қайыргелді Қабылдин, «ҚазТрансОйл» АҚ Шығыс бөлімшесінің директоры Жеңісбек Лұқпанов, облыс әкімі Бақытжан Сағынтаев қатысты.
Компания ұзындығы 5 495,27 шақырым мұнай құбырлары және ұзындығы 2 148,1 шақырым су ағар желілерін басқарады. Компания қазіргі кезде елімізде өндірілетін мұнайдың 58 пайызына дейін тасымалдауды жүзеге асырады. Өткен жылы «ҚазТрансОйл» АҚ тасымалдаған мұнай көлемі 52,5 миллион тонна болса, биылғы жылдың 11 айында 49,3 миллион тоннаны құраған. Ал, компанияның Шығыс филиалының негізгі құрылымдық бөлімшелерінде 2006-2010 жылдар аралығында 13-ке жуық осындай жергілікті басқару жүйелері кезең-кезеңмен пайдалануға берілді. Индустриялды-инновациялық жобалар қатарында жаңарып қайтадан іске қосылған бұл орталық басқару жүйесі тек бақылаушының ғана міндетін атқармайды. Ол жалпы ұзындығы 4298,6 шақырым болатын Омбы-Павлодар, Павлодар-Шымкент, Құмкөл-Қарақойын, Кеңқияқ-Құмкөл, Атасу-Алашаңқай магистральды мұнай құбырларын қашықтықтан басқару орталығына айналып отыр. Енді осы орталық басқару жүйесі арқылы мұнай құбырларының бағыттарын 3 ауысымда басқару тетігінде отырған диспетчерлер бақылап отыратын болады. Бұрынғыдай аудандық басқару бөлімшелері деңгейінде басқару енді болмайды. Өйткені, жаңадан қолға алынған модернизациялау, қайта жаңғырту жұмыстары барысында автоматты өрт сөндіру жүйесі, газ дабылы, апатқа қарсы қорғаныш, мұнай құбырларын күзету жүйелері, құбырларды электр-химиялық қорғау стансалары механикаландырылып қауіпсіздік қызметінің арнайы SCADA жүйесіне қосылды. Жалпы, «ҚазТрансОйлдың» Шығыс филиалында орталық басқару жүйесін жаңартудың негізгі міндеті -бақылау қызметтерін қоса алғанда мұнай тасымалы құбырларында еңбек ететіндердің де қатарын қайтадан жаңалау болып отыр. Яғни, бұл дегеніміз, заманауи автоматты технологияны енгізу арқылы жасалады. Бұл өткен жылы бекітілген «ҚазТрансОйл» АҚ-тың жедел автоматты басқару жүйесін дамыту тұжырымдамасына да сәйкес келеді. Жоғарыда аталған SCADA жүйесі аппараттық және бағдарламалық қамтамасыз ету кешені болып табылады. Сонымен қатар, магистральды мұнай құбырларының мұнай айдаушы стансалары, мұнай құбырларының желілік бөліктері сияқты технологиялық нысандарды қашықтықтан бақылауға және басқаруға арналған. Екіншіден, бұл жүйе магистральдық және тірек сорап агрегаттарын, мұнай құбырлары желілік бөліктерінің телемеханика жүйелерін бақылау және басқару, сұйық қоймалар деңгейін өлшеу, мұнай есебін жүргізу коммерциялық тораптарын, қосалқы жүйелерді бақылау мен басқаруды қамтиды. Магистральды мұнай құбырларының технологиялық нысандарын қашықтан бақылау мен басқаруды заманға сай жүзеге асыру мұнай тасымалдау бойынша уақытылы, сапалы әрі бәсекеге қабілетті қызметтерді қамтамасыз етудің қажетті шарттарының бірі. Жабдықтар жұмысының сенімділігін арттыруға, технологиялық үдерістің ақпараттылығын және тұтас алғанда жүйенің істен шықпауына әсер етеді.
«Павлодар» диспетчерлік орталығының ашылу рәсімінде сөз алған «ҚазТрансОйл» АҚ Бас директоры Қайыргелді Қабылдин аталмыш диспетчерлік орталық бұрынғы Кеңес елдерінде және Қазақстанда бұрын-соңды болмағанын, сол секілді ол компанияның инновациялық дамуға бағытталған бағдарламасының жемісі екенін атап өтті. Бұл инновациялық жаңашылдық жалғасын табатын болады. Болашақта компания еліміздегі барлық мұнай құбырлары жүйесін автоматтандырып, ел жүрегі Астанадан басқарылатын бас диспетчерлік орталық құру жоспары барын да жеткізді.
Жалпы, осы жаңадан пайдалануға берілген орталық басқару жүйесі заманауи жабдықтармен және бақылау-өлшеу құралдары мен әлемнің Siemens, Endress+Hauser, Emerson, Auma, Biffi секілді озық өндірушілерінің арнайы бағдарламалық жүйлерімен қамтамасыз етіліп, AC800F, ABB автоматтандыру жүйесінің бағдарланатын логистикалық бақылаушы және технологиялық үрдістерді автоматтандыру саласындағы көшбасшы компаниялар Simatic S-7, Siemens-тің өнеркәсіптік қауіпсіздік жүйесімен; SCADA WinCC 7.0, Siemens жүйесін бағдарламалық қамтамасыз етумен; өткізу қабілеті 100 мБ/секундтан төмен емес байланыстың талшықты-оптикалық кабелі негізіндегі телекоммуникация жүйесімен жасақталған қашықтықтан басқару орталығы болады. Орталық басқару жүйесін іске қосу мұнай құбырлары қызметінің бекітілген тәртібі негізінде мұнай құбырларын бақылау және басқару; жеке қызметкерлер құрамын оңтайландыру және саны аз адам құрайтын технологияларға көшу, энергия сыйымдылықты төмендету және сәйкесінше мұнай тасымалы кезінде электр энергиясын тұтынуды оңтайландыру есебіне шығынды азайту, диспетчерлік және өндірістік есептілікті автоматты құру; шынайы уақыт тәртібінде технологиялық құрал-жабдықтар және жеке құрамның жұмысын бақылау; мұнай құбырлары қызметінің сенімділігін арттыру, жеке қызметкерлер құрамының жарақат алу тәуекелін азайту, мұнай тасымалы үдерісін болжау мүмкіндігі; еңбек өнімділігін арттыру мақсаттарын жүзеге асыруға мүмкіндік береді. Жаңа жоба энергия тиімділігі және мұнай тасымалы жолдарын оңтайландыру бағдарламасын жүзеге асырудың кезекті кезеңі болып табылады. SCADA жүйесі негізінде құрал дайындалды, оның көмегімен әрі қарай болжау, оңтайландыру және тәуекелдерді бағалау тетіктерімен барлық өндірістік жүйелер автоматтандырылады.
Фарида БЫҚАЙ,
Павлодар.