Жуырда Орталық коммуникациялар қызметінде Қазақстан Республикасының жоғары оқу орындарындағы білім беру бағдарламасы рейтингінің бірінші кезең нәтижелеріне арналған баспасөз мәжілісі өтті. Оған Білім және ғылым вице-министрі Талғат Ешенқұлов, «Атамекен» Ұлттық кәсіпкерлер палатасының басқарушы директоры Олжас Ордабаев және құрылыс саласы бойынша сарапшы Әлібек Марданов қатысты.
Мәжілісте Білім және ғылым министрлігі мен «Атамекен» Ұлттық кәсіпкерлер палатасы жоғары оқу орындарының білім беру бағдарламаларын бағалауда бірлесіп жұмыс атқарып отырғандығы айтылды. Бүгінде 33 мамандықтың рейтингі дайындалған. Зерттеу жұмысқа орналасқан түлектер проценті мен олардың орташа еңбекақысы, бағдарламаның өзектілігін бағалау, сондай-ақ түлектердің сауалдама қорытындысы маңызды өлшем болатын әдістемеге сәйкес жүргізіледі. Түлектер мен олардың жұмысқа орналасуы туралы мәліметтер Жоғары білімді басқарудың бірыңғай жүйесінен алынды. Сондай-ақ Білім және ғылым министрлігі берген мәліметпен салыстырылып тексерілді.
Жиында белгілі болғандай бірінші кезеңде Білім және ғылым министрлігінен алынған иесі көрсетілмеген мәліметтермен расталған былтырғы түлектердің жұмысқа орналасу проценті мен орташа еңбекақыға сараптама, профессор-оқытушылық құрамның іс жүзіндегі тәжірибесіне, жоғары оқу орындарының білім беру бағдарламаларына салатын инвестицияларына, білім беру бағдарламаларын дайындау дерегіне, элективті пәндер каталогына, салалық қауымдастықтар мен жұмыс берушілер бірге жасаған силлабустарға, білім беру бағдарламаларының халықаралық аккредитациядан өтуі туралы мәліметтеріне сараптама жүргізілген.Ал екінші кезеңде салалық сарапшыларды қатыстыра отырып, білім беру бағдарламаларының мазмұндық алшақтығы бағаланып талданған. Айталық, «Құрылыс» мамандығы 35 жоғары оқу орнында бар. Оларды сарапшылар мемлекеттік органдардың ескірген атауларын қолдану, нормативтік-құқықтық базаның өзекті болмауы, білім берудің жалпы теориялық деңгейі сияқты фактілерге сүйене отырып бағалаған.
Сонымен қатар сарапшылар берілген бағдарламалар Білім және ғылым министрлігі бекіткен формаға сәйкес еместігін сондай-ақ орфографиялық және стилистикалық қателіктері бар екенін атап өтті.
Негізінен профессорлық-оқытушылық құрамның іс жүзіндегі тәжірибелік өтілі зор маңызға ие. Айталық, Л.Н.Гумилев атындағы Еуразия ұлттық университеті, Е.Бөкетов атындағы Қарағанды мемлекеттік университеті тәжірибелі мамандарды тартуға ерекше көңіл бөледі. Ал Орталық Азия университеті, Каспий қоғамдық университетіне іс жүзінде тәжірибесі бар оқытушыларды іздестіруге көп көңіл бөлуге кеңес берілді.
Мәжілісте көтерілген тағы бір мәселе еңбекақы деңгейінің еңбек нарығына шыққан түлектердің кәсіби дайындығына тікелей байланыстылығы жайы болды. Бұл фактор жоғары оқу орындарын біліктілігі жоғары профессорлық-оқытушылық құрам мен сапалы білім бағдарламасымен аяқтаған түлектер нарықта бәсекеге қабілетті болатынын көрсетеді, тиісінше олар әлдеқайда жоғары еңбекақы алады.
Еліміз бойынша жоғары еңбекақы «Мұнай-газ ісі» мамандығында тіркелген, орташа еңбекақы 250 000 теңге, ал ең төменгі еңбекақы – «Биотехнология» мамандығын тәмамдаған (орташа еңбекақы – 70 000 тг) түлектер үлесінде екен.
Сонымен қатар жоғары оқу орнын бітіргеннен кейінгі алғашқы жылы жұмысқа орналасу дерегі де маңызды. «Мұнай-газ ісі» мамандығы бойынша білім алған түлектерде үздік көрсеткіш – 84%; «Биотехнология» мамандығын бітірген түлектердің жұмысқа бірден орналасу көрсеткіші төмен 56%-ті құрайды.
Айта кетейік, осы жылдың соңына дейін Ұлттық кәсіпкерлер палатасы 50-ден астам мамандықтың рейтингін ұсынатын болады.
«Егемен-ақпарат»