Қазақстан Республикасы Денсаулық сақтау министрлігінің Фармация комитеті Еуразиялық экономикалық одақтағы ЕАЭО елдерінің бірыңғай нарығы аумағында оны кейіннен сату үшін дәрілік затқа алғашқы рет тіркеу куәлігін берді.
Осындай шешім медициналық өнім қауіпсіздігі мен сапасына сараптау және бағалау жүргізу саласындағы мемлекеттік сараптау ұйымы болып табылатын Дәрілік заттарды, медициналық мақсаттағы бұйымдарды және медицина техникасын ұлттық сараптау орталығында жүргізілген сараптама негізінде қабылданды.
Дәрі-дәрмектерді ЕАЭО бірыңғай нарығына шығарудың Одаққа қатысушы елдердің барлығына енгізілген нормативтік құқықтық актілер талаптарына сәйкес жүргізілетінін еске саламыз.
ҚР ДСМ Фармация комитетінің төрайымы Людмила Бюрабекова тіркеу куәлігін табыстай отырып, Қазақстанның ЕАЭО мүшелері үшін дәрілер сапасы, тиімділігі және қауіпсіздігіне қойылатын барлық халықаралық стандарттардың, сондай-ақ тиісті фармацевтикалық практикалар талаптарының қадағалануын қамтамасыз еткен бірінші ел болғанын атап өтті.
Тіркеу куәлігін алуға дайындық бірнеше жыл бойы жүргізілді. Сонымен, 2018 жылы Қазақстан дәрі-дәрмек айналымын реттеудің ортақ тәсілдерін қалыптастыру бойынша ЕАЭО жұмыс тобының оннан астам мәжілісіне қатысты. Отандық сарапшылар дәрілік препараттарды сараптау саласындағы әлемдік тәжірибені зерттеді, ЕАЭО мүше елдері үшін дәрілер сапасы, тиімділігі және қауіпсіздігіне қойылатын барлық халықаралық стандарттарды қадағалау мақсатында алыс және жақын шет елдердің нормативтік құқықтық актілеріне талдау жасады.
Бүгінгі таңда Қазақстан референтті мемлекет ретінде шетелдік және отандық фармацевтикалық өндірушілерден дәрілік заттар сараптамасын жүргізуге 25 өтініш қабылдады.