Кеше Астанадағы «Ақ жол» партиясының орталық кеңсесінде: «Қазақстан Республикасында зейнетақымен қамтамасыз ету проблемалары. Жетім балалардың, мүгедектердің, күнкөрісі төмен адамдардың әлеуметтік бейімделуі үшін лайықты жағдай жасау» деген тақырыпта дөңгелек үстел өтті.
«Ақ жол» партиясы мемлекеттік саясаттың басты мақсаты – азаматтардың материалдық әл-ауқатын үздіксіз арттыру, халықты әлеуметтік қорғау және әлеуметтік қамтамасыз ету реформасын дәйектілікпен жүргізу, әлеуметтік әділеттілікті сақтау, зейнетақымен қамтамасыз ету. Бұлар қоғамдағы маңызды мәселелердің негізгі буындарының бірі екені анық.
Қазақстанда зейнетақымен қамтамасыз етудің үш деңгейлі жүйесі қолданылатыны белгілі: жасына қарай арқаулық жәрдемақы, бюджет қаражаты есебінен төленетін ортақтас (еңбек) зейнетақы, жинақтаушы және ерікті зейнетақы. «Ақ жол» партиясы төрағасының орынбасары Л.Жуланованың айтуына қарағанда, «Ақ жол» партиясы зейнетақымен қамтамасыз етудің барлық үш деңгейінде туындаған проблемаларды шешуді қажет деп санайды. Олардың пікірінше, жалпы алғанда, зейнетақы жүйесі жаңғыртуды қажет етеді. Өте маңызды есеп айырысулар негізінде қазіргі заманғы, теңдестірілген зейнетақы жүйесінің ұзақ мерзімдік стратегиясын әзірлеу керек. Қазақстан Республикасының жинақтаушы зейнетақы жүйесінің тиімді жұмыс істеуін көздейтін ұзақ мерзімдік бағдарлама қабылдау, жинақтаушы зейнетақы қорларының кірістілігін арттыратын институттық тетіктерін әзірлеу, олардың инвестициялық мүмкіндіктерін кеңейту де бүгінгі күннің талабынан туындайды.
Отырыс аясында Л. Жуланова мынаны атап айтты: «Саны 6-8-ден аспайтын қорды сақтап, жинақтаушы зейнетақы қорларын ірілендіру, жинақтаушы зейнетақы жүйесінде әкімшілік шығыстарды азайту ұтымды болады деп есептейміз. Еңбек және халықты әлеуметтік қорғау министрлігінің халықтың зейнетақы жинақтарының нақты жағдайына мониторинг және болжам жасауына жауапкершілігін арттыру қажет. Өз қызметкерлеріне ерікті кәсіби зейнетақы жарналарын аударған жұмыс берушілер үшін ынталандыру шаралары жасалуға тиіс», деді ол.
Отырыста жұмыс істеп жүріп, зейнетақы қорына ерікті зейнетақы жарналарын аударған азаматтарды мемлекет ынталандыра алатыны, зейнеткерлік жастағы адамдарды экономика саласындағы жұмысқа тарту тәжірибесін кеңейту қажеттігі, жетім балаларға, мүгедектерге, зейнеткерлерге, күнкөрісі төмен адамдарға лайықты жағдай жасау үшін Үкімет шаралар кешенін қабылдау қажеттігі де назардан тыс қалмады.
Дөңгелек үстелдің жұмысына жинақтаушы зейнетақы қорларының, Еңбек және халықты әлеуметтік қорғау, Білім және ғылым министрліктерінің өкілдері, қала кәсіпорындарының басшылары, ҮЕҰ өкілдері, осы проблемаларды шешуге тиіс қызметтер қатысты.
Қарашаш ТОҚСАНБАЙ.