Елбасы Нұрсұлтан Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында қойылған міндеттер үдесінен шығу жолында бірқатар жұмыс қолға алынуда. Атбасар ауданындағы «Баха-Зен» жауапкершілігі шектеулі серіктестігінің сұлы жармасын өндіретін цехтың құрылысын бастауы – нақты істің көрінісі.
Әкелі-балалы Уәлихан мен Ғалымжан Әріповтер – іскерліктерімен аты шыққан азаматтар. Заречный ауылын жұтындырып қойды, ауыл шаруашылығы саласын өрге сүйреп келеді. Бүгінгі таңда көктемгі және күзгі дала жұмыстарын «CLASS» маркалы 30 астық комбайны мен 12 «John Deere» тұқым себу кешендерімен атқарады. Оған қоса, «Morris» және «Byller» фирмаларының заманауи техникалары мен жабдықтары бар. Осындай күш-қуаттың арқасында технологиялық жүйелер толығымен жаңғыртылып, жоғары өнімділікке қол жеткізуде. Былтыр көктемде 30 мың гектардан астам алқапқа он күннің ішінде дән сеуіп үлгерді. Күзде айтарлықтай мол өнім жинады. Ендігісі – өнімді өңдеу.
Агротехникалық шаралар уақтылы атқарылған соң егін шығымы да көңіл тоғайтарлық. Аудандық орташа көрсеткіштен екі есе асып түсу дәстүрге айналған. Бидай, арпа, сұлы дақылдарын өсіру бағытындағы элиталық тұқым шаруашылығы мәртебесіне ие. Егіншілік саласын әртараптандыруда А.Бараев атындағы ғылыми-зерттеу институтының ғалымдарымен жасалған ынтымақты байланыс өз жемісін беріп отыр. Серіктестіктің аудандастырып, сынақтан өткізген тұқымдарын Солтүстік Қазақстан мен Қостанай облыстарының диқандары пайдалануда.
– Өз өнімімізді өзіміз өңдеу, өңделген өнімді Қазақстанның бренді ретінде алыс-жақын шетелдерге, Еуропаға шығару көптен бері көкейде жүрген арман еді, – дейді «Баха-Зен» серіктестігінің директоры Ғалымжан Әріпов.
Покровка ауылының жанында цех салуға әбден лайықты алаң бар. Осы жерде ерте көктемде сұлы өнімдерін өндіретін цехтың құрылысын бастап кетпекші. Сұлы үгетін құрылғының ең озығын шетелден алдырмақ. Сондықтан да құны қымбат. Жалпы, осы цехқа өз есебінен 1 миллиард 300 миллион теңге қаржы салмақ. Қазір елу пайызын төлеп қойған. Есебінше, он тонна сұлыдан 6 тонна жарма дайындалады. Кешен бір сағатта екі тонна сұлыны үге алады. Сұлы жармасының бағасы туралы айтуға әлі ертерек. Өйткені цех іске қосылған кезде нарықтағы бағаның қандай болатындығын болжау қиын.
– Бір жылға он мың тонна сұлы қажет, – дейді серіктестік директоры. – Мұндай көлем өзімізде өндіріледі. Сондықтан шикізат жөнінде ешқандай қолбайлау болмайды. Ең бастысы, Елбасы Жолдауында атап көрсетілгендей, халықтың әл-ауқатын көтеруге шарапатымыз тисе дейміз. Цех іске қосылған кезде жергілікті тұрғындардың 15-і тұрақты жұмыспен қамтамасыз етіледі. Екінші жағынан өз өнімімізді шикізат күйінде емес, өңдеп ұсынамыз.
Шынында да қазір сауда сөрелерінде сатылып жатқан жарманың басым бөлігі шетелдік өнімдер. Дәл мұндай жоба өңірде бұрын-соңды болған емес. Серіктестік басшылары да тұтынушылар тарапынан сұранысқа ие болып отырған қажеттілікті зерттеп білген. Қазір жұрт холестерині көп еттен гөрі ағзаға жеңіл жармаға көбірек ұмтылуда. Ендеше, елге керек дүниені өздері неге шығарып, ұсынбасқа. Оның үстіне шикізат күйінде сәл арзан кететін сұлыны әлемдік стандартқа сай етіп дайындаса, айы оңынан тумай ма?..
Байқал БАЙӘДІЛ,
«Egemen Qazaqstan»
Ақмола облысы